ৰতন টাটাৰ নতুন উইলত ৰান্ধনীলৈ ১ কোটি, কুকুৰৰ বাবেও বহু লাখ
বিগত বৰ্ষৰ অক্টোবৰ মাহত ৰতন টাটাৰ দেহাৱসান ঘটে। কিন্তু বৰ্তমানেও তেখেতৰ উদাৰতাৰ কাহিনী বিশেষভাৱে চৰ্চিত হৈয়েই আছে। এতিয়া তেওঁৰ উইল তথা শেষ ইচ্ছাৰ পৰা ইটোৰ পিছত সিটোকৈ নতুন তথ্য প্ৰকাশ হৈ আছে।
ৰতন টাটাৰ উইল ২০২২ চনৰ ২৩ ফেব্ৰুৱাৰীত লিখা হৈছিল। সেই উইলত টাটাই ঘৰুৱা কৰ্মচাৰী, কাৰ্যালয়ৰ কৰ্মচাৰী, বন্ধু-বান্ধৱী আনকি পোহনীয়া কুকুৰৰ বাবেও সম্পত্তি এৰি থৈ গৈছে।
টাটাই কেৱল নিজৰ ঘনিষ্ঠসকলক আৰ্থিক সহায় দিয়াই নহয়, তেওঁলোকে টাটাৰ পৰা লোৱা সকলো ঋণ ৰেহাই দিবলৈও নিৰ্দেশ দিছে।
ৰতন টাটাই নিজৰ ঘৰ আৰু কাৰ্যালয়ৰ কৰ্মচাৰীৰ বাবে প্ৰায় ৩.৫ কোটি টকা এৰি থৈ গৈছে। ইয়াৰ ভিতৰত তেওঁৰ দীৰ্ঘদিনীয়া ৰান্ধনী ৰাজন শ্ব’ক ১ কোটি টকাৰ লগতে ৰাজনে লোৱা ৫১ লাখ টকাৰ ঋণ ৰেহাই দিছে।
বাটলাৰ চুববাইয়া ক’নাৰক ৬৬ লাখ টকা, ৩৬ লাখ টকাৰ ঋণ ৰেহাই সহ আৰু চালক ৰাজু লিয়নক ১৯.৫ লাখ টকা, ১৮ লাখ টকাৰ ঋণ ৰেহাইসহ দি থৈ গৈছে।
ইয়াৰ উপৰিও তেওঁৰ সম্পাদক ডেলনাজ গিল্ডাৰক ১০ লাখ টকা, টাটা ট্ৰাষ্টৰ পৰামৰ্শদাতা হোছি ডি মালেছাৰাক ৫ লাখ টকা, আলিবাউগ বাংলোৰ কেয়াৰটেকাৰ দেৱেন্দ্ৰ কাটমোল্লুক ২ লাখ টকা, ব্যক্তিগত সহায়ক দীপ্তি দিবাকৰনক ১.৫ লাখ টকা দি থৈ গৈছে।
এই সকলোবোৰৰ উপৰি পোহনীয়া কুকুৰ টিটোৰ বাবেও টাটাই নিজৰ নামৰ সম্পত্তি দি থৈ গৈছে। উইলত লিখা অনুসৰি ৰতন টাটাৰ জাৰ্মান শ্বেফাৰ্ড কুকুৰ টিটোৰ নামত টাটাই ১২ লাখ টকা দি থৈ গৈছে। এই ধনৰ পৰা প্ৰতি ত্ৰিমাসিকত ৩০ হাজাৰ টকাৰ ব্যৱস্থা কৰা হৈছে আৰু টিটোৰ যত্ন লোৱাৰ দায়িত্ব ৰান্ধনী ৰাজন শ্ব’ক দিয়া হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
