অসম লাইভ২৪ঃ ভাৰতলৈ অচিৰেই আহি আছে টেছলাৰ বাহন৷ ভাৰতত কেতিয়া খোলা হ’ব টেছলাৰ শ্বৰুম? ইতিমধ্যেই মাৰ্কিন সংস্থাটোৰ চিইঅ’ এলন মাস্কৰ সৈতে বৈঠকত মিলিত হৈছে ভাৰতৰ প্ৰধানমন্ত্ৰী নৰেন্দ্ৰ মোদী৷ এলন মাস্কে মোদীৰ সৈতে হোৱা প্ৰথম সাক্ষাততেই কয় যে তেওঁ প্ৰধানমন্ত্ৰী মোদীৰ কামকাজত খুবেই আকৃষ্ট৷ মোদীৰ কামকাজ দেখিয়েই তেঁও মোদী ভক্ত হৈ পৰিছে৷ অচিৰেই তেওঁ ভাৰতত টেছলাৰ শ্বৰুম খুলিবলৈকো আগ্ৰহী বুলি প্রধানমন্ত্ৰীক সাক্ষাৎ কৰাৰ পাছতেই প্ৰকাশ কৰিছে মাস্কে৷
২০২১ বৰ্ষৰ পৰাই ভাৰতত টেছলাৰ শ্বৰুম খোলাৰ পৰিকল্পনা চলিছে৷ ২০২১ বৰ্ষতেই বাংগালুৰুক এটা কোম্পানীৰ সৈতে কথা পাতিছিল টেছলাৰ বিষয়ববীয়াই৷ পৰিবহণ মন্ত্ৰী নীতিন গাডকাৰীয়ে এক সাক্ষাৎকাৰত এই কথা প্ৰকাশ কৰিছিল৷ অৱশ্যে পৰিবহন মন্ত্ৰীৰ আপত্তি এটাতেই আছিল যে টেছলাৰ তৰফৰ পৰা যদি শুল্ক কমোৱাৰ ব্যৱস্থা কৰে তেন্তে ভাৰতত অচিৰেই ব্যৱসায় আৰম্ভ কৰিব পাৰিব টেছলাই৷
২০২১ত সেই পৰিক্ৰমা ৰৈ গ’লেও ভাৰতত প্ৰথমটো বৈদ্যুতিক কাৰখানা খুলিবলৈ অগ্ৰসৰ হৈছে টেছলা৷ কেন্দ্ৰীয় অধিকাৰীসকলৰ সৈতে এই বিষয়টোক আলোচনাতো বহিছে টেছলাৰ চিইঅ৷ সূত্ৰৰ খবৰ অনুসৰি ভাৰতত প্ৰতি বছৰে ৫লাখ গাড়ী উৎপাদন কৰাৰ পৰিকল্পনা কৰিছে টেছলাই৷ ভাৰতীয় গ্ৰাহকৰ কথা ভাৱিয়েই এই বাহনৰ দাম ২৪,৪০০ডলাৰৰ পৰা আৰম্ভ হ’ব বুলি জনাইছে টেছলাৰ মালিক এলন মাস্কে৷ ভাৰতীয় টকাত এই ধনৰ পৰিমাণ হ’ব ২০লাখ টকা৷
বৰ্তমান আন্তৰ্জাতিক বজাৰত টেছলাৰ সকলোতকৈ কমদামী বাহন হৈছে Tesla Model-3, যাৰ দাম হৈছে ৬০ লাখৰ পৰা ৭০লাখ টকা৷ ভাৰতীয় গ্ৰাহকৰ বাবে এই দাম প্ৰায় ৬০ৰ পৰা ৭০ শতাংশ কমাবলৈ সাঁজু হৈছে টেছলাৰ চিইঅ’ এলন মাস্কে৷ বিশেষজ্ঞসকলৰ মতে টেছলাৰ এই পৰিকল্পনাই কেন্দ্ৰীয় চৰকাৰৰ মেক ইন ইণ্ডিয়া অভিযানত যথেষ্ট সহায়ক হৈ উঠিব৷ কেৱল বৈদ্যুতিক বাহনেই নহয়, বাহিৰৰ দেশৰ বাহন ৰপ্তানীৰ বাবে ভাৰতক বেচ হিচাপে ব্যৱহাৰ কৰিব পাৰে এই সংস্থাই৷
টেছলাৰ এই পৰিকল্পনাৰ ফলতেই আগন্তুক দিনত ভাৰতীয় গাড়ীৰ বজাৰখন আৰু সম্প্ৰসাৰিত হ’ব৷ ইয়াৰোপৰি নিবনুৱাসকলৰ বাবেও আহিবপাৰে ভাল খবৰ৷ কিয়নো এই সংস্থাত উলাব কেইবাশ চাকৰিও৷ প্ৰতিযোগিতমূলক বজাৰত আৰু নতুন নতুন কোম্পানীয়ে ভাৰতত শ্বৰুম খোলাৰ পৰিকল্পনা কৰিবলৈ সাহস কৰিব৷ ভাৰতৰ পৰা বিদেশলৈ বাহন ৰপ্তানী হ’লে দেশৰ অৰ্থনীতিৰ বাবেই ই শুভ হৈ পৰিব৷
ভাৰতত গাড়ী উৎপাদন কৰাৰ ওপৰিও ইন্দো-পেছিফিক অঞ্চলত এই গাড়ী ৰপ্তানি কৰিবলৈকো পৰিকল্পনা কৰিছে টেছলাই৷ এই মুহূৰ্তত এছিয়াৰ মাজত চীনতেই সকলোতকৈ ডাঙৰ কাৰখানা নিৰ্মাণ কৰিছে টেছলাই৷ তাতেই উৎপাদিত বাহন বিশ্বৰ একাধিক দেশত ৰপ্তানি দিয়ে চীনে৷ চীনৰ ওপৰত নিৰ্ভৰতা কমাই ভাৰতে পৰবৰ্তী বৈদ্যুতিক গাড়ী উৎপাদন আৰু ৰপ্তানীৰ হাব গঢ়ি তুলিবলৈ পৰিকল্পনা কৰিছে টেছলাই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
