বিয়াত বহিল সোনাক্ষী-জাহিৰ৷ বগা পোছাকেৰে বিবাহত স্বাক্ষৰ কৰিলে সোনাক্ষী-জাহিৰে৷ পৰিকল্পনামতেই খুব সাধাৰণ পোছাক, সাধাৰণ মেকআপেৰে বিয়াত বহিল সোনাক্ষী সিনহা৷ পত্নী সোনাক্ষীৰ সৈতে একেই ৰঙৰ পোছাকত দেখা গ’ল জাহিৰ ইকবালকো৷ সাত বছৰ পূৰ্বে এই দিনটোতেই দুয়োৰে আলাপ হৈছিল৷ চিনাকী হৈছিল এজনৰ সৈতে আনজন৷ সকলো প্ৰতিবন্ধকতা নেওচি বৈবাহিক জীৱন আৰম্ভ কৰিলে সোনাক্ষী-জাহিৰে৷
বিবাহৰ ছবি সামাজিক মাধ্যমত নিজেই পোষ্ট কৰিছে দম্পত্তিহালে৷ বিগত এটা মাহে চলি আছিল সোনাক্ষী-জাহিৰৰ বিবাহৰ চৰ্চা৷ শনিবাৰে অভিনেত্ৰীগৰাকীৰ ঘৰত আছিল মেহেন্দি অনুষ্ঠানৰ লগতে পুজাপাঠো৷ দেওবাৰে দুয়োৱে আইনী বিবাহ সম্পন্ন কৰিছে৷ বিয়াৰ পূৰ্বে বান্দ্ৰাৰ এক মছজিদত দেখা গৈছিল জাহিৰক৷ তাৰপিছতেই সকলোৰে বাঢ়িছিল উৎকণ্ঠা৷ নৱবধূৰ ৰূপত কেতিয়া দেখা যাব সোনাক্ষীক?
উৎকণ্ঠাৰ অন্ত পেলাই অৱশেষত বহু প্ৰত্যাশিত বিবাহৰ ছবি ভাইৰেল হৈছে৷ বগা ৰং সোনাক্ষীৰ পছন্দ বাবেই জাহিৰৰ ঘৰৰ পৰা সোনাক্ষীলৈ এই পোছাক পঠিওৱা হৈছে বুলি জনাইছে একাংশ সূত্রই৷ নৱদম্পত্তিহালৰ ফটো দেখা মাত্ৰকেই এতিয়া বহুতেই শুভেচ্ছাৰে ভৰাই পেলাইছে দুয়োকে৷ নিশা ৮ বজাৰ পৰা আৰম্ভ হৈছে ৰিচিপছন পাৰ্টীও৷ বিয়াৰ নিমন্ত্ৰণপত্ৰত অতিথিৰ উদ্দেশ্যি পূৰ্বেই সোনাক্ষীয়ে জনাইছিল যে এই পাৰ্টীত সকলোৱে যাতে ৰঙাক বাদ দি অন্য ৰঙৰ পোছাক পৰিধান কৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
