দেওবাৰে পুৱা দিল্লীৰ শ্বাহদাৰাৰ বিবেক বিহাৰ অঞ্চলৰ অগ্নিকাণ্ড সংঘটিত হয়। এই অগ্নিকাণ্ডত কমেও ৯ জন লোক নিহত হোৱাৰ লগতে ৪ জনৰ পৰা ৬জন আহত হৈ চিকিৎসালয়ত ভৰ্তি হৈ আছে। পুৱা প্ৰায় ৩:৪৭ বজাত অগ্নিনিৰ্বাপক বাহিনীৰ ১৪ খন বাহন ঘটনাস্থলীত উপস্থিত হৈ উদ্ধাৰ অভিযান আৰম্ভ কৰে।
অগ্নিনিৰ্বাপক বাহিনীৰ তথ্য অনুসৰি বিল্ডিং বি-১৩ৰ দ্বিতীয় মহলাৰ পৰা আৰম্ভ হোৱা এই অগ্নিকাণ্ড ক্ৰমান্বয়ে সমগ্ৰ অট্টালিকাটোত বিয়পি পৰে। প্ৰায় ডেৰ-দুঘণ্টাৰ প্ৰচেষ্টাৰ অন্তত পুৱা ৬:২৫ বজাত জুই নিয়ন্ত্ৰণ কৰা হয় যদিও ইতিমধ্যে যথেষ্ট ক্ষতিসাধন হয়।
প্ৰাথমিক তথ্য অনুসৰি এই পৰ্যন্ত উদ্ধাৰ হৈছে ৯ জন লোকৰ মৃতদেহ। চাৰিৰ পৰা ছয়জন লোক গুৰুতৰভাৱে অগ্নিদগ্ধ হৈ ওচৰৰ চিকিৎসালয়ত ভৰ্তি কৰোৱা হৈছে। তথ্যনুসৰি আহত একাংশৰ অৱস্থা সংকটজনক বুলি জানিব পৰা গৈছে।
ৰাষ্ট্ৰীয় সংবাদ মাধ্যমৰ পৰা পোৱা বৰ্তমানৰ তথ্যনুসৰি, অগ্নিনিৰ্বাপক বাহিনী আৰু আৰক্ষীৰ দলে যৌথ উদ্ধাৰ অভিযান চলাই প্ৰায় ১৪ ৰ পৰা ২০ জন লোকক নিৰাপদে উলিয়াই আনে। স্থানীয় লোকৰ মতে, পিছফালৰ এপাৰ্টমেণ্টটোত কিছু লোক আবদ্ধ হৈ থকাৰ সন্দেহ কৰা হৈছে যদিও বৰ্তমান আৰক্ষীয়ে ভিতৰত কোনো লোক আবদ্ধ থকাৰ কথা অস্বীকাৰ কৰিছে।
AC বিস্ফোৰণৰ ফলত জুইৰ আশংকা
প্ৰত্যক্ষদৰ্শীৰ মতে, এচি বিস্ফোৰণৰ ফলত এই অগ্নিকাণ্ড সংঘটিত হৈছে। কিন্তু অগ্নিকাণ্ডৰ সঠিক কাৰণ এতিয়াও আনুষ্ঠানিকভাৱে নিৰ্ণয় হোৱা নাই আৰু তদন্ত অব্যাহত আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
