ডিজিটেল ডেস্কঃ প্ৰেমিকলৈ হঠাতে এটা ফোন আহিল। বিপৰীতফালৰ পৰা ক’লে- ”আজি ৰাতি মোক লগ কৰিবলৈ আহিবা। ঘৰৰ কোনোৱে যাতে গম নাপায় মই তাৰ ব্যৱস্থা কৰি থম। তুমি মাত্ৰ আহিবা।” প্ৰেমিকাৰ কাতৰ আবেদন আৰু অভয়বাণী শুনি প্ৰেমিক নিশা গৈ উপস্থিত হৈছিল প্ৰেমিকাৰ ঘৰত। কিন্তু কপাল বেয়া আছিল। প্ৰেমিকাৰ ঘৰৰ মানুহে হাটে-লুটে ধৰিলে প্ৰেমিকক। প্ৰেমিকাৰ ঘৰৰ মানুহে ইমান বেয়াকৈ প্ৰহাৰ কৰে যে প্ৰেমিকে হস্পাতালত পোৱাৰ আগতেই প্ৰাণ হেৰুৱায়।
ঘটনাটো সংঘটিত হৈছে ৰাজস্থানত। ৰাজস্থানত বুদ্দী জিলাত সংঘটিত হৈছে এই ঘটনা। যোৱা সোমবাৰৰ নিশা সংঘটিত হৈছে এই ঘটনা। প্ৰেমিকাৰ ঘৰৰ লোকে প্ৰেমিক আৰু প্ৰেমিকৰ সৈতে যোৱা এজন বন্ধুক এনেদৰে মাৰপিট কৰে যে, এজনে তাতে প্ৰাণ হেৰুৱাৰ লগতে বন্ধুজনৰ অৱস্থা এতিয়া সংকটজনক। ৰাষ্ট্ৰীয় সংবাদমাধ্যমত প্ৰকাশিত খবৰ অনুসৰি, প্ৰেমিকৰ সৈতে যোৱা বন্ধুজনৰ দুয়োখন ভৰিয়েই এতিয়া প্ৰায় বিকল।
আৰক্ষীয়ে সংবাদমাধ্যমৰ সন্মুখত প্ৰকাশ কৰা তথ্য অনসুৰি, ৰাজস্থানৰ ৰেণ গাঁৱত সংঘটিত হোৱা এই ঘটনাত মৃত্য়ু হোৱা প্ৰেমিকজনৰ নাম নৰেন্দ্ৰ। প্ৰেমিকাৰ কাষৰ গাঁৱৰে নিৱাসী নৰেন্দ্ৰ বন্ধুৰ সৈতে নিশা প্ৰেমিকাৰ ঘৰত সোমোৱাৰ পাছতে পৰিয়ালৰ লোকে গম পায় আৰু পৰিয়ালৰ লোকে ওচৰ চুবুৰীয়াক খবৰ দিয়ে। তাৰ পাছতে দুয়োগৰাকীৰ ওচৰত অকথ্য নিৰ্যাতন চলায় পৰিয়ালৰ সদস্যসকলে।
আৰক্ষীয়ে এতিয়ালৈকে কেইবাজনো লোকক গ্ৰেপ্তাৰ কৰিছে। মঙলবাৰে পুৱাই নৰেন্দ্ৰৰ মৃতদেহ চমজাই দিয়া হৈছে পৰিয়ালৰ লোকক। আৰক্ষীয়ে সদৰি কৰা মতে, প্ৰহাৰ কৰাৰ পাচত নৰেন্দ্ৰ ৰাস্তাৰ কাষত পেলাই দিছিল প্ৰেমিকাৰ পৰিয়ালৰ লোকে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
