অসম লাইভ২৪ঃ বিৰোধী বৈঠকক লৈ এইবাৰ সৰৱ হৈছে দেশৰ প্ৰধানমন্ত্ৰী। প্রধানমন্ত্ৰী নৰেন্দ্ৰ মোদীয়ে এইবাৰ বাংগালুৰুত চলি থকা বিৰোধী দলৰ বৈঠকক লৈ কটাক্ষ কৰিছে প্রধানমন্ত্ৰীয়ে। বিৰোধী বৈঠকত অংশগ্ৰহণ কৰা নেতা-নেত্ৰীসকলক ‘দুৰ্নীতিবাজ’ বুলি অভিহিত কৰিছে প্ৰধানমন্ত্ৰীগৰাকীয়ে। তেওঁৰ অভিযোগ, বিৰোধীসকলৰ ওচৰত দেশ নহয়, পৰিয়ালহে সকলোতকৈ গুৰুত্বপূৰ্ণ।পৰ্ট ব্লেয়াৰৰ বীৰ ছাভাৰকাৰ আন্তৰ্জাতিক বিমানবন্দৰৰ নতুন এটি ভৱনৰ উদ্বোধনী অনুষ্ঠানত মঙলবাৰে ভাৰ্চুৱেলী উপস্থিত থাকে প্ৰধানমন্ত্ৰী। ভাৰ্চুৱেল মাধ্যমেৰে সেই ভৱন উদ্বোধন কৰে তেওঁ।
https://twitter.com/ANI/status/1681182380684619776?s=20
সেই অনুষ্ঠানত দিয়া ভাষণতেই তেওঁ আক্ৰমণৰ লক্ষ্য কৰি লৈছে বিৰোধী বৈঠকক। তেওঁ কয়, ‘এইসকলে পৰিয়ালক অগ্ৰাধিকাৰ দিয়ে। দেশক নহয়। দুৰ্নীতি তেওঁলোকৰ অনুপ্ৰেৰণা। কোনে কিমান ডাঙৰ দুৰ্নীতি কৰিব পাৰে সেয়াহে তেওঁলোকৰ বাবে গুৰুত্বপূৰ্ণ।’ বিৰোধীৰ এই বৈঠকক কটাক্ষ কৰিছে বিজেপিৰ সৰ্বভাৰতীয় সভাপতি জে পি নাড্ডাইয়ো। তেওঁ এই সন্দৰ্ভত কয়, ‘বিৰোধীৰ বৈঠক দুৰ্নীতিগ্ৰস্থসকলৰ সমাবেশ। তেওঁলোকৰ কোনো স্থিৰতা নাই।’ জে পি নাড্ডাৰো দাবী যে, বিৰোধীসকলৰ কোনো নীতি নাই। তেওঁলোকৰ কোনো লীডাৰ হ’ব পৰা নেতাও নাই।
মঙলবাৰে বিৰোধী নেতাৰ বৈঠকক কটাক্ষ কৰি মোদীয়ে লগতে কয়, ‘এয়া কট্টৰ ভ্ৰষ্টাচাৰীসকলৰ সন্মিলন। বিৰোধীসকলৰ মন্ত্ৰ হৈছে অফ দ্যা ফেমিলি, বাই দ্যা ফেমিলি আৰু ফৰ দ্যা ফেমিলি।’ দেশৰ ৰাজনীতি পৰিয়ালতান্ত্ৰিকতাৰ কৱলত পৰিয়েই ধ্বংস হৈছে বুলিও মন্তব্য কৰিছে প্রধানমন্ত্ৰীয়ে। লগতে কয় ‘বিগত ৯বছৰ ধৰি আমাৰ চৰকাৰে দেশৰ মানুহক নতুন নতুন সুযোগ সুবিধা দিছে। দেশৰ উন্নয়নৰ মডেল তৈয়াৰ কৰিছে। সবকা সাথ সবকা বিকাশৰ মডেল তৈয়াৰ কৰিছো।’
উল্লেখ্য যে, সোমবাৰৰ পৰা বাংগালুৰুত চলি থকা বিৰোধী বৈঠকত যোগ দিছে ২৬টা দলৰ প্ৰতিনিধিয়ে। বৈঠকত যোগ দিবলৈ সোমবাৰে বাংগালুৰুত উপস্থিত হৈছে পশ্চিমবংগৰ মুখ্যমন্ত্ৰীও। বিগত ২৩ জুনত বিৰোধীৰ প্ৰথমখন সন্মিলন অনুষ্ঠিত হৈছিল পাটনাত। এই বৈঠকসমূহৰ মূল উদ্দেশ্য এটাই দেশৰ পৰা বিজেপিক বিদায় দিয়া। বিজেপিৰ বিৰুদ্ধে যুঁজ দিবলৈ ৰণকৌশল তৈয়াৰ কৰা। বাংগালুৰুত বিৰোধী দলৰ বৈঠক চলি থকাৰ মাজতেই এনডিয়েও আহ্বান কৰিছে বিশেষ বৈঠকৰ। এনডিএৰ বৈঠকত ৩৮টা দলৰ প্ৰতিনিধিয়ে যোগ দিয়া বুলি এক সূত্ৰই প্রকাশ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
