জন্ম নিয়ন্ত্ৰণৰ বাবে ঔষধ বা ইঞ্জেকছন কেৱল মহিলাৰ বাবেই আছে৷ পুৰুষৰ বাবে কণ্ডম বা অস্ত্ৰোপচাৰৰ বাহিৰে আন কোনো জন্ম নিয়ন্ত্ৰণৰ উপায় এতিয়াও আৱিষ্কৃত হোৱা নাই৷ এইবাৰ সেই ধাৰাৰ সলনি হব৷ পুৰুষৰ বাবেও গৰ্ভনিৰোধক তৈয়াৰ কৰিছে বিজ্ঞানীয়ে৷ এতিয়া কেৱল প্ৰয়োগৰহে অপেক্ষা৷
পুৰুষৰ বাবেও সাময়িক কোনো গৰ্ভনিৰোধক আৱিষ্কাৰৰ চেষ্টা এই প্ৰথম নহয়৷ দীৰ্ঘদিন ধৰি এই বিষয়ক লৈ আলোচনা পৰীক্ষানিৰীক্ষা চলিছে৷ কিন্তু অধিকাংশ ক্ষেত্ৰতেই পাৰ্শ্বপ্ৰতিক্ৰিয়াৰ সম্ভাৱনা, পৌৰুষত্বত স্থায়ী ক্ষতিৰ সম্ভাৱনা থাকি যায়৷ সেয়ে এই ধৰণৰ উপায় পোৱা গলে সেয়া কাৰ্যক্ষেত্ৰত প্ৰয়োগ কৰা হোৱা নাই৷ নিউয়ৰ্কৰ কৰ্নেল বিশ্ববিদ্যালয়ৰ বিজ্ঞানীয়ে সেই অংকৰ জঁটেই খুলিব পাৰিছে৷ জনাইছে যে পুৰুষৰ বাবে এক নিৰাপদ, সাময়িক, হৰমনবিহীন আৰু ১০০ শতাংশ কাৰ্যকৰী জন্ম নিয়ন্ত্ৰণৰ প্ৰক্ৰিয়া আৱিষ্কাৰ কৰা হৈছে৷ ইয়াত কোনো অস্ত্ৰোপচাৰৰ প্ৰয়োজন নহয়৷ কিংবা সন্তান উৎপাদনৰ ক্ষমতাৰ স্থানীয় কোনো ক্ষতিও নহয়৷ দীৰ্ঘ ছবছৰ ধৰি এন্দুৰৰ ওপৰত এই প্ৰক্ৰিয়া চলাই চাইছে বিজ্ঞানীয়ে৷ তাৰপিছতেই আহিছে সাফল্য৷
পুৰুষদেহত জননকোষ বা শুক্ৰাণু উৎপাদন হয় মায়োচিছ প্ৰক্ৰিয়াৰ মাধ্যমেৰে৷ এই প্ৰক্ৰিয়াৰ এক গুৰুত্বপূৰ্ণ ধাপত বাধা দিলে শুক্ৰাণুৰ উৎপাদন সাময়িকভাৱে ব্যাহত হয়৷ পৃথককৈ পুৰুষদেহত তাৰ বাবে কোনো ক্ষতিও নহয়৷ কৰ্নেল বিশ্ববিদ্যালয়ৰ বিজ্ঞানীসকলে তেওঁলোকৰ গৱেষণাৰ ফল প্ৰকাশ কৰিছে৷ প্ৰছিডিংছ অফ দ্যা নেশ্ব্যনেল একাডেমি অফ চায়েন্স পত্ৰিকাত৷ তাতেই কোৱা হৈছে, মায়োচিছত বাধা দিবলৈ পৰীক্ষাগাৰত ব্যৱহাৰ কৰা হৈছিল জেকিউ১ নামৰ এক যৌগ৷ মূলত কেন্সাৰ আৰু প্ৰদাহজনিত ৰোগৰ গৱেষণাত এই যৌগ কাম লগাই অহা হৈছিল৷ কিন্তু বিজ্ঞানীয়ে পৰীক্ষাৰ অন্তত জানিব পাৰিছে যে এই যৌগ মায়োচিছৰ প্ৰফেজ১ নামৰ পৰ্যায়ক হস্তক্ষেপ কৰিব পাৰে৷ তাত সাময়িকভাৱে বন্ধ হব পাৰে শুক্ৰাণুৰ উৎপাদন৷
কৰ্নেল ৰিপ্ৰডাক্টিভ চায়েন্স চেন্টাৰৰ পৰিচালক তথা জিনবিদ্যাৰ অধ্যাপক পলা কোহেনে কয়, ‘অণ্ডকোষত গৰ্ভনিৰোধক স্থাপন যে শুক্ৰাণু উৎপাদন ৰোধৰ এক কাৰ্যকৰী উপায় হব পাৰে সেয়া আমি প্ৰথম দেখিছো৷ ইয়াত কোনো স্থায়ী ক্ষতিৰ সম্ভাৱনা নাই৷ গৱেষণাত দেখা গৈছে বেছিভাগ ক্ষেত্ৰতেই প্ৰয়োজনত স্বাভাৱিক মায়োচিছ প্ৰক্ৰিয়া আৰু শুক্ৰাণুৰ সম্পূৰ্ণ কাৰ্যকাৰিতা উভতাই পোৱা সম্ভৱ৷ এই প্ৰক্ৰিয়াত গৰ্ভনিৰোধক ব্যৱহাৰ কৰাৰ পাছতো কোনো পুৰুষে বিচাৰিলে সফলভাৱে সন্তান উৎপাদন কৰিব পাৰিব৷ সন্তানৰ স্বাস্থ্যও সম্পূৰ্ণ স্বাভাৱিক থাকিব৷
গৱেষণাগাৰত পুৰুষ এন্দুৰৰ ওপৰত জেকিউ১ যৌগটো তিনি সপ্তাহ ধৰি প্ৰয়োগ কৰা হৈছিল৷ সেই সময়ত শুক্ৰাণু উৎপাদন সম্পূৰ্ণ বন্ধ হৈ গৈছিল৷ মায়োচিছৰ প্ৰধান বৈশিষ্ট্যসমূহো ব্যাহত হৈছিল৷ প্ৰক্ৰিয়া বন্ধ কৰিলে পৰবৰ্তী ছসপ্তাহৰ ভিতৰত এন্দুৰসমূহে আকৌ স্বাভাৱিক শুক্ৰাণু উৎপাদন কৰিবলৈ সক্ষম হয়৷ এই এন্দুৰসমূহক প্ৰজননতো ব্যৱহাৰ কৰা হৈছিল৷ দেখা গৈছে এন্দুৰৰ বংশবৃদ্ধিৰ ক্ষমতাত কোনো প্রভাৱ পৰা নাই৷ এই এন্দুৰ আৰু মানুহৰৰ শৰীৰৰ গৰ্ভনিৰোধক প্ৰয়োগত কিছু বিভেদ আছে৷ তেওঁলোকৰ মতে মানুহৰ ক্ষেত্ৰত এই গৰ্ভনিৰোধক প্ৰতি তিনিমাহ অন্তৰে অন্তৰে ইঞ্জেকছনৰ মাধ্যমেৰে প্ৰয়োগ কৰিব পাৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
