কেৰালাৰ ৱায়নাডত মঙলবাৰে পুৱতি নিশা হোৱা ভূমিস্খলনৰ ফলত বৰ্তমানলৈকে মৃত্যু হৈছে ৯৩গৰাকীকৈ লোকৰ৷ চাৰিঘণ্টাৰ মূৰে মূৰে তিনিবাৰকৈ হোৱা ভূমিস্খলনত বহুলোক সোমাই পৰিছে মাটিৰ তলত৷ বৰ্তমানৈলেক শতাধিক লোক মাটিৰ তলতেই আছে বুলি জনাইছে উদ্ধাৰকাৰী দলে৷ ৰাস্তা খহি যোৱাৰ বাবে কেইবাটাও অঞ্চলত উপস্থিত হ’ব পৰা নাই উদ্ধাৰকাৰী দল৷ লেথাৰিকৈ বৰষুণ হৈ থকাৰ বাবে আকাশীপথেৰে উদ্ধাৰকাৰ্য চলোৱা সম্ভৱপৰ হৈ উঠা নাই৷ যাৰবাবে মৃতকৰ সংখ্যা আৰু বৃদ্ধি হ’ব পাৰে বুলি আশংকা কৰিছে প্ৰশাসনে৷ ইতিমধ্যে বতৰবিজ্ঞান কেন্দ্ৰই জনাইছে যে আগন্তুক কেইবাঘণ্টালৈকে অব্যাহত থাকিব বৰষুণ৷ ১ আগষ্ট বৃহস্পতিবাৰ পৰ্যন্ত বৰষুণ অব্যাহত থাকিব বুলি প্ৰকাশ কৰিছে বতৰ বিজ্ঞান কেন্দ্ৰই৷ বৰষুণৰ বাবেই উদ্ধাৰকাৰ্য স্তব্ধ হ’ব পাৰে বুলিও আশংকা কৰিছে কেৰালা প্ৰশাসনে৷
ৱায়নাডৰ মেপ্পা়ড়িৰ ওচৰৰ পাহাৰীয়া এলেকাত বৰ্তমান অব্যাহত আছে উদ্ধাৰৰ কাম৷ স্থানীয় আৰক্ষী, জাতীয় বিপৰ্যয় মোকাবিলা বাহিনীৰ সদস্যই অব্যাহত ৰাখিছে উদ্ধাৰৰ কাম৷ ৰাজ্যৰ স্বাস্থ্যমন্ত্ৰী বীণা জৰ্জে এই সন্দৰ্ভত কয়, ‘আমি নৌ সেনাবাহিনীকো উদ্ধাৰৰ বাবে নমাইছো৷ বৰ্তমান পৰ্যন্ত ২৫০ গৰাকী লোকক উদ্ধাৰ কৰি নিৰাপদ স্থানলৈ স্থানান্তৰ কৰিছো৷ অস্থায়ী শিৱিৰত তেওঁলোকক ৰখা হৈছে৷ কেৰালাৰ মুণ্ডাক্কাই, ছুৰালমানা, আট্টমালা, নুলপুঝা এলেকা সকলোতকৈ বেছি ক্ষতিগ্ৰস্থ হৈছে৷ বহু ৰাস্তা খহি গৈছে৷ এখন সেঁতুও ভাঙি পৰিছে৷ যাৰবাবে বহু স্থানত এতিয়াও উদ্ধাৰকাৰী দল উপস্থিত হ’ব পৰা নাই৷ বতৰো বেয়া হৈ আছে বাবে আকাশপথেৰে উদ্ধাৰ সম্ভৱ হৈ উঠা নাই৷’
স্বাস্থ্যমন্ত্ৰী বীণাই ANIক কয়, ‘আমি উদ্ধাৰ কৰিবলৈ চেষ্টা কৰিছো৷ হেলিকপ্টাৰ অনা হৈছে৷ বেয়া বতৰৰ বাবে উদ্ধাৰত বাধা আহিছে৷ বৰ্তমানলৈকে ৭০জন আহত হৈছে৷ হাস্পতালত তেওঁলোকৰ চিকিৎসা চলি আছে৷’ ঘটনাৰ ভিডিঅ’ও প্ৰকাশ পাইছে৷ সেই ভিডিঅ’ত দেখা অনুসৰি সুদৃশ্য উপত্যকা, চাহ বাগানো চাৰখাৰ হৈ গৈছে৷ প্ৰকাণ্ড প্ৰকাণ্ড গছ বাগৰি পৰিছে৷ খেলনাৰ দৰে ভাঙি পৰিছে ঘৰ৷ বল্ডাৰ বাগৰি আহিছে পথলৈ৷ কোনো কোনো পথত বল্ডাৰ পৰি ভাঙি পৰিছে বাহন৷
কিয় এই বিপৰ্যয়? প্ৰশাসনে কৈছে, এই এলেকাত বৰষুণৰ বাবেই এই ঘটনা সংঘটিত হৈছে৷ শেষ ২৪ঘণ্টাত কেৰালাত ৩৭২ মিলিমিটাৰ বৃষ্টি হৈছে৷ বতৰ বিজ্ঞান কেন্দ্ৰই জনোৱা অনুসৰি কোনো স্থানত প্ৰতি ঘণ্টাত ১৬ ৰ পৰা ৫০ মিলি মিটাৰ বৰষুণ হ’লে তাক অতিবৃষ্টি বুলি ধৰা হয়৷ শেষ ২৪ ঘণ্টাত কেৰালাত গড়ে ১৫.৫ মিলিমিটাৰ বৃষ্টি হৈছে৷ প্ৰশাসনে ধাৰণা কৰিছে যে এই কাৰণতেই পুৱতি নিশা কেৰালাৰ ৱায়নাডৰ পাহাৰীয়া এলেকাকেইটাত এই বিপৰ্যয় আহিছে৷
কেৰালাৰ মুখ্যমন্ত্ৰী পিনাৰাই বিজয়নৰ সৈতে ফোনযোগে কথা পাতিছে প্ৰধানমন্ত্ৰী মোদীয়ে৷ সকলোধৰণৰ সাহায্যও দিয়া হ’ব বুলি আশ্বাস দিছে প্ৰধানমন্ত্ৰীগৰাকীয়ে৷ বিজেপি কৰ্মীয়ে যাতে এই পৰিস্থিতিত যাতে সহায়ৰ বাবে আগুৱাই যায় তাৰবাবে বিজেপিৰ সৰ্বভাৰতীয় সভাপতি জে পি নাড্ডাক নিৰ্দেশ দিছে প্ৰধানমন্ত্ৰীয়ে৷ প্ৰধানমন্ত্ৰী দফতৰৰ পৰা মৃতকৰ পৰিয়াললৈ ২লাখ টকাকৈ আৰ্থিক সাহায্য দিয়াৰ কথাও ঘোষণা কৰিছে প্ৰধানমন্ত্ৰী মোদীয়ে৷ আহতসকলক দিয়া হ’ব ৫০হাজাৰকৈ টকা৷
মুখ্যমন্ত্ৰীৰ আহ্বানৰ পাছতেই মুখ খুলিছে বিজেপিৰ কেন্দ্ৰীয় সভাপতি জে পি নাড্ডাই৷ তেওঁ কয়, ‘আৱদ্ধ হৈ থকা মানুহখিনিক ধ্বংসস্তুপৰ পৰা বাহিৰলৈ অনাই লক্ষ্য সকলোৰে৷ কেৰালাৰ মুখ্যমন্ত্ৰীৰ সৈতে মোদীজীৰ বাৰ্তালাপ হৈছে৷ কেন্দ্ৰ সহায়ৰ বাবে সম্পূৰ্ণৰূপে প্ৰস্তুত৷ কেন্দ্ৰীয় সংস্থাসমূহো সহায়ৰ বাবে আগুৱাই গৈছে৷ ৰাজ্য চৰকাৰৰ সৈতে সমন্বয়ৰ মাজেৰে কাম চলি আছে৷ প্ৰাথমিক লক্ষ্য দেহ উদ্ধাৰ আৰু জীৱিতসকলৰ প্ৰাণৰক্ষা৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
