উত্তৰপ্ৰদেশৰ ঔশানেশ্বৰ মহাদেৱ মন্দিৰত দুৰ্ঘটনা। হঠাৎ বিদ্যুতৰ তাঁৰ চিঙি পৰিছে তীৰ্থযাত্ৰীৰ ওপৰত। পূজা কৰিবলৈ আহি প্ৰাণ হেৰুৱাইছে বহুজনে। বিশৃঙ্খল পৰিস্থিতিৰ সৃষ্টি হৈছে মন্দিৰত। বিদ্যুৎস্পৃষ্ট হোৱাৰ পাছতেই তীৰ্থযাত্ৰীৰ মাজত দৌৰাদৌৰি আৰম্ভ হয়। ফলত পদপিষ্টৰ দৰে ভয়াৱহ পৰিস্থিতিৰ সৃষ্টি হয়। এই ঘটনাত অন্তত দুজন লোকৰ মৃত্যু হৈছে। আহত হৈছে কেইবাজনো লোক।
উত্তৰপ্ৰদেশৰ বাৰাবংকী জিলাৰ হায়দৰগড়ত ঔশানেশ্বৰ মহাদেৱ মন্দিৰ তীৰ্থযাত্ৰীৰ মাজত খুবেই জনপ্ৰিয়। শাওন মাহত এই মন্দিৰত অগণন ভক্তই ভীৰ কৰে। সোমবাৰে পুৱতি নিশাৰে পৰা এই মন্দিৰত ভক্তৰ ভিৰ দেখা গৈছিল। সোমবাৰে মহাদেৱৰ বিশেষ পূজা উপলক্ষে মন্দিৰত অন্য় দিনতকৈ তুলনামূলকভাৱে ভিৰ বেছি হৈছিল। স্থানীয় সূত্ৰৰ খবৰ অনুসৰি পুৱতি নিশা ৩ বজাত এই শোকাৱহ ঘটনা সংঘটিত হৈছে।
জিলাপ্ৰশাসন শশাংক ত্ৰিপাঠীয়ে সংবাদ সংস্থা পিটিআইক কয়, তীৰ্থযাত্ৰীয়ে মন্দিৰলৈ পূজা দিবলৈ গৈছিল। সেই সময়তেই হঠাৎ এটা বান্দৰে বিদ্যুতৰ তাঁৰৰ ওপৰত জপিয়াই পৰে। ফলত তাঁৰ ছিঙি মন্দিৰৰ ছাউনীৰ ওপৰত পৰে। সেই স্থানত কাৰেণ্ট বিয়পি পৰে। কাৰেণ্ট লাগি এজন আহত হৈছে। প্ৰত্যক্ষদৰ্শীয়ে জনাইছে যে মন্দিৰত তেতিয়া মহাদেৱৰ জলাভিষেক চলিছিল। টিনৰ ছালত তলত বহুজন থিয় হৈ আছিল। হঠাৎ প্ৰচণ্ড শব্দ হয় লগে লগেই বহুজনে বিদ্যুতৰ শ্বক অনুভৱ কৰে। আহতসকলক উদ্ধাৰ কৰি হাস্পতালত ভৰ্তি কৰোৱা হয়। তাতেই লগে লগে দুজন লোকে মৃত্যুক সাবটি লৈছে।
উত্তৰপ্ৰদেশৰ মুখ্যমন্ত্ৰী যোগী আদিত্যনাথে এই ঘটনাক লৈ দুখপ্ৰকাশ কৰিছে। মৃতকৰ পৰিয়ালৰ প্ৰতি সমবেদনাও জনাইছে বহুজনে। চৰকাৰৰ উচ্চপদস্থ কেইবাগৰাকীও বিষয়া সেই স্থানত উপস্থিত হৈ তাৎক্ষনিকভাৱে উদ্ধাৰৰ কাম আৰম্ভ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
