২৪ বছৰৰ মূৰকত নতুন মুখ্যমন্ত্ৰী পাব ওড়িশাবাসীয়ে, কালিলৈ শপত গ্ৰহণ, কোন হয় এই মোহন চৰণ মাঝী
এইবাৰ ওড়িশাত বিজেপিয়ে ঐতিহাসিক জয় লাভ কৰিছে। একেৰাহে ২৪ বছৰে ক্ষমতাত থকা বিজেডিক হৰুৱাই এই বিজয় সাব্যস্ত কৰিছে বিজেপিয়ে। নবীন পাটনায়কে ২৪ বছৰ ৯৮ দিন অবিৰতভাৱে ওড়িশাৰ মুখ্যমন্ত্ৰী হিচাপে কাৰ্যনিৰ্বাহ কৰিছিল। এতিয়া ওড়িশাবাসীয়ে ২৪ বছৰৰ মূৰকত পাব মোহন চৰণ মাঝীৰ ৰূপত নতুন মুখ্যমন্ত্ৰী।
কালি ১২ জুন তাৰিখ বুধবাৰে শপত গ্ৰহণ কৰিব মোহন মাঝিয়ে। তেওঁৰ লগতে কেভি সিং দেও আৰু প্ৰৱতী পৰিদাইও ৰাজ্যৰ উপ মুখ্যমন্ত্ৰী হিচাপে শপত গ্ৰহণ কৰিব। এইবাৰ ভাৰতীয় জনতা পাৰ্টিৰ টিকটত কেওনঝাৰ বিধান সভা সমষ্টিৰ পৰা বিধানসভা নিৰ্বাচনত প্ৰতিদ্বন্দ্বিতা কৰি জয়ী হয় মোহন চৰণ মাঝিয়ে। এই আসনৰ পৰা তেওঁ জয়ী হোৱাটো প্ৰথম নহয়। ইয়াৰ পূৰ্বেও তিনিবাৰকৈ সৰ্বমুঠ চাৰিবাৰ কেওনঝাৰ বিধানসভাৰ আসনৰ পৰা নিৰ্বাচনত প্ৰতিদ্বন্দ্বিতা কৰি জয়ী হৈছে।
১৯৭২ চনত ওড়িশাৰ কেওনঝাৰ জিলাৰ ৰাইকালানত জন্মগ্ৰহণ কৰা মোহন চৰণ মাঝিয়ে প্ৰাথমিক শিক্ষা গ্ৰহণ কৰাৰ পিছত সৰপঞ্চ হিচাপে ৰাজনৈতিক যাত্ৰা আৰম্ভ কৰিছিল। পিছত ক্ৰমান্বয়ে ৰাজনীতিত ভৰি দি ভাৰতীয় জনতা পাৰ্টিত যোগদান কৰে। লাহে লাহে তেওঁক ওড়িশাত বিজেপিৰ এজন বলিষ্ঠ জনজাতীয় নেতা হিচাপে গণ্য হ’বলৈ ধৰিলে।
২০০০ চনত কেওনঝাৰ বিধান সভা সমষ্টিৰ পৰা মাঝি প্ৰথমবাৰৰ বাবে বিজেপি প্ৰাৰ্থী হিচাপে নিৰ্বাচিত হৈ জয়ী হৈছিল। ইয়াৰ পিছত ২০০৯ চনত বিজেপিয়ে পুনৰ মোহন চৰণ মাঝিৰ ওপৰত আস্থা প্ৰকাশ কৰে। কেওনঝাৰ বিধানসভাৰ আসনৰ পৰা প্ৰতিদ্বন্দ্বিতা কৰি জয়লাভ কৰে।
২০১৯ চনত আকৌ এবাৰ কেওনঝাৰ বিধানসভাৰ আসনৰ পৰা বিজেপিৰ টিকটত জয়ী হৈছিল মাঞ্জী। চলিত ২০২৪ চনত চতুৰ্থবাৰৰ বাবে কেওনঝাৰ বিধানসভাৰ পৰা জয়লাভ কৰিছিল মোহন চৰণ মাঝিয়ে।
এইবাৰ নিৰ্বাচনত মোহন চৰণ মাঝিয়ে মুঠ ৮৭৮১৫টা ভোট লাভ কৰি তেওঁৰ নিকটতম প্ৰতিদ্বন্দ্বী বিজু জনতা দলৰ মীনা মাঝিক ১১৫৭৭টা ভোটৰ বিপুল ব্যৱধানত পৰাস্ত কৰে। নিৰ্বাচন আয়োগক দিয়া শপতনামা অনুসৰি মাঝি আৰু তেওঁৰ পৰিয়ালৰ মুঠ স্থাৱৰ আৰু স্থাৱৰ সম্পত্তিৰ মূল্য ১.৯৭ কোটি টকা।
উল্লেখ্য যে, ওড়িশাৰ প্ৰাক্তন মুখ্যমন্ত্ৰী নবীন পাটনায়কে মুখ্যমন্ত্ৰী হিচাপে প্ৰথমবাৰ শপত লোৱাৰ সময়ত মোহন চৰণ মাঝিয়ে প্ৰথমবাৰৰ বাবে বিধায়ক হিচাপে নিৰ্বাচিত হৈছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
