আহমেদিয়া সম্প্ৰদায়ৰ ওপৰত নিষেধাজ্ঞা জাৰি কৰিলে পাকিস্তান চৰকাৰে৷ পঞ্জাৱ প্ৰদেশৰ এই সম্প্ৰদায়ক ঈদ পালন কৰিবলৈ মানা কৰিছে আৰক্ষীয়ে৷ আনকি ঘৰৰ ভিতৰতো ঈদ পালন কৰিব নোৱাৰিব বুলি জনাই দিছে পাক আৰক্ষীয়ে৷ পাকিস্তানৰ পঞ্জাৱ প্ৰদেশৰ আৰক্ষীয়ে আহমেদিয়া সম্প্ৰদায়ৰ মানুহক বিশেষ কাগজত ছহী কৰাই লৈছে যাতে তেওঁলোকে কোনো ঈদৰ আচাৰ-অনুষ্ঠান পালন নকৰে৷ সেয়া নামানিলে পাঁচ লাখ টকা পৰ্যন্ত জৰিমনা বিহাৰ কথাও স্পষ্টকৈ জনাই দিয়া হৈছে৷
সেই দেশৰ স্থানীয় সংবাদমাধ্যম ডন ৰ প্ৰতিবেদন অনুসৰি পঞ্জাৱ আৰু সিন্ধু প্ৰদেশৰ কেইবাখনো জিলাত প্ৰশাসনে আহমেদিয়া সম্প্ৰদায়ৰ সদস্যসকলক আটক কৰিছে আৰু তেওঁলোকক ঈদ উদযাপন নকৰাৰ প্ৰতিশ্ৰুতিও আদায় কৰি কাগজত স্বাক্ষৰ কৰিবলৈ বাধ্য কৰোৱা হৈছে৷ নিয়ম লংঘনত মোটা জৰিমনা বিহাৰ কথাও জনাই দিয়া হৈছে৷ কিছু ক্ষেত্ৰত ক্ষতিপূৰণো দাবী কৰা হৈছে৷
পাকিস্তানৰ আহমেদিয়া সম্প্ৰদায়ৰ ২০ লাখতকৈ বেছি মানুহে দীৰ্ঘদিন ধৰি নিয়মতান্ত্ৰিক নিৰ্যাতনৰ সন্মুখীন হৈ আছে৷ ১৯৭৮ চনত এক সাংবিধানিক সংশোধনীয়ে আহমেদিসকলৰ অমুছলমান ঘোষণা কৰে আৰু ১৯৮৪ চনত এখন অধ্যাদেশেৰে তেওঁলোকৰ ধৰ্মীয় ৰীতিনীতিক নিষিদ্ধ হিচাপে ঘোষণা কৰে৷ যাৰ মাজত আছে ইছলামিক শুভেচ্ছা জনোৱা, মছজিদক উপাসনালয় হিচাপে বিবেচনা কৰা আৰু কোৰান পঢ়া৷
এমেনেষ্টি ইণ্টাৰনেশ্ব্যনেলৰ মতে কেৱল ২০২৪ চনৰ জুন মাহত পঞ্জাৱত ঈদ পালন কৰাৰ অভিযোগত নিৰ্বিচাৰে গ্ৰেপ্তাৰ কৰা হৈছিল বহুজনক৷ ২০২৪ চনৰ মাৰ্চ মাহত খুচাবে কট্টৰপন্থী তেহৰিক ই লাব্বাইক পাকিস্তানৰ কৰ্মীয়ে প্ৰায় ১০০ টা আহমেদি কবৰ নষ্ট কৰিছিল৷ সম্প্ৰতি লাহোৰ হাইকৰ্টে বাৰে এছচিয়েছন পঞ্জাৱৰ আৰক্ষীক চিঠি লিখি আহমেদিসকলৰ বিৰুদ্ধে ব্যৱস্থা লোৱাৰ আবেদন জনাইছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
