ক্ৰুইড অইলৰ দাম বৃদ্ধিৰ ওপৰিও হৰমুজ প্ৰণালী বন্ধ হোৱাৰ আশংকাত তেল আমদানিত যথেষ্ট প্ৰভাৱ পৰিছে৷ যুদ্ধ পৰিস্থিতিত বাঢ়ি থকা সমস্যাৰ মাজত চৰকাৰে তেল সংস্থাসমূহক ডাঙৰ স্বস্তি দি পেট্ৰল-ডিজেলৰ ওপৰত এক্সাইজ শুল্ক কমাই দিছে৷ ইৰানক কেন্দ্ৰ কৰি তৈয়াৰ হোৱা সংঘাতৰ কাৰণে বিশ্বৰ বিভিন্ন দেশত ইন্ধন সংকটে দেখা দিছে৷ পাকিস্তান, চীন, শ্ৰীলংকা, বাংলাদেশসহ বহু দেশে পেট্ৰল ডিজেলৰ দাম বঢ়াই দিছে৷ যাৰ ফলত মূল্যবৃদ্ধিৰ চাপ পৰিছে জনতাৰ ওপৰত৷
ভাৰত চৰকাৰে তেল সংস্থাসমূহৰ ওপৰত চাপ কমাবলৈ এক্সাইজ শুল্কত ৰেহাই দিছে৷ যাতে পেট্ৰল ডিজেলৰ দাম বঢ়োৱাৰ প্ৰয়োজন নহয়৷ আন্তৰ্জাতিক বজাৰত কেঁচা তেলৰ দাম বেৰেলে প্ৰতি ৭০ ডলাৰৰ পৰা বাঢ়ি হৈছে ১০৭ ডলাৰ৷ তেলৰ দাম বঢ়াৰ ফলত তেল সংস্থাসমূহত প্ৰতি লিটাৰ পেট্ৰলত প্ৰায় ২৪ টকা আৰু ডিজেলত প্ৰায় ৩০ টকা পৰ্যন্ত ক্ষতি হৈছে৷এ ই আৰ্থিক চাপ কমাবলৈ চৰকাৰে এক্সাইজ শুল্ক কমাই দিছে৷
চৰকাৰে পেট্ৰল ডিজেলৰ ওপৰত বিশেষ এক্সাইজ শুল্ক ১০ টকা কমাইছে৷ এই কমোৱাৰ ফলত পেট্ৰলত বিশেষ এক্সাইজ শুল্ক ৩ টকা আৰু ডিজেলত শূন্য হৈ গৈছে৷ এই শুল্ক কমোৱাৰ সুবিধা সাধাৰণ মানুহৰ নহয়, বৰং তেল সংস্থাসমূহেহে লাভ কৰিব৷ কিন্তু পৰোক্ষভাৱে সাধাৰণ মানুহো ইয়াৰ ফলত উপকৃত হব৷ কাৰণ সংস্থাসমূহৰ ক্ষতি কমিলে তেওঁলোকে পেট্ৰল ডিজেলৰ দাম বঢ়োৱাৰ প্ৰয়োজনবোধ নকৰে৷
জানি থোৱা ভাল যে জাহাজৰ ক্ৰুইড অইল, ৰিফাইনাৰিৰ পৰা আপোনাৰ বাহনৰ টেংক পৰ্যন্ত পাবলৈ কি কি ধৰণৰ কৰ বা শুল্ক যুক্ত হৈ আহে আৰু চৰকাৰে প্ৰতি লিটাৰ পেট্ৰলৰ পৰা কিমান আয় কৰে সেই কথা প্ৰায় বহুতেই নাজানে৷
ৰিফাইনাৰিৰ পৰা আপোনাৰ বাহনৰ টেংক পৰ্যন্ত পেট্ৰল-ডিজেল পাবলৈ একাধিক ধৰণৰ কৰ যুক্ত থাকে৷ তেলৰ দামৰ গঠন অনুসৰি ক্ৰুইড অইল বা ৰিফাইনিঙৰ অংশ প্ৰায় ৪৫ শতাংশ, কেন্দ্ৰীয় এক্সাইজ শুল্ক ২৫ শতাংশ, ৰাজ্য কৰ ২০ শতাংশ আৰু ডিলাৰ কমিছন ১০ শতাংশ৷
কেন্দ্ৰ চৰকাৰে প্ৰতি লিটাৰ পেট্ৰলত মুঠ ২১.৯০ টকা এক্সাইজ শুল্ক আদায় কৰে৷ যাৰ মাজত আছে
বেছিক এক্সাইজ শুল্ক- ১.৪০টকা
স্পেছিয়েল অতিৰিক্ত এক্সাইজ শুল্ক- ৩ টকা পূৰ্বে আছিল ১৩ টকা৷
কৃষি অৱকাঠামো আৰু উন্নয়ন চেছ- ২.৫ টকা
অতিৰিক্ত এক্সাইজ শুল্ক (ৰোড আৰু ইনফ্ৰাষ্ট্ৰাকচাৰ চেছ)- ৫টকা
ডিজেলত মুঠ ১৭. ৮০ টকা এক্সাইজ শুল্ক,যাৰ মাজত-
বেছিক এক্সাইড শুল্ক- ১.৮০ টকা
স্পেছিয়েল অতিৰিক্ত এক্সাইজ শুল্ক- ০ (পূৰ্বে আছিল১০টকা)
কৃষি আৰু অৱকাঠামো উন্নয়ন চেছ- ৪টকা
অতিৰিক্ত এক্সাইজ শুল্ক (ৰোড আৰু ইনফ্ৰাষ্ট্ৰাকচাৰ চেছ)- ২টকা
চৰকাৰে এক্সাইজ শুল্ক ১০ টকা কমোৱাৰ পাছত পেট্ৰলত এয়া ২১.৯০ টকাৰ পৰা কমি ১১. ৯০ টকা হৈছে আৰু ডিজেলত ১৭.৮০ টকাৰ পৰা কমি ৭.৮০ টকা হৈছে৷ এই তথ্যৰ পৰা বুজা যায় যে ৰিফাইনাৰিৰ পৰা আপোনাৰ ঘৰৰ বাহনলৈ আহোতে আহোতে পেট্ৰল-ডিজেলৰ দাম প্ৰায় দ্বিগুণ হৈ যায়৷ বেছ প্ৰাইছৰ ওপৰত বিভিন্ন কৰ আৰু চেছ যুক্ত হৈ চূড়ান্ত দাম নিৰ্ধাৰিত হয়৷
যদি আমি দিল্লীৰ হিচাপ চাওঁ তেন্তে প্ৰতি লিটাৰ পেট্ৰলত প্ৰায় ১৫.৪০ টকা ভেট আৰু কেন্দ্ৰ চৰকাৰে এক্সাইজ শুল্ক হিচাপে ২১.৯০ টকা আদায় কৰে৷ ইয়াৰোপৰি ডিলাৰ কমিছন প্ৰায় ৪.৪০ টকা৷ ফলত ৰিফাইনাৰিৰ পৰা ৭৪.৯৭ টকা প্ৰতি লিটাৰ দামত বাহিৰ হোৱা পেট্ৰল পাম্প পোৱালৈ হয়গৈ প্ৰায় ৯৪.৭৭ টকা প্ৰতি লিটাৰ৷৷
একেদৰে ৭১.৮১ টকা বেচ দামৰ ডিজেলৰ সৈতে ৩.০৩ টকা ডিলাৰ কমিছন আৰু ১২.৮৩ টকা ভেট যুক্ত হৈ হয়গৈ প্ৰায় ৮৭.৬৭ টকা প্ৰতি লিটাৰত৷ এক্সাইজ শুল্ক হৈছে এনে এক কৰ যি দেশত উৎপাদিত পণ্যৰ ওপৰত কেন্দ্ৰ চৰকাৰে আৰোপ কৰে৷ ই এক ধৰণৰ পৰোক্ষ কৰ৷ সাধাৰণতে মদ, পেট্ৰলিয়াম পণ্য, তামাক ইত্যাদিৰ ওপৰত এই কৰ আৰোপ কৰা হয়৷ যিসমূহ জি এছ টিৰ আওতাৰ বাহিৰত৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
