বিজেপিৰ মানহানিৰ গোচৰ, আজি বাংগালুৰু আদালতত হাজিৰ হ’ব লাগিব ৰাহুল গান্ধী
কৰ্ণাটক বিজেপিৰ মানহানিৰ গোচৰত আজি ৭ জুন শুকুৰবাৰে বিশেষ আদালতত হাজিৰ হ’ব কংগ্ৰেছ নেতা ৰাহুল গান্ধী। বাতৰি কাকতত মানহানিকাৰক বিজ্ঞাপন দিয়াৰ অভিযোগ ৰাহুল গান্ধীৰ বিৰুদ্ধে। যোৱা বছৰ ৰাজ্যৰ নিৰ্বাচনৰ পূৰ্বে দিয়া এটা বিজ্ঞাপনত ৰাজ্যখনৰ তদানীন্তন বিজেপি চৰকাৰে ২০১৯-২০২৩ বৰ্ষৰ ভিতৰত বৃহৎ পৰিসৰৰ দুৰ্নীতিত লিপ্ত হোৱাৰ অভিযোগ উত্থাপন হৈছিল।
শেহতীয়া ঘটনা অনুসৰি যোৱা বছৰ কৰ্ণাটকত বিধানসভা নিৰ্বাচন অনুষ্ঠিত হৈছিল। এই সময়ছোৱাত কংগ্ৰেছে ২০১৯-২০২৩ বৰ্ষৰ শাসনকালত তদানীন্তন বিজেপি চৰকাৰে বৃহৎ পৰিসৰৰ দুৰ্নীতিত লিপ্ত হোৱাৰ অভিযোগ উত্থাপন কৰিছিল।
ইয়াৰ পিছত কৰ্ণাটক বিজেপিয়ে কংগ্ৰেছ নেতা ৰাহুল গান্ধী, মুখ্যমন্ত্ৰী সিদ্দাৰমাইয়া আৰু উপ-মুখ্যমন্ত্ৰী ডি কে শিৱকুমাৰৰ বিৰুদ্ধে মানহানিৰ গোচৰ ৰুজু কৰে। অভিযোগ কৰে যে এই কংগ্ৰেছ নেতাসকলে তেতিয়াৰ মুখ্যমন্ত্ৰী বাসৱৰাজ বোমাইকে ধৰি বিজেপি নেতাসকলৰ বিৰুদ্ধে আগশাৰীৰ বাতৰি কাকতত ভুৱা বিজ্ঞাপন দিছিল।
লগতে কংগ্ৰেছে ‘দুৰ্নীতিৰ হাৰ কাৰ্ড’ প্ৰকাশ কৰি সকলো ৰাজহুৱা কামত ৪০ শতাংশ কমিচন লোৱাৰ অভিযোগ উত্থাপন কৰে। একে সময়তে ৰাহুল গান্ধীয়েও নিজৰ ছ’চিয়েল মিডিয়া একাউণ্ট এক্সত এটা অপমানজনক বিজ্ঞাপন পোষ্ট কৰে। বিশেষ আদালতে এই গোচৰত চিদ্দাৰমৈয়া আৰু শিৱকুমাৰক ১ জুনত জামিন মঞ্জুৰ কৰিছিল।
ইয়াৰ পূৰ্বে ২০২৩ চনৰ ২৩ মাৰ্চত চুৰাটৰ চিজেএম আদালতে ৰাহুল গান্ধীক দুবছৰৰ কাৰাদণ্ডৰ শাস্তি প্ৰদান কৰিছিল। মোডী উপাধিৰ সন্দৰ্ভত কৰা মন্তব্যৰ বাবেই তেওঁক শাস্তি প্ৰদান কৰা হৈছিল। ঠিক পিছদিনা ২৪ মাৰ্চত লোকসভা সচিবালয়ে তেওঁৰ সদস্যপদ অপসাৰণৰ নিৰ্দেশ জাৰি কৰে।
নিয়ম অনুসৰি কোনো সাংসদ বা বিধায়কক দুবছৰ বা তাতকৈ অধিক কাৰাদণ্ড বিহা হ’লে সদস্যপদ হেৰুৱাই পেলায়। ৰাহুলৰ লগতো একেই হৈছিল। কিন্তু পিছত ৰাহুলে উচ্চতম ন্যায়ালয়ৰ পৰা সকাহ লাভ কৰে। আদালতে তেওঁৰ শাস্তি স্থগিত ৰাখে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
