আজি ৩১ জুলাই আয়কৰ জমা দিয়াৰ শেষ তাৰিখ৷ এই তাৰিখৰ ভিতৰত আয়কৰ জমা নিদিলে ভৰিব লাগিব মোটা অংকৰ জৰিমনা৷ কিন্তু এই মাহেই শেষ নহয়৷ নতুন মাহৰ আৰম্ভণিতে একাধিক নিয়মৰ পৰিবৰ্তন আহিছে৷ নাজানিলেই সমস্যাত পৰিব আপুনি৷
১ আগষ্টৰ পৰা কি কি নিয়মৰ পৰিবৰ্তন হ’ব?
HDFC বেংকৰ নিয়ম
১ আগষ্টৰ পৰা দেশৰ অন্যতম বৃহত্তম বেচৰকাৰী বেংক HDFC য়ে তেওঁলোকৰ ক্ৰেডিট কাৰ্ডৰ নিয়মত বৃহৎ পৰিবৰ্তন আনিছে৷ HDFC বেংকৰ তৰফৰ পৰা সিদ্ধান্ত লোৱা অনুসৰি এইবাৰ থাৰ্ড পাৰ্টি এপ বা তৃতীয় পক্ষৰ কোনো এপৰ মাধ্যমেৰে ক্ৰেডিট কাৰ্ডৰ লেনদেন কৰিলে তাৰ ওপৰত লেনদেনৰ চাৰ্জ ল’ব বেংকে৷ বেংকৰ তৰফৰ পৰা জনোৱা অনুসৰি ক্ৰেড, চেক, মোবিকুইক আৰু ফ্ৰিচাৰ্জৰ দৰে এপৰ মাধ্যমেৰে লেনদেন কৰিলে ১শতাংশ চাৰ্জ ধাৰ্য কৰা হ’ব৷ সৰ্বাধিক ৩০০০ টকা পৰ্যন্ত চাৰ্জ লোৱা হ’ব৷ ইয়াৰোপৰি ১৫ হাজাৰ টকাৰ লেনদেনৰ ওপৰত ১শতাংশ ছাৰ্ভিছ চাৰ্জ দিব লাগিব৷ ইয়াৰোপৰি EMIৰ ক্ষেত্ৰতো ২৯৯ টকা প্ৰছেচিং চাৰ্জ লোৱা হ’ব৷
LPG গেছৰ দাম
প্ৰতি মাহৰ আৰম্ভণিতেই তৈল বিপণনী সংস্থাসমূহে আন্তৰ্জাতিক বজাৰত পেট্ৰলিয়ামজাত পণ্যৰ দামৰ পৰ্যালোচনা কৰি LPG চিলিণ্ডাৰৰ দাম ধাৰ্য্য কৰে৷ বিগত মাহত ১৯ কিঃগ্ৰাঃ বাণিজ্যিক LPG চিলিণ্ডাৰৰ দাম কমোৱা হৈছিল৷ ১৪.২ কিঃগ্ৰাঃ এল পি জি চিলিণ্ডাৰৰো দামৰ পৰিবৰ্তন হোৱা নাছিল৷ আগন্তুক আগষ্ট মাহৰ প্ৰথমদিনা LPG চিলিণ্ডাৰৰ দাম কমিব নে বাঢ়িব সেয়া লক্ষ্যণীয় বিষয়৷
সস্তা হ’ব গুগল মেপ
১ আগষ্টৰ পৰা ভাৰতত সস্তা হ’ব গুগল মেপ পৰিসেৱা৷ এইবাৰৰ পৰা গ্ৰাহকসকলে ৭০ শতাংশ কম চাৰ্জ দিব লাগিব৷ ইয়াৰোপৰি ডলাৰৰ পৰিবৰ্তে ভাৰতীয় মুদ্ৰাতেই চাৰ্জ লোৱা হ’ব৷ সাধাৰণ ব্যৱহাৰকাৰীৰ ওপৰত কোনো চাৰ্জৰ কথা নাই৷ তেওঁলোকে কোনো চাৰ্জ দিব নালাগে৷
বেংকৰ ছুটি
আগষ্ট মাহত কেইবাটাও উল্লেখযোগ্য দিন আছে৷ যেনে স্বাধীনতা দিৱস, জন্মাষ্টমী আদি৷ এইকেইটা দিনত বন্ধ থাকিব বেংক পৰিসেৱা৷ শনি, দেওবাৰকে ধৰি এই বিশেষ দিনকেইটাক লৈ মুঠ ১৩দিন বন্ধ থাকিব বেংক পৰিসেৱা৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
