‘আৰু সহ্য নহয়, মই আপোনাৰ ওপৰত বোজ হ’ব নিবিচাৰো’- জীৱনৰ শেষ ৭ টা হোৱাটছএপ বাৰ্তা ৰিধান্যাৰ
বিয়া হোৱাৰ পাছত নতুন সংসাৰ লৈ বহু সপোন দেখে বহু ছোৱালীয়ে। কিন্তু ভাৰতীয় বিয়াৰ আজি পৰ্যন্ত অন্ত নপৰা যৌতুক প্ৰথাৰ বিৰুদ্ধে হাৰ মাৰি শেষত নিজকে শেষ কৰি দিয়াৰ ঘটনাই বাৰে বাৰে দখল কৰি আহিছে শিৰোনাম।
এফালে যদি পৰকীয়া প্ৰেমৰ বাবে পত্নীৰ স্বামীক হত্যা, আনফালে আকৌ যৌতুকৰ বাবে স্বামীৰ অত্যাচাৰ সহিব নোৱাৰি পত্নীৰ আত্মহত্যা।
এইবাৰ তামিলনাডুৰ পৰা পোহৰলৈ আহিছে এক অতিকে শোকাৱহ ঘটনা। বিবাহৰ মাথো ২ টা মাহৰ পাছতে জীৱন শেষ কৰি দিয়া ৰিধান্যাই। স্বামীৰ আৰু শাহু-শহুৰৰ মানসিক আৰু শাৰিৰীক অত্যাতাৰ সহিব নোৱাৰি বাচি লয় চূড়ান্ত সিদ্ধান্ত।
ঘটনা সন্দৰ্ভত জানিব পৰা অনুসৰি ৰিধান্যাৰ পিতৃয়ে আঢ়ৈ কোটি টকা খৰচ কৰি কন্যা ৰিধান্যাৰ বিবাহ কবিন কুমাৰৰ সৈতে সম্পন্ন কৰিছিল। বিবাহত কবিন কুমাৰৰ পৰিয়ালে চৰ্ত ৰাখিছিল ৩০০ সোণৰ মুদ্ৰা, বিলাসী বাহন আৰু বহুতো কিবা কিবি।
ৰিধান্যাৰ পিতৃয়ে চৰ্ত সাপেক্ষে জোঁৱাই কবিন কুমাৰৰ হাতত তুলি দিছিল ৭০ লাখ টকীয়া বিলাসী বাহন। কিন্তু কিছু অৰ্থৰ অভাৱত ৩০০ সোণৰ মুদ্ৰাৰ সলনি দিছিল ১০০ মুদ্ৰা। লগতে কৈছিল কিছু দিনৰ ভিতৰতে অন্য় ২০০ মুদ্ৰা কবিনৰ হাতত দিব।
কিন্তু বিয়া হৈ যোৱাৰ পাছত ১০ দিনৰ পাছৰে পৰা কবিনে পত্নী ৰিধান্যাৰ ওপৰত অত্যাচাৰ আৰম্ভ কৰে। সহ্য কৰিব নোৱাৰি ১৫ দিনৰ দিনা পিতৃ ঘৰলৈ উভতি আহে, কিন্তু শাহুৱে পুনৰ আহি উভতাই নিয়ে ৰিধান্যাক।
কিন্তু উভতাই নিয়াৰ পাছত আৰু অধিক মানসিক আৰু শাৰীৰিক অত্যাচাৰ আৰম্ভ হয় ৰিধান্যাৰ ওপৰত। সেয়ে শেষত মন্দিৰলৈ যাম বুলি ঘৰৰ পৰা ওলাই আহি বিষ পান কৰে ৰিধান্যাই। কিন্তু বিষ পানৰ পূৰ্বে হোৱাটছএপত পিতৃলৈ বুলি প্ৰেৰণ কৰি জীৱনৰ ৭ টা শেষ বাৰ্তা।
সেই ৭ টা বাৰ্তাতেই ৰিধান্যাই লিখি যায় স্বামী আৰু পৰিয়ালৰ অত্যাচাৰৰ কথা। লগতে লিখে ঘৰলৈ উভতি গৈ পিতৃৰ ওপৰত পুনৰ বোজা হ’ব নিবিচাৰে।
এই সমস্ত কথা পোহৰলৈ অহাৰ পাছতে আৰক্ষীৰ কাষ চাপে দুৰ্ভগীয়া পিতৃ। আৰক্ষীয়ে সকলো প্ৰমাণৰ ভিত্তিত আটক কৰে অভিযুক্ত পৰিয়ালক।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
