বৰ্তমান বহু মহিলাই ৩৫ বছৰ বয়সৰ পাছত মাতৃত্বৰ সিদ্ধান্ত লয়৷ কেৰিয়াৰ, আৰ্থিক স্থিতি, নিজৰ দৰে জীৱন সজাই লোৱাৰ কাৰণে নানান কাৰণত দেৰিকৈ মাতৃ হোৱাৰ প্ৰৱণতা বাঢ়িছে৷ বেছি বয়সত সন্তানধাৰণৰ সিদ্ধান্ত ল’লে কেইবাটাও বিষয়ত যত্ন লোৱা জৰুৰী৷ কেনেকৈ হ’বলগীয়া মাতৃসকল সতৰ্ক হ’ব?
মহিলাৰ শৰীৰত ডিম্বানুৰ সংখ্যা জন্মৰ পৰাই নিৰ্দিষ্ট থাকে আৰু বয়স বঢ়াৰ লগে লগে অৱশ্যে কমি থাকে৷ ৩৫ৰ পাছত ডিম্বাণুৰ গুণমানো কমিবলৈ আৰম্ভ কৰে৷ ফলত গৰ্ভধাৰণত সময় লাগিব পাৰে আৰু কিছু ক্ষেত্ৰত জেনেটিক সমস্যাৰ আশংকাও বাঢ়ে৷
৩৫ৰ পাছত মাতৃ হোৱা অসম্ভৱ এই ভাৱনা মুঠেও ঠিক নহয়৷ বহু নাৰীয়েই এই বয়সত স্বাভাৱিকভাৱে গৰ্ভধাৰণ কৰি সুস্থ সন্তান জন্ম দিছে৷ ৩৫ৰ পাছত কোনোৱে যদি সন্তান লোৱাৰ চেষ্টা কৰে আৰু ৬ মাহৰ ভিতৰত গৰ্ভধাৰণ নহয় তেতিয়া দেৰি নকৰি বিশেষজ্ঞৰ পৰামৰ্শ লোৱা উচিত৷ পৰীক্ষাৰ মাধ্যমেৰে ডিম্বাশয়ৰ অৱস্থা, হৰমনৰ ভাৰসাম্য, জৰায়ুৰ স্বাস্থ্য যেনেকৈ চোৱাটো জৰুৰী তেনেকৈ সংগীৰ শুক্ৰাণুৰ গুণমানো পৰীক্ষা কৰাটো প্ৰয়োজন৷ কাৰণ বন্ধ্যাত্বৰ ক্ষেত্ৰত পুৰুষৰ ভূমিকা প্ৰায় ৪০ৰ পৰা ৫০ শতাংশ৷
৩৫ৰ পাছত গৰ্ভধাৰণত কিছু সমস্যা থাকে৷ যেনেকৈ গৰ্ভকালীন ডায়বেটিছ, উচ্চ ৰক্তচাপ, থায়ৰয়েড সমস্যা, গৰ্ভপাতৰ সম্ভাৱনা আৰু ডাউন চিনড্ৰোমৰ দৰে ক্ৰোমোজোমজনিত সমস্যা৷ আধুনিক চিকিৎসাত নিয়মিত পৰীক্ষা আৰু পৰ্যবেক্ষণৰ মাধ্যমেৰে এই আশংকা নিয়ন্ত্ৰণত ৰখা সম্ভৱ৷
গৰ্ভধাৰণৰ পূৰ্বৰে পৰাই শৰীৰক প্ৰস্তুত কৰা খুবেই গুৰুত্বপূৰ্ণ৷ সুষম খাদ্য খোৱা, নিয়মিত ব্যায়াম, পৰ্যাপ্ত টোপনি আৰু মানসিক চাপ কম ৰখা৷ এই অভ্যাসসমূহে প্ৰজনন ক্ষমতা বঢ়োৱাত সহায় কৰে৷ ইয়াৰোপৰি ধূমপান, এলক’হল আৰু অতিৰিক্ত কেফেইন এৰাই চলা উচিত৷ বহু ক্ষেত্ৰত চিকিৎসকে পূৰ্বৰে পৰা ফলিক এছিড খোৱাৰ পৰামৰ্শ দিয়ে৷
যদি স্বাভাৱিকভাৱে গৰ্ভধাৰণত সমস্যা হয় তেতিয়া আধুনিক চিকিৎসাত একাধিক বিকল্প আছে৷ যেনে অভুলেছন ইনডাকছন, আই ইউ আই আৰু আই ভি এফৰ দৰে পদ্ধতিয়ে বহু দম্পতিক নতুন আশা দিছে৷ আজনি জেনেটিক পৰীক্ষাৰ মাধ্যমেৰেও আগেভাগে কিছু সমস্যা ধৰা পেলোৱা সম্ভৱ৷
যিসকলৰ ঋতুস্ৰাৱ অনিয়মিত, পিচিঅএছ, থাইৰয়েড, এণ্ডোমেট্ৰিউচিছ বা পূৰ্বে গৰ্ভপাতৰ ইতিহাস আছে তেওঁলোকে পূৰ্বৰে পৰাই চিকিৎসকৰ পৰামৰ্শ লোৱা উচিত৷ অৰ্থাৎ ৩৫ৰ পাছত মাতৃত্ব মানেই সমস্যা ঠিক তেনে নহয়৷ সঠিক সময়ত পৰিকল্পনা, সচেতনতা আৰু চিকিৎসাৰ সহায়ত এই পথো নিৰাপজ আৰু সফল হব পাৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
