বিগত দিনত জন্মনিয়ন্ত্ৰক ঔষধ বা কনট্ৰাছেপ্টিভ পিল কেৱল মহিলাৰ বাবেই আছিল আৰু মহিলায়েই এই ঔষধ সেৱন কৰিছিল৷ সেই নিয়মৰ এইবাৰ সলনি ঘটিব৷ বজাৰত শীঘ্ৰেই উপলব্ধ হ’ব পুৰুষ কনট্ৰাছেপ্টিভ পিল৷ জন্ম নিয়ন্ত্ৰণৰ বাবে আৰু পুৰুষে অন্য পন্থা লোৱাৰো প্ৰয়োজন নাথাকিব৷ এটা পিলতেই দূৰ হ’ব সমস্যা৷ এই ঔষধ খালে পুৰুষত্ব কমি যাব বুলি বহু পুৰুষৰ মনলৈ চিন্তা আহিছিল যদিও সেই চিন্তাও দূৰ কৰিছে গৱেষকে৷ গৱেষকে জনাইছে যে সাময়িকভাৱে শুক্ৰাণু উৎপাদন বন্ধ কৰি জন্ম নিয়ন্ত্ৰণত সহায় কৰাহে এই পিলৰ উদ্দেশ্য৷ এই ঔষধে পুৰুষত্বত কোনো ক্ষতি নকৰে৷
অসুৰক্ষিত যৌন মিলনৰ পাছতেই সন্তানধাৰণৰ সম্ভাৱনা কমাবলৈ মহিলাসকলে সংগমৰ প্ৰায় ৭২ ঘণ্টাৰ ভিতৰত গৰ্ভনিৰোধক ঔষধ খায়৷ এই ধৰণৰ ঔষধ খালে গৰ্ভধাৰণৰ সম্ভাৱনা ৯০শতাংশ কমি যায়৷ এইবাৰ পুৰুষৰ বাবেও সেই ব্যৱস্থা অনা হৈছে৷ নিউয়ৰ্কৰ কলম্বিয়া ইউনিভাৰ্ছিটি আৰু ইউৰচয়েছ থেৰাপিউটিক্স নামৰ এগৰাকী বায়োফাৰ্মাচিউটিকেল কোম্পানীয়ে যৌথভাৱে পুৰুষৰ জন্মনিৰোধক পিলক লৈ গৱেষণা কৰিছে৷ জনা গৈছে, পুৰুষ এন্দুৰ বা বান্দৰৰ ওপৰত পৰীক্ষা সফল হোৱাৰ পাছত নিউয়ৰ্কৰ বহু মানুহৰ শৰীৰতেই ঔষধটিৰ কাৰ্যকাৰিতা পৰীক্ষা কৰা হয়৷ জন্ম নিয়ন্ত্ৰণৰ বাবে পুৰুষে ভাছেক্টমিৰ সহায় লৈছিল৷ এই পিলটোৰ পৰা উপকৃতৰ হোৱা বুলি দাবী কৰিছিল৷ মানুহৰ শৰীৰৰ পৰীক্ষাত ৯৯ শতাংশ সফল হৈছে বুলি দাবী কৰিছে নিউয়ৰ্কৰ বিজ্ঞানীসকলে৷ এই গৱেষণাৰ খবৰ নেচাৰ মেডিচিন জাৰ্নেলত প্ৰকাশ কৰা হৈছে৷
ঔষধবিধৰ নাম হৈছে ৱাইচিটি-৫২৯৷ কোনো ধৰণৰ হৰমণ দি এই ঔষধ তৈয়াৰ কৰা হোৱা নাই৷ ইয়াৰ কোনো পাৰ্শ্বপ্ৰতিক্ৰিয়া নাই বুলিয়েই দাবী কৰিছে গৱেষকে৷ গৱেষণাগাৰত এন্দুৰ আৰু বান্দৰৰ ওপৰত তিনি পৰ্যায়ৰ ট্ৰায়েল কৰি দেখা গৈছে যে এন্দুৰক ঔষধ খুওৱাৰ পাছৰ চাৰি সপ্তাহৰ মাজত জন্ম নিয়ন্ত্ৰণ হৈচে আৰু বান্দৰৰ ক্ষেত্ৰত কাম হৈছে এসপ্তাহলৈ৷ পুৰুষৰ ক্ষেত্ৰত এই জন্মনিয়ন্ত্ৰক ঔষধৰ কাম হৈছে সাময়িকভাৱে শুক্ৰাণুৰ সংখ্যা কমাই তোলা৷ অৰ্থাৎ শুক্ৰাণুৰ উৎপাদন সাময়িকভাৱে কমাই দিয়া বা বন্ধ কৰি দিয়া৷ ঔষধ খোৱা বন্ধ কৰিলে আকৌ কেইটামান দিনৰ ভিতৰতেই স্বাভাৱিকভাৱে শুক্ৰাণু উৎপাদন হ’ব৷ ঔষধ খালে পুৰুষত্বৰ কোনো ক্ষতি হ’ব নেকি সেই বিষয়ত কি মত বিজ্ঞানীৰ?
এটা সময় আছিল যেতিয়া জন্মনিয়ন্ত্ৰণৰ বাবে নাৰীৰ ওপৰতেই প্ৰয়োগ কৰা হৈছিল বিভিন্ন ঔষধ৷ কিন্তু সময় সলনি হৈছে৷ সময়ৰ সৈতে সলনি হৈছে দৃষ্টিভংগীও৷ ভাছেক্টমি বেছ পৰিচিত হৈ উঠিছে সমাজৰ নানান স্তৰত৷ পুৰুষৰ জন্মনিৰোধক ঔষধ আহিলে সমাজত তাৰ কি প্ৰভাৱ পৰিব সেই বিষয়ক লৈ পূৰ্বেও বহু তৰ্কবিতৰ্ক হৈছে৷ অধিকাংশই ভাৱিছে যে মহিলাসকলৰ দৰে তেওঁলোকেও যদি জন্মনিৰোধক ঔষধ খোৱা আৰম্ভ কৰে তেতিয়া পুৰুষত্বই হয়তো নাথাকিব৷ গৱেষকে জনাইছে যে এই ধৰণৰ কোনো সমস্যাই নহয়৷ বৰং জন্ম নিয়ন্ত্ৰণৰ ওপৰিও যৌনৰোগ নিয়ন্ত্ৰণত সহায় কৰিব এই ঔষধে৷ সকলো ঠিকে থাকিলে চিকিৎসাবিজ্ঞানৰ ইতিহাসত এক যুগান্তকাৰী আৱিষ্কাৰেই হ’ব এই ঔষধ৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
