মণিপুৰলৈ হঠাৎ মনত পৰিছে কেন্দ্ৰৰ। মণিপুৰৰ সাম্প্ৰতিক পৰিস্থিতিক লৈ সোমবাৰে এক উচ্চপৰ্যায়ৰ বৈঠকত অংশগ্ৰহণ কৰিছে অমিত শ্বাহ। উত্তৰ পূব ভাৰতৰ এই ৰাজ্য বিগত এবছৰে জ্বলিয়েই আছে। এবছৰ ধৰি অব্যাহত আছে হিংসা। এই ঘটনাক লৈ বিগত এবছৰ নিমাতে থাকিলেও এতিয়া আৰু নিমাতে থাকিলে কৰোবাত ৰাজনৈতিক সংকট আৰু দৃঢ় হোৱাৰ সম্ভাৱনা দেখিছে কেন্দ্ৰই বুলি বহুসংখ্যক নেটিজেনে চলাইছে চৰ্চা৷
গৃহ মন্ত্ৰণালয়ৰ তৰফৰ পৰা এক বিবৃত্তিযোগে জনোৱা হৈছে যে, মণিপুৰৰ বৰ্তমান পৰিস্থিতি, সুৰক্ষা ব্যৱস্থাক লৈ ৰিপৰ্ট পৰ্যবেক্ষণ কৰিছে অমিত শ্বাহে। তাত যাতে নকৈ কোনো সমস্যা বা হিংসা নহয় তাৰবাবে নিৰাপত্তা এজেন্সিসমূহক সজাগ হৈ থাকিবলৈ নিৰ্দেশ দিছে গৃহমন্ত্ৰী শ্বাহে। প্ৰয়োজন হ’লে আৰু অধিক বাহিনী মোতায়েন কৰা হ’ব বুলিও জনাইছে গৃহমন্ত্ৰীগৰাকীয়ে।
শান্তি উভতাই আনিবলৈ যথাযত পদক্ষেপ গ্ৰহণৰ নিৰ্দেশ দিয়াৰ লগতে হিংসা বা অশান্তিৰ চেষ্টা কৰা অভিযুক্তসকলৰ বিৰুদ্ধে কাঢ়া ব্যৱস্থা গ্ৰহণ কৰিবলৈকো নিৰ্দেশ দিছে অমিত শ্বাহে। মণিপুৰৰ আশ্ৰয় শিৱিৰত পৰ্যাপ্ত খাদ্য, পানী, ঔষধ আৰু অন্যান্য সামগ্ৰী আছে নে নাই সেই সম্পৰ্কেও পুংখানোপুংখভাৱে বুজ লৈছে গৃহমন্ত্ৰী শ্বাহে।
গৃহমন্ত্ৰণালয়ৰ তৰফৰ পৰা মুখ্য সচিবক নিৰ্দেশ দিয়া হৈছে, গৃহহীন মানুহে যাতে প্ৰয়োজনীয় খাদ্য, চিকিৎসা পৰিসেৱা আৰু শিক্ষা পাই তাৰ উচিত ব্যৱস্থা কৰক। ধীৰে ধীৰে তেওঁলোকৰ পুনৰ্বাসনৰো ব্যৱস্থা কৰা হব বুলি জনাইছে কেন্দ্ৰীয় গৃহমন্ত্ৰীগৰাকীয়ে।অমিত শ্বাহে কয় যে, গৃহমন্ত্ৰণালয়ৰ পক্ষৰ পৰা মেইতেই আৰু কুকি দুই গোষ্ঠীৰ সৈতেই কথাবোৰ আলোচনা হব। আলোচনাৰ মাধ্যমেৰে সমস্যা সমাধান কৰাটো জৰুৰী। জাতিগত হিংসাৰ দ্ৰুত অৱসানৰ লক্ষ্যৰে প্ৰয়োজনীয় সহায় কৰাৰো আশ্বাস মণিপুৰ চৰকাৰক দিছে গৃহমন্ত্ৰী শ্বাহে।
উল্লেখ্য যে মণিপুৰত এই হিংসাৰ দাৱানল জ্বলি উঠিছিল বিগত বৰ্ষৰ ৩মেত। কুকি আৰু মেইতেই গোষ্ঠীৰ মাজত জাতিগত সংঘাতক কেন্দ্ৰ কৰি উত্তপ্ত হৈ উঠিছিল মণিপুৰ।তাৰপিছৰে পৰাই এটাৰ পাছত আনটো নৃশংস হত্যাৰ খবৰ আহিছে মণিপুৰৰ পৰা। গৃহহীন হৈছে অসংখ্য মানুহ। দুই মহিলাক বিবস্ত্ৰ কৰি ৰাস্তাত ঘূৰাই লৈ ফুৰাৰ ভিডিঅ বিয়পি পৰিছিল সামাজিক মাধ্যমত।এই ভিডিঅই দেশ তোলপাৰ লগালেও নিমাতে আছিল কেন্দ্ৰ নিমাতে আছিল মোদী-শ্বাহ। সদনত সৰৱ হৈছিল বিৰোধী, কি লোকসভা, কি ৰাজ্যসভা সকলোতে বিৰোধীয়ে সুধিছিল, এখন দেশৰ এখন ৰাজ্য জ্বলি থাকোতে কেনেকৈ নিস্তব্ধতা ভালপাইছে শাসকীয় পক্ষই? উত্তৰ নাছিল প্ৰধানমন্ত্ৰীৰ হাতত, উত্তৰ নাছিল গৃহমন্ত্ৰীৰ হাতত। উত্তৰ নাছিল নে দিব খোজা নাছিল সেই কথা অৱশ্যে স্পষ্ট নহয়।কিন্তু লোকসভা নিৰ্বাচনত এই নিস্তব্ধতাই হাঁথিয়াৰ হৈ পৰে বিৰোধীৰ। হিংসাজৰ্জৰ মণিপুৰৰ পৰা এজনো সাংসদ শাসকপক্ষই লাভ নকৰিলে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
