দুচকুত যুৰীয়া সপোন, বিবাহৰ পাছত প্ৰথমবাৰ স্বামীৰ কাষলৈ যাবলৈ আহোতেই সকলো শেষ, স্বামীক লগ পোৱাৰ সপোন বুকুত লৈয়েই অভিশপ্ত বিমানত ছাই হ’ল নববিবাহিতা খুছবু

যুৰীয়া সপোন বুকুত, প্ৰিয়জনৰ কাষলৈ হেঁপাহেৰে উৰা মাৰিবলৈ সাজু হৈছিলহে৷ স্বামীক লগ পাবলৈ প্ৰথমবাৰৰ বাবে লণ্ডনলৈ যাবলৈ ওলাইছিল খুছবু ৰাজপুৰোহিত৷ আহমেদাবাদৰ পৰা ব্ৰিটেইনলৈ বুলি তেওঁৱো উঠিছিল এয়াৰ ইণ্ডিয়াৰ AI-171 বিমানত৷ কিন্তু বিমানে ৰানৱে এৰাৰ মাত্ৰ ২ মিনিটৰ পিছতেই সকলো শেষ৷ বিমান দুৰ্ঘটনাত নিহত ২৪২ গৰাকী যাত্ৰীৰ মাজত নাম প্ৰকাশ সদ্যবিবাহিত খুছবুৰো৷

ৰাজস্থানৰ বালোতাৰা জিলাৰ আৰাবা গাওঁৰ বাসিন্দা খুছবু৷ এই বছৰৰ জানুৱাৰীতেই মনফুল সিংহৰ সৈতে তেওঁ বিয়া কৰাইছিল৷ তেওঁৰ স্বামী লণ্ডনত থাকে৷ বিবাহৰ পাছত প্ৰথমবাৰ তেওঁৰ স্বামীক লগ কৰিবলৈ যাবলৈ ওলাইছিল৷ অভিশপ্ত বৃহস্পতিবাৰৰ দুপৰীয়া আহমেদাবাদ সৰ্দাৰ বল্লভভাই পেটেল বিমানবন্দৰৰ পৰা উৰণৰ পাছতেই ভয়াৱহ বিমান দুৰ্ঘটনাটো ঘটে৷ এই দুৰ্ঘটনাত মৃত্যু হৈছে ২৪২ জন যাত্ৰীৰ৷ যি এলেকাত বিমানখন পৰিছে সেয়া এখন চিকিৎসা মহাবিদ্যলয়ৰ ছাত্ৰ আৱাস৷ সেই আৱাসত থকা ৫০জনতকৈ অধিক ছাত্ৰই প্ৰাণ হেৰুৱাইছে৷ মৃতকৰ প্ৰকৃত সংখ্যা অৱশ্যে এতিয়াও সঠিককৈ জানিব পৰা হোৱা নাই৷

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ