পদাৰ্থ বিজ্ঞানৰ নবেল বঁটা ঘোষণা, জন জে. হপফিল্ড আৰু জিঅ’ফ্ৰে ই হিণ্টনলৈ এই সন্মান
২০২৪ বৰ্ষৰ নোবেল বঁটাৰ পদাৰ্থ বিজ্ঞানৰ সন্মান ঘোষণা। পদাৰ্থ বিজ্ঞানৰ ক্ষেত্ৰখনৰ বঁটা মঙলবাৰে ঘোষণা কৰা হয়। ৰয়েল ছুইডিছ একাডেমী অৱ চাইন্সে জন জে. হপফিল্ড আৰু জিঅ’ফ্ৰে ই হিণ্টনলৈ এই সন্মান। কৃত্ৰিম স্নায়ু নেটৱৰ্কৰ সৈতে মেচিন লাৰ্নিং সক্ষম কৰা মৌলিক আৱিষ্কাৰ আৰু উদ্ভাৱনৰ বাবে এই বঁটা দিয়াৰ সিদ্ধান্ত লোৱা হৈছে।
ইয়াৰ পূৰ্বে সোমবাৰে ফিজিঅ’লজী বা মেডিচিনৰ ক্ষেত্ৰখনৰ বাবে এই সন্মান লাভ কৰা সকলৰ নাম ঘোষণা কৰা হয়। এইবাৰ আমেৰিকাৰ ভিক্টৰ এম্ব্ৰ’জ আৰু গেৰী ৰুভকুনক চিকিৎসা বিজ্ঞানৰ নোবেল বঁটাৰ বাবে নিৰ্বাচিত কৰা হয়। মাইক্ৰ’ আৰ এন এ আৱিষ্কাৰৰ বাবে দুয়োকে এই সন্মান দিয়া হৈছিল।
ইয়াৰ পূৰ্বে এই শিতানত যোৱা বছৰৰ অৰ্থাৎ ২০২৩ চনৰ নোবেল বঁটা যৌথভাৱে পিয়েৰ অগাষ্টিনি, ফেৰেন্স ক্ৰাউজ আৰু এন্নে ল’হুইলিয়াৰক প্ৰদান কৰা হৈছিল। এই সন্মান ইলেক্ট্ৰনৰ ওপৰত অধ্যয়নৰ বাবে দিয়া হৈছিল।
পদাৰ্থত থকা ইলেক্ট্ৰনৰ গতিবিদ্যা অধ্যয়নৰ বাবে পোহৰৰ এট’ছেকেণ্ড স্পন্দন সৃষ্টি কৰা পৰীক্ষামূলক পদ্ধতিৰ বাবে এই বঁটা প্ৰদান কৰা হয়। পদাৰ্থ বিজ্ঞানৰ এই ক্ষেত্ৰখনত ন’বেল বঁটা লাভ কৰা পঞ্চমগৰাকী মহিলা হিচাপে পৰিগণিত হয় এন্নে হুইলিয়াৰ।
২০২২ চনত পদাৰ্থ বিজ্ঞানৰ নোবেল বঁটা এলেন এস্পেক্ট, জন এফ ক্লাউজাৰ আৰু এণ্টন জেইলিংগাৰক যৌথভাৱে প্ৰদান কৰা হয়। এলেন এস্পেক্ট ফৰাচী পদাৰ্থবিজ্ঞানী, জন এফ ক্লাউজাৰ আমেৰিকাৰ বিজ্ঞানী আৰু এণ্টন জেইলিংগাৰ অষ্ট্ৰিয়াৰ বিজ্ঞানী। এই বিজ্ঞানীসকলৰ পৰীক্ষা-নিৰীক্ষাৰ ফলত কোৱাণ্টাম তথ্যৰ ওপৰত ভিত্তি কৰি নতুন প্ৰযুক্তিৰ পথ প্ৰশস্ত হৈছিল।
৭ অক্টোবৰৰ পৰা আৰম্ভ নৱেল বঁটাৰ সন্মান। চিকিৎসা বিজ্ঞানৰ নোবেল বঁটাৰ পৰাই আৰম্ভ হৈছিল নোবেল বঁটাৰ ঘোষণা। এই কথা কালি ৭ অক্টোবৰ অৰ্থাৎ সোমবাৰে ঘোষণা কৰা হৈছিল। ইয়াৰ পিছত ৮ অক্টোবৰ মঙলবাৰে পদাৰ্থ বিজ্ঞানৰ নোবেল বঁটা ঘোষণা কৰা হয়। এতিয়া বুধবাৰে ৰসায়ন বিজ্ঞানৰ ক্ষেত্ৰত আৰু বৃহস্পতিবাৰে সাহিত্যৰ ক্ষেত্ৰত নোবেল বঁটা বিজয়ীৰ নাম ঘোষণা কৰা হ’ব। ইয়াৰ উপৰিও শুকুৰবাৰে শান্তিৰ নোবেল বঁটা ঘোষণা কৰা হ’ব আৰু ১৪ অক্টোবৰত অৰ্থনীতিৰ ক্ষেত্ৰত এই বঁটা বিজয়ীক ঘোষণা কৰা হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
