দেশত বৃদ্ধি পাবলৈ ধৰিছে মগজু খোৱা এমিবাৰ সংক্ৰমণ, ২২ লৈ বৃদ্ধি নিহতৰ সংখ্যা
দেশত দিনে দিনে বৃদ্ধি পাবলৈ ধৰিছে এমিবাৰ সংক্ৰমণ। মগজু খোৱা এই ৰোগবিধক লৈ এতিয়া চিন্তাত চিকিৎসা বিজ্ঞানি। বৰ্তমানলৈ ৰোগবিধৰ নাই কোনো ঔষধ তথা প্ৰতিকাৰ। বৰ্তমানেও সংক্ৰমণ বহু কেইগৰাকী। এতিয়ালৈকে প্ৰাণ হেৰুৱালে ২২ গৰাকী লোকে।
সদ্যহতে কেৰালাৰ কোঝিকোডত এই মগজু খোৱা এমিবাই ১৪ বছৰীয়া এটি কিশোৰৰ প্ৰাণ কাঢ়ি নিয়ে। কিশোৰটি এটা সৰু পুখুৰীত গা ধুবলৈ গৈছিল তাৰ পিছতে এমিবা ৰোগত সংক্ৰমিত হয়। এই ৰোগক Amiebic meningoencephalitis (PAM) বুলি জনা যায়, যিটো Naegleria fowleri নামৰ এবিধ এমিবাৰ দ্বাৰা হয়।
এই এমিবা মানৱ শৰীৰত পানীৰ জৰিয়তে প্ৰৱেশ কৰে। যেতিয়া পানীৰ যোগেদি শৰীৰত উপস্থিত হয় তেতিয়া মাত্ৰ চাৰি দিনৰ ভিতৰতে ই মানুহৰ স্নায়ুতন্ত্ৰ অৰ্থাৎ মগজুত আক্ৰমণ কৰিবলৈ আৰম্ভ কৰে।
১৪ দিনৰ ভিতৰত ই মগজুত ফুলি উঠে যাৰ ফলত ৰোগীৰ মৃত্যু হয়। এইবাৰ কেৰালাত এই ৰোগত আক্ৰান্ত হৈ মৃত্যু হোৱা এইটো তৃতীয়টো ঘটনা। কিন্তু ইয়াৰ পূৰ্বেও দেশৰ বিভিন্ন চিকিৎসালয়ত এমিবিক মেনিনজো এনচেফেলাইটিছ ৰোগত আক্ৰান্ত হোৱাৰ তথ্য পোৱা গৈছে।
কেন্দ্ৰীয় চৰকাৰৰ সংহত ৰোগ চোৱাচিতা কাৰ্যসূচী (আইডিএছপি) অনুসৰি কেৰালাৰ পৰা হাৰিয়ানা আৰু চণ্ডীগড়লৈকে এতিয়ালৈকে ২২ জন লোকৰ মৃত্যু হৈছে, ইয়াৰে ২০২১ চনৰ পিছত ৬ জন লোকৰ মৃত্যু হৈছে। ২০১৬ চনত কেৰালাত প্ৰথমটো ৰোগী পোহৰলৈ আহিছিল। তেতিয়াৰ পৰা ইয়াত আঠজন ৰোগী পোৱা গৈছে আৰু আটাইকেইজনৰ মৃত্যু হৈছে।
নতুন দিল্লীস্থিত ইণ্ডিয়ান কাউন্সিল অৱ মেডিকেল ৰিচাৰ্চ (আইচিএমআৰ)ৰ তথ্য অনুসৰি ২০১৯ বৰ্ষলৈকে দেশত এই ৰোগৰ ১৭জন ৰোগী ধৰা পৰিছিল। ২০১৯ চনৰ ২৬ মে’ত হাৰিয়ানাৰ এটি আঠ মহীয়া শিশু এই ৰোগত আক্ৰান্ত ধৰা পৰিছিল।
এতিয়ালৈকে এই ৰোগ প্ৰতিৰোধৰ বাবে কোনো ঔষধ বা ভেকচিন উপলব্ধ নহয়। ইয়াৰ পিছতো ভাৰতত এতিয়ালৈকে ৭ জন ৰোগীক মৃত্যুৰ পৰা ৰক্ষা কৰা হৈছে। ইয়াৰ বাবে বিভিন্ন ধৰণৰ এন্টিবায়টিক দি চিকিৎসা কৰা হয়, যাৰ বাবে সময়মতে ৰোগ ধৰা পেলোৱাটো অতি প্ৰয়োজনীয়।
মূৰৰ বিষ, জ্বৰ, বমি আদি ইয়াৰ প্ৰাৰম্ভিক লক্ষণ, তাৰ পিছত ডিঙিৰ জঠৰতা, বিভ্ৰান্তি দৃষ্টি, ভ্ৰম বকা আৰু শেষত ক’মা। এনে লক্ষণ দেখা দিয়াৰ ১৪ৰ পৰা ১৮ দিনৰ ভিতৰত ৰোগীৰ মৃত্যু হ’ব পাৰে।
এই ৰোগ মাটিত খেলা-ধুলা কৰিলে মাটিৰ জৰিয়তে, নদী বা পুখুৰীত গা ধুলে নাক আৰু মুখৰ মাজেৰে মানুহৰ শৰীৰত প্ৰৱেশ কৰে। ই স্নায়ুৰ জৰিয়তে মগজুলৈ যায়, যাৰ ফলত মগজুৰ কলাবোৰ ফুলি উঠে আৰু তাৰ পিছত এই কলাবোৰ ধ্বংস হ’বলৈ আৰম্ভ কৰে। অৱশ্যে এই ৰোগ কৰ’ণাৰ দৰে এজনৰ পৰা আন এজনলৈ বিয়পি নাযায়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
