মহিলা এছিয়ান চেম্পিয়নছ ট্ৰফীত ভাৰতীয় হকী দলৰ সাফল্য, বিজয়ৰ হেট্ৰিক দলটোৰ
মহিলা এছিয়ান চেম্পিয়নছ ট্ৰফীত আয়োজক ভাৰতৰ আধিপত্য অব্যাহত আছে। তৃতীয়খন মেচত থাইলেণ্ডক ১৩-০ গ’লত পৰাস্ত কৰি জয়ৰ হেট্ৰিক সম্পূৰ্ণ কৰে টিম ইণ্ডিয়াই। অকলেই পাঁচটা গ’ল দি ভাৰতৰ এই জয়ত গুৰুত্বপূৰ্ণ ভূমিকা পালন কৰিছিল দীপকা ঠাকুৰে।
থাইলেণ্ডৰ দলটোৱে ভাৰতীয় মহিলা দলৰ সন্মুখত একেবাৰেই মূৰ তুলি উঠিব নোৱাৰে। ভাৰতীয় খেলুৱৈসকলে এই খেলখন সম্পূৰ্ণ একপক্ষীয় কৰি ১৩ টা গল দি বিপক্ষক এটাও গল দিবলৈ সুযোগ নিদি জয়ী হয়।
ভাৰতৰ হৈ দীপিকাই ৫টা গ’ল কৰে ক্ৰমে ৩, ১৯, ৪৩, ৪৫ আৰু ৪৫ মিনিটত। আনহাতে প্ৰীতি ডুবে ৯ মিনিট আৰু ৪০ মিনিটত, লালৰেমছিয়ামী ১২ আৰু ৫৬ মিনিটত আৰু মনীষা চৌহানে ৫৫ আৰু ৫৮ মিনিটত দুটাকৈ গ’ল দিয়ে। বিউটি ডুং ডুং ৩০ মিনিটত আৰু নৱনীত কৌৰে ৫৩ মিনিটত এটাকৈ গ’ল দি দলৰ স্কোৰ ১৩ লৈ লৈ যায়।
ইয়াৰ পূর্বে ভাৰতীয় দলটোৱে প্রথমখন খেলত মালয়েছিয়াক পৰাস্ত কৰি জয়েৰে প্রতিযোগিতাখন আৰম্ভ কৰিছিল৷ ভাৰতে মালয়েছিয়াক ৪-০ গ’লত পৰাস্ত কৰিছিল।
তাৰ পাছত ভাৰতীয় মহিলা হকী দলটোৱে দ্বিতীয়খন মেচত দক্ষিণ কোৰিয়াক ৩-২ গ’লত পৰাস্ত কৰে। আৰি কালি তৃতীয়খন খেলত ১৩-০ ব্যৱধানত জয়ী হয়। বৰ্তমানে প্ৰশিক্ষক হৰেন্দ্ৰ সিঙৰ তত্বাৱধানত এই প্ৰতিযোগিতাত ভাৰতীয় মহিলা দলটোৱে সুদক্ষতাৰে খেলি গৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
