প্রধানমন্ত্ৰীৰ আশীৰ্বাদ লৈ উপমন্ত্ৰীৰ আসনত বহিল পৱন কল্যান, চিনেমাত হীট পৱন, ৰাজনীতিত হ’বনে সফল?

দক্ষিণী ছুপাৰষ্টাৰ তথা ৰাজনীতিবিদ পৱন কল্যাণে বুধবাৰে অন্ধ্ৰপ্ৰদেশৰ উপ-মুখ্যমন্ত্ৰী হিচাপে শপতগ্ৰহণ কৰে। ১২ জুনত চন্দ্ৰবাবু নাইডু আৰু প্ৰধানমন্ত্ৰী নৰেন্দ্ৰ মোদীৰ উপস্থিতিত  উপ মুখ্যমন্ত্ৰী হিচাপে শপত লয় পৱন কল্য়ানে৷ মঞ্চত উঠিয়েই  উপস্থিত থকা জ্যেষ্ঠ ভাতৃ তথা অভিনেতা চিৰঞ্জীৱীৰ ভৰি চুই আশীৰ্বাদ লৈ আগবাঢ়ে শপত গ্ৰহণৰ বাবে৷

কোন এই পৱন কল্যান?

১৯৬৮ চনৰ ২ ছেপ্টেম্বৰত অন্ধ্ৰ প্ৰদেশৰ বাপাটলাত জন্মগ্ৰহণ কৰিছিল পৱন কল্যাণে। ৫৫ বছৰীয়া পৱন কল্যাণে আঞ্চলিক ভাষাৰ ছবিৰে দৰ্শকৰ মন জয় কৰি আহিছে৷  ১৯৯৬ চনত অভিনেতাগৰাকীয়ে আৰম্ভ কৰিছিল চিনেমাৰ কাম৷ মূলতঃ তেওঁ বৰ্তমান তেলেগু চিনেমাৰ এখন জনপ্ৰিয় মুখ। বৰ্তমান তেওঁ অন্ধ্ৰ প্ৰদেশৰ ৰাজনীতিৰো এক গুৰুত্বপূৰ্ণ মুখ হৈ পৰিছে।

পৱন কল্যানৰ প্ৰকৃত নাম কি?

পৱন কল্যান হিচাপে জনপ্ৰিয় তেলেগু অভিনেতাজনৰ আছে অন্য এটা নামো৷ তেওঁৰ প্ৰকৃত নাম হৈছে কনিডেলা কল্যাণ বাবু৷ পাছলৈ চিনেমা জগতত সেই নাম পছন্দৰ নোহোৱাত তেওঁৰ নাম হৈ পৰে পৱন কল্যান৷ চিনেমা ক্ষেত্ৰত সফল হ’লেও পৱন কল্যানৰ ৰাজনৈতিক জীৱন বহু উত্থান-পতনেৰে ভৰা৷ প্ৰায় ১৬ বছৰ পূৰ্বে ৰাজনৈতিক যাত্ৰা আৰম্ভ কৰিছিল পৱন কল্যানে৷ ২০০৮ চনত জেষ্ঠ্য ভাতৃ চিৰঞ্জীৱীয়ে আৰম্ভ কৰা প্ৰজা ৰাজ্যম পাৰ্টীৰ যুৱ শাখা, ‘যুৱৰাজম’ৰ সভাপতি নিযুক্ত হয় পৱন৷

২০১৪ চনত গঠন হ’ল  ‘জনসেনা পাৰ্টি’

ককায়েক চিৰঞ্জীৱীৰ দলত পৱন কল্যানে গুৰুত্বপূৰ্ণ ভূমিকা পালন কৰি আছিল। কিন্তু পিছত স্বাস্থ্যজনিত সমস্যাৰ বাবে ৰাজনীতিৰ পৰা আঁতৰি আহিছিল অভিনেতা পৱন৷ পাছলৈ ২০১৪ চনত তেওঁ নিজাকৈ এটা দল ‘জনসেনা পাৰ্টি’ আৰম্ভ কৰে। নিজাকৈ ৰাজনৈতিক দল গঠন কৰাৰ পিছত পৱন কল্যানে ছবিৰ লগতে ৰাজনীতিত অধিক গুৰুত্ব দিবলৈ আৰম্ভ কৰে। এই সময়ছোৱাত তেওঁ তেলেগু দেশম পাৰ্টি (টিডিপি)ক সমৰ্থন কৰা দেখা গৈছিল। জনসাধাৰণৰ মাজত কাম কৰা আৰম্ভ কৰে অভিনেতাজনে। এই সন্দৰ্ভত তেওঁ প্ৰধানমন্ত্ৰী মোদীলৈকো এখন পত্ৰ লিখিছিল। ইয়াৰ ওপৰিও বনাঞ্চলত নিৰ্বিচাৰে চলি থকা অবৈধ খনন কাৰ্যক উদঙাই দিয়াৰ কামো কৰিছিল অভিনেতাগৰাকীয়ে।

২০১৯ত ১৪০খন আসনত প্ৰতিদ্বন্দ্বিতা কৰি লাভ কৰিছিল এখন আসন

২০১৯ চনৰ অন্ধ্ৰ প্ৰদেশ বিধানসভা নিৰ্বাচনত পৱন কল্যাণে বহু আশা ৰাখিছিল জনতাৰ পৰা। তেওঁৰ দলে ১৪০খন বিধানসভা আসনত প্ৰাৰ্থী প্ৰক্ষেপ কৰিছিল। এই আসনৰ ভিতৰত জনসেনাই মাত্ৰ এখন আসনহে লাভ কৰে। পৱন কল্যাণৰ দলৰ লজ্জাজনক পৰাজয়ৰ পাছত কিছু সময়ৰ বাবে ভাঙিও পৰিছিল পৱন কল্যান৷

২০২৪ত সলনি হ’ল প্ৰতিচ্ছবি

২০২৪ চনত ২০১৯ চনৰ দৃশ্যপট সম্পূৰ্ণৰূপে সলনি হৈ গৈছে। ২০২৪ চনত ‘জনসেনা’ দলে অন্ধ্ৰপ্ৰদেশ বিধানসভাৰ নিৰ্বাচনত ২১খন আসন আৰু লোকসভা নিৰ্বাচনত ২খন আসনত প্ৰতিদ্বন্দ্বিতা কৰি আটাইকেইখন আসনত জয়ী হৈছে। ২খন আসন উপহাৰ দিয়াৰ বাবে এন ডি এ জোঁটে তেওঁক উপহাৰ দিছে উপমুখ্যমন্ত্ৰীৰ পদ৷

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ