অসম লাইভ২৪ঃ ২৬ বছৰে বিহু উৎযাপন নকৰা এখন বিশেষ গাওঁ। তামুলপুৰৰ কেকুৰিকুছিত ২৬ বছৰে নাই ভোগালীৰ আনন্দ উল্লাস। ১৯৯৮ চনৰ ১৩ জানুৱাৰীত ১৭ জন নিৰাপৰাধী পুৰুষ-মহিলা, কিশোৰ-কিশোৰীক নিৰ্মমভাৱে গুলিয়াই তেজৰ ফাকু খেলিছিল বন্দুকধাৰী এটি দুৰ্বৃত্তৰ দলে। তেতিয়াৰে পৰাই তামুলপুৰৰ কেকুৰিকুছিত পালন কৰা নহয় ভোগালী বিহু।
সমগ্ৰ ৰাজ্যতে উৎসাহ উদ্দীপনাৰে ভোগালী বিহুক আদৰাৰ ব্যাপক প্ৰস্তুতি চলি থকাৰ সময়তে এক ব্যতিক্ৰমী ছবি দেখা গৈছে তামুলপুৰৰ কেকুৰিকুছি গাঁওত। বিগত দুই দশক ধৰি ভোগালীৰ উৎসাহ-আনন্দ আৰু মেজীৰ জুইৰ উত্তাপক বিসৰ্জন দি আহিছে কেকুৰিকুছি গাঁওৰ ৰাইজে। বিহু বুলি প্ৰতিঘৰ অসমীয়াৰ ঘৰত ঢেকিত গুৰা সান্দহ খুন্দাৰ আয়োজন থাকে যদিও কেকেৰিকুছিত নাই কোনো ঢেঁকীৰ শব্দ।
১৯৯৮ চনৰ ১৩ জানুৱাৰীত এদল বন্দুকধাৰী দুৰ্বৃত্তৰ দলৰ নিৰ্বিচাৰ গুলীচালনাই কাঢ়ি নিলে গাঁৱবাসীৰ পৰা ভোগালীৰ উৎসাহ। সেইদিনটোতেই বিহুৰ আনন্দ হেৰাই গ’ল তামুলপুৰৰ কেকুৰিকুছিৰ পৰা। হাঁহিবোৰ সেইদিনা ক্ষোভ আৰু কান্দোনলৈ ৰূপান্তৰ হৈছিল। কেকুৰিকুছি গাঁওৰ বাবে ভোগালী বিহু মাথো এখন তেজৰঙা ছবি হৈ পৰিছিল। উৰুকাৰ নিশা তেতিয়াৰে পৰাই গাঁওবাসীয়ে উপবাসে থাকি এগছকৈ বন্তি জ্বলাই। সেই অভিশপ্ত নিশাটোত নিহত হৈছিল, হেমচন্দ্ৰ কলিতা, জয়মতী কলিতা, দ্বীপেন কৰিতা, প্ৰতিমা কলিতা, হিৰণ কলিতা, নৱজিৎ কলিতা, কুঞ্জলতা কলিতা, গীতাৰাণী কলিতা, ববিতা কলিতা, প্ৰমোদ কলিতা, ফেলনী ভূঞা, গজেন ভূঞা, বিনা ভূঞা, লিপিকা কলিতা, গীতাঞ্জলি কলিতা, ধনেশ্বৰ কলিতা আৰু মহেশ্বৰ হালৈ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
