অন্ধ্ৰ প্ৰদেশৰ মুখ্যমন্ত্ৰী এন চন্দ্ৰবাবু নাইডুৱে ৰাজ্যখনৰ জনসংখ্যা হ্ৰাস পোৱাক লৈ উদ্বেগ প্ৰকাশ কৰি এটা ডাঙৰ সিদ্ধান্ত গ্ৰহণ কৰিছে। শ্ৰীকাকুলাম জিলাৰ নৰসন্নপেটাত এক কাৰ্যসূচীত ভাষণ দি মুখ্যমন্ত্ৰী নাইডুৱে তৃতীয় সন্তান জন্মৰ বাবে ৩০ হাজাৰ টকা আৰু চতুৰ্থ সন্তান জন্মৰ বাবে ৪০ হাজাৰ টকা অনুদান আগবঢ়োৱাৰ কথা ঘোষণা কৰে। চৰকাৰে এই আঁচনিখনত অনুমোদন জনোৱাৰ লগতে আগন্তুক এমাহৰ ভিতৰত সম্পূর্ণ সবিশেষ প্রকাশ কৰা হ’ব বুলিও কয়।
স্বৰ্ণ অন্ধ্ৰ-স্বচ্ছ অন্ধ্ৰ কাৰ্যসূচীৰ সময়ত মুখ্যমন্ত্ৰী চন্দ্ৰবাবু নাইডুৱে কয় যে, “মই নতুন সিদ্ধান্ত লৈছো। তৃতীয় সন্তান জন্মৰ লগে লগে ৩০ হাজাৰ টকা দিয়া হ’ব, আৰু চতুৰ্থ সন্তানৰ বাবে ৪০ হাজাৰ টকা দিয়া হ’ব।” যদিও এন চন্দ্ৰবাবু নাইডুৱে পূর্বে জনসংখ্যা নিয়ন্ত্রণৰ কথা কৈছিল, কিন্তু এতিয়া তেওঁ কৈছে যে সময় সলনি হৈছে আৰু সমাজে একেলগে কাম কৰি জন্মৰ হাৰ বৃদ্ধি কৰিব লাগিব৷
দ্বিতীয় সন্তান জন্মৰ বাবে ২৫ হাজাৰ টকাৰ প্ৰৰোচনা প্ৰদানৰ পূৰ্বৰ প্ৰস্তাৱৰ পিছতে মুখ্যমন্ত্ৰী নাইডুৰ শেহতীয়া ঘোষণা। ৫ মাৰ্চত তেওঁ বিধানসভাত কয় যে, ৰাজ্য চৰকাৰে দ্বিতীয় সন্তান জন্ম দিয়া দম্পতীক ২৫ হাজাৰ টকাৰ প্ৰদান কৰাৰ কথা চিন্তা কৰিছে।
কিয় কমিছে ৰাজ্যৰ জনসংখ্যা?
বৈঠকৰ সময়ত মুখ্যমন্ত্ৰী চন্দ্ৰবাবু নাইডুৱে কয় যে আজিকালি বহু দম্পতীয়ে আয় বৃদ্ধিৰ লগে লগে মাত্ৰ এটা সন্তান জন্ম দিবলৈ বাছি লৈছে। ইফালে কিছুমান পৰিয়ালে প্ৰথম সন্তান ল’ৰা নহ’লেহে দ্বিতীয় সন্তান জন্ম দিয়াৰ কথা চিন্তা কৰে। তেওঁ কয় যে ইয়াৰ ফলত ৰাজ্যখনৰ জনসংখ্যা বৃদ্ধিৰ হাৰ ক্ৰমাগতভাৱে হ্ৰাস পোৱাত অৰিহণা যোগাইছে।
মুখ্যমন্ত্ৰী চন্দ্ৰবাবু নাইডুৱে উল্লেখ কৰে যে এখন সমাজৰ জনসংখ্যা সুস্থিৰ হৈ থাকিবলৈ মুঠ প্ৰজনন হাৰ (TFR) ২.১ অপৰিহাৰ্য। এই হাৰ যদি তললৈ নামি যায় তেন্তে বৃদ্ধৰ জনসংখ্যা বৃদ্ধি হ’বলৈ আৰম্ভ কৰিব আৰু কাম কৰাৰ জনসংখ্যা হ্ৰাস পাব। মুখ্যমন্ত্ৰীয়ে উল্লেখ কৰে যে বহু দেশত জনসংখ্যা হ্ৰাস আৰু বৃদ্ধি পোৱা বৃদ্ধ জনসংখ্যা অৰ্থনৈতিক উন্নয়নৰ বাবে এক ডাঙৰ প্ৰত্যাহ্বান হৈ পৰিছে। সময়মতে ব্যৱস্থা গ্ৰহণ নকৰিলে ভাৰতৰ একাংশ ৰাজ্যত একেধৰণৰ পৰিস্থিতিৰ সৃষ্টি হ’ব পাৰে বুলি তেওঁ সকীয়াই দিয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
