অসম লাইভ২৪ঃ ভাৰতত বিলাহীৰ দাম অস্বাভাৱিক হাৰত বৃদ্ধি পাইছে৷ ভাৰতত বিলাহী কিনিব নোৱাৰি নেপাললৈ বিলাহী কিনিবলৈ যাত্ৰা কৰিছে এজন ডুজনকৈ কেইবাজনো ব্যক্তি৷ বিদেশলৈ বিলাহী ক্ৰয় কৰিবলৈ যোৱা ব্যক্তিজন উত্তৰাখণ্ডৰ৷ নেপাললৈ গৈ ভাৰতৰ আধা দামতেই ক্ৰয় কৰিছে বিলাহী৷ উত্তৰাখণ্ডৰ ধাৰচুলা আৰু বানাবাছৰ বাসিন্দাই সীমা পাৰ হৈ নেপাললৈ গৈছে৷ উদ্দেশ্য এটাই বিলাহী ক্ৰয় কৰা৷ ভাৰতত প্ৰতি কিঃগ্ৰাঃ বিলাহীৰ দাম ১২০টকাৰ পৰা ১৩০ টকা পৰ্যন্ত৷ কিন্তু নেপালত বিলাহীৰ কেজি ৬২ৰ পৰা ৬৯ টকা৷ অৰ্থাৎ ভাৰতৰ দামৰ আধা৷
নেপালৰ ব্যৱসায়ীয়ে এই সন্দৰ্ভত কয়, ‘পাচলি বিক্ৰী কৰি অন্যান্য সময়তকৈ এতিয়া দুগুণ আয় কৰিছে নেপালৰ ব্যৱসায়ীয়ে৷ ভাৰতৰ সীমান্তবৰ্তী এলেকাত নেপালৰ বাসিন্দাসকলে এতিয়া পাচলি ব্যৱসায় কৰিবলৈ আৰম্ভ কৰিছে৷ ভাৰতীয় বহু লোকেই এতিয়া নেপালত পাচলি বজাৰ কৰিবলৈ যায়৷ ইফালে নেপাল চৰকাৰেও কৃষকসকলৰ বাবে এটা বিশেষ গ্ৰুপ তৈয়াৰ কৰিছে৷ চৰকাৰে বীজ, সাৰ আৰু কৃষকসকলৰ বাবে বিভিন্ন উপকৰণ প্ৰদান কৰিছে৷ ফলত নেপালৰ কৃষকসকলে পাচলিৰ ব্যৱসায়ত নামিও পৰিছে৷ ইয়াৰ মাজতেই বিশেষভাৱে বিলাহীৰ খেতি কৰিবলৈ আৰম্ভ কৰিছে নেপালৰ কৃষকে৷
ভাৰতত বিলাহীৰ দাম অভাৱনীয় হাৰত বৃদ্ধি পোৱাত বিশেষভাৱে লাভৱান হৈছে নেপালৰ কৃষক৷ নেপালৰ কৃষকে বাৰিষাৰ সময়ত বিলাহীৰ ওপৰিও ফুলকবিৰো খেতি কৰিবলৈ আৰম্ভ কৰিছে৷ উল্লেখ্য যে উত্তৰাখণ্ডৰ কেইবাটাও এলেকাত দলং পাৰ হৈ নেপালত বজাৰ কৰিব পাৰে ভাৰতীয় লোকে৷ সেয়ে সীমান্তবৰ্তী কেইবাটাও এলেকাত বিশেষ পাচলিৰ বজাৰ গঢ়ি তুলিছে নেপালৰ কৃষকে৷
উল্লেখ্য যে এতিয়া নেপালত বিলাহী কিনিবলৈ সাধাৰণ মানুহৰ লগতে ভীৰ কৰিছে বেপাৰীসকলেও৷ ৪০টকাত বিলাহী ক্ৰয় কৰি আনি ভাৰতত ১৫০টকালৈকেও বিক্ৰি কৰিছে একাংশ ব্যৱসায়ীয়ে৷
বিলাহী ক্ৰয়ৰ সময়ত ভাৰতীয় মুদ্ৰাই লৈছে নেপালৰ ব্যৱসায়ীয়ে৷ কাৰণ নেপালত ভাৰতীয় মুদ্ৰাৰ মুল্য অধিক৷ ফলত নেপালৰ ব্যৱসায়ীৰ লাভ বেছি হয়৷ কোনো ব্যৱসায়ীয়ে যাতে ক’লা বজাৰ গঢ়ি তুলিব নোৱাৰে তাৰবাবে বিশেষ নজৰ ৰাখিছে ভাৰতীয় টাস্ক ফোৰ্ছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
