মহাকাশত বন্দী সুনীতা উইলিয়ামছ৷ তেওঁ আৰু তেওঁৰ সহযাত্ৰী বেৰি উইলমোয়ে এতিয়া পৃথিৱীলৈ উভতি অহাত বাধা আহিছে৷ এই কথা আমি কোৱা নাই৷ এই কথা কৈছে নাছাই৷ প্ৰথমে নাছাই প্ৰকাশ কৰা তথ্যমতে তেওঁলোক আজি অৰ্থাৎ ২৬ জুনত পৃথিৱীলৈ উভতি অহাৰ কথা৷ কিন্তু এতিয়া জনা গৈছে যে এয়া আৰু সম্ভৱ নহয়৷ ত্ৰুটি ধৰা পৰিছে সুনীতা উইলিয়ামছৰ দলটোক কঢ়িয়াই নিয়া মহাকাশযানত৷ ইফালে উভতি আহিবলৈকো লাহে লাহে কমি আহিছে ইন্ধন৷ আৰু মাত্ৰ ২৭ দিন ইন্ধন বাকী আছে বুলি জনাইছে নাছাই৷ যাৰ বাবে এতিয়া ভয়ো খাইছে একাংশই৷ যদি ২৭ দিনৰ ভিতৰত যান্ত্ৰিক বিজুতি দূৰ কৰি ভালে ভালে উভতাই আনিব নোৱাৰি তেন্তে কল্পনা চাওলাৰ দৰেই হ’ব নেকি সুনীতা উইলিয়ামছৰো সেই বিষয়টো চৰ্চাৰ আওতালৈ আহিছে৷
বিগত ৭ জুনত আন্তৰ্জাতিক মহাকাশ ষ্টেচনত ভৰি দিছিল সুনীতাই৷ উৎক্ষেপণৰ পাছতেই একাধিক যান্ত্ৰিক ত্ৰুটি ধৰা পৰিছে মহাকাশযানখনত৷ দিন ৰাতি একাকাৰ কৰি এতিয়া সেই ত্ৰুটি মেৰামতিৰ কামত লাগিছে নভশ্চৰসকল৷ কিন্তু যাৱতীয় সমস্যা দূৰ কৰি গন্তব্য স্থানত উপস্থিত হৈছে তেওঁলোকক কঢ়িয়াই নিয়া মহাকাশযানখন৷ মহাকাশ কেন্দ্ৰত উপস্থিত হোৱাৰ পাছতেই আকৌ বোয়িং ষ্টাৰলাইনাৰক লৈ চলিছে একাংশ পৰীক্ষা৷ আনকি সেই মহাকাশযানখনত যে ত্ৰুটি আছে সেই কথা জানিও কিয় মহাকাশলৈ সুনীতাক সেই যানতেই পঠিয়াই দিয়া হ’ল সেই বিষয়টো লৈয়ো প্ৰশ্ন কৰিছে একাংশই৷ মহাকাশ সংস্থা নাছাৰ বিৰুদ্ধেও উত্থাপিত হৈছে অভিযোগ৷
এই পৰিস্থিতিক লৈ নাছাই কৈছে, সুনীতা আৰু বেৰি উভতি আহিবৰ বাবে যাৱতীয় ব্যৱস্থা গ্ৰহণ কৰাত লাগিছে নাছা কিন্তু কেইটামান দিন সময় লাগিব বুলিও জনাইছে নাছাই৷ ইয়াৰ পূৰ্বেও ২০০৬ আৰু ২০১২ চনত মহাকাশ অভিযানত অংশ লৈছিল সুনীতাই৷ সকলো মিলি মুঠ ৩২২ দিন মহাকাশত থকাৰ অভিজ্ঞতা আছে তেওঁৰ৷ তেওঁ কেৱল ভাৰতীয় বংশোদ্ভূত নহয়, ভাৰতীয় সংস্কৃতিৰ সৈতেও তেওঁৰ যোগসূত্ৰ আছে৷ সুনীতা যেন নিৰাপদে পৃথিৱীলৈ উভতি আহিবৱ পাৰে তাৰ বাবে প্ৰাৰ্থনা কৰিছে প্ৰায়সংখ্যক লোকেই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
