পশ্চিম এছিয়াত আমেৰিকা আৰু ইৰানৰ মাজত চলি থকা সংঘাতে এইবাৰ সাগৰীয় বাণিজ্যৰ ওপৰত প্ৰভাৱ পেলাইছে। হৰমুজ জলদ্বীপৰ সমীপত পৃথক পৃথক ঘটনাত দুখন মালবাহী জাহাজ ডুব গৈছে। ইয়াৰে এখন জাহাজৰ এজন ক্ৰু সদস্যৰ মৃ*ত্যু হোৱাৰ বিপৰীতে আনখন জাহাজত থকা ২১ জন লোকক নিৰাপদে উদ্ধাৰ কৰা হৈছে। ইফালে, সামাজিক মাধ্যমত প্ৰকাশ পোৱা এটা ভিডিঅ’ত সাগৰত কণ্টেইনাৰৰ পৰা সামগ্ৰী পৰি থকা দেখা গৈছে। কিছুমান লোকে নাৱেৰে গৈ সেই সামগ্ৰী সংগ্ৰহ কৰি থকা বুলিও ভিডিঅ’টোত দেখা গৈছে। এখন নাও সৰু সৰু বাকচেৰে ভৰি থকা দেখা গৈছে। বাকচবোৰত সুগন্ধিৰ বটল আৰু iPhone থকা বুলি অনুমান কৰা হৈছে।
ইয়াৰ মাজতে ইৰানৰ ৰিভল্যুচনেৰী গাৰ্ডৰ এজন জ্যেষ্ঠ বিষয়াই আমেৰিকাৰ সৈতে চলি থকা সংঘাতক বিশ্বযুদ্ধৰ সৈতে তুলনা কৰিছে। আনহাতে, হৰমুজ জলদ্বীপৰ ওচৰলৈ আমেৰিকাৰ যুদ্ধজাহাজ আহিলে সেইবোৰ ডুবাই পেলোৱাৰো ভাবুকি দিছে ইৰানে। এই ঘটনাসমূহে বিশ্বৰ গুৰুত্বপূৰ্ণ সাগৰীয় বাণিজ্যিক পথ আৰু তেলৰ যোগানক লৈ উদ্বেগ বৃদ্ধি কৰিছে।
মঙলবাৰে হৰমুজ জলদ্বীপৰ ওচৰত ছিংগাপুৰৰ পতাকা থকা মালবাহী জাহাজ জিএফএছ প্ৰাইড ডুব যায়। চলাচল কৰি থকা অৱস্থাত জাহাজখনত খুন্দা লাগি ক্ষতিসাধন হোৱাৰ লগতে অগ্নিকাণ্ড সংঘটিত হয়। ছিংগাপুৰৰ মেৰিটাইম এণ্ড প’ৰ্ট অথৰিটিৰ তথ্য অনুসৰি, জাহাজখনত থকা ২১ জন ক্ৰু সদস্যকে নিৰাপদে উদ্ধাৰ কৰা হয়। এই ঘটনাত কোনো লোক আহত হোৱা নাই বুলি জানিব পৰা গৈছে।
আন এটা ঘটনাত এণ্টিগুৱা আৰু বাৰ্বুদাৰ পতাকা থকা কেপ ডাও নামৰ মালবাহী জাহাজখনো ডুব যায়। খবৰ অনুসৰি, যোৱা ২৩ ছেপ্টেম্বৰত জাহাজখনত আক্ৰমণ কৰা হৈছিল। এই ঘটনাত এজন ক্ৰু সদস্যৰ মৃত্যু হয় যদিও আনসকলক উদ্ধাৰ কৰা হয়।
আন্তঃৰাষ্ট্ৰীয় সামুদ্ৰিক সংস্থাৰ তথ্য অনুসৰি, আমেৰিকা-ইৰানৰ সংঘাত আৰম্ভ হোৱাৰ পিছত এই দুখনকে ধৰি মুঠ তিনিখন জাহাজ ডুব যোৱাৰ খবৰ পোৱা গৈছে।
সামুদ্ৰিক নিৰাপত্তা সংস্থা ভ্যানগাৰ্ড, আন্তঃৰাষ্ট্ৰীয় সামুদ্ৰিক সংস্থা আৰু ব্ৰিটেইনৰ সামুদ্ৰিক বাণিজ্য সংস্থাৰ তথ্য অনুসৰি, দেওবাৰৰ পৰা কমেও ১০খন জাহাজ আক্ৰমণৰ লক্ষ্য হৈ পৰিছে। ইয়াৰে দেওবাৰে ছখন আৰু মঙলবাৰে চাৰিখন জাহাজত আক্ৰমণ কৰা হয়। অক্টোবৰৰ আৰম্ভণিৰ পৰা জাহাজৰ ওপৰত ২৩টা আক্ৰমণৰ ঘটনা সংঘটিত হোৱা বুলি জানিব পৰা গৈছে। এই সংখ্যা সংঘাত আৰম্ভ হোৱাৰ পিছৰ মাহিলী গড় সংখ্যাতকৈ প্ৰায় দুগুণ। এই আক্ৰমণৰ লক্ষ্য কেৱল তেল পৰিবহণ কৰা জাহাজতে সীমাবদ্ধ হৈ থকা নাই। কণ্টেইনাৰ জাহাজ আৰু অন্যান্য মালবাহী জাহাজো আক্ৰমণৰ সন্মুখীন হৈছে। AFPৰ এক প্ৰতিবেদন অনুসৰি, সামুদ্ৰিক নিৰাপত্তা বিশ্লেষক বৰুণ গুপ্তাৰ মতে, উপসাগৰীয় অঞ্চলৰ পৰা তেলৰ যোগান স্বাভাৱিক হোৱাত বাধা দিয়া আৰু বিশ্বৰ শক্তি বজাৰত চাপ সৃষ্টি কৰাই এই আক্ৰমণসমূহৰ অন্যতম উদ্দেশ্য হ’ব পাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
