কন্যাৰ মহাবিদ্যালয়ৰ মাচুলৰ বাবে খালী ভৰিৰে ৪৭ বছৰীয়া মাতৃয়ে অংশ ল’লে মাৰাথনত

কন্যাৰ পঢ়া-শুনাৰ মাচুল পৰিশোধ কৰিবলৈ এগৰাকী মাতৃয়ে খালী ভৰিৰে দৌৰি দাঙি ধৰিলে এক অনন্য উদাহৰণ। তেওঁৰ এই অদম্য সাহস আৰু ইচ্ছাশক্তিয়ে এতিয়া সকলোৰে দৃষ্টি আকৰ্ষণ কৰিছে। মহাৰাষ্ট্ৰৰ বীদ জিলাৰ আম্বাজোগাইত অনুষ্ঠিত হৈছিল ‘অমৃত দৌৰ’ নামৰ এখন মাৰাথন প্ৰতিযোগিতা। এই প্ৰতিযোগিতাত ৪৭ বছৰীয়া ৰামাবাই ৰণবীৰে প্ৰথম স্থান লাভ কৰে। বিশেষ কথাটো হ’ল, ৰামাবাইয়ে কোনো প্ৰশিক্ষণ নোলোৱাকৈয়ে শাৰী পিন্ধি, খালী ভৰিৰে এই দৌৰত অংশগ্ৰহণ কৰিছিল। প্ৰতিযোগিতাৰ সময়ত বৰষুণ দি থকাৰ ফলত ৰাস্তাটো তিতি আছিল। কিন্তু সেই প্ৰতিকূল পৰিস্থিতিয়েও ৰামাবাইৰ মনোবল ভাঙিব নোৱাৰিলে। খালী ভৰিৰে তিতা ৰাস্তাত দৃঢ়তাৰে দৌৰি তেওঁ শেষত প্ৰথম স্থান দখল কৰে। বিজয়ী হিচাপে তেওঁ লাভ কৰে ৩ হাজাৰ টকাৰ পুৰস্কাৰ।

কন্যাৰ শিক্ষাৰ বাবেই এই দৌৰ

ৰামাবাইৰ জীৱন সংগ্ৰামে সকলোকে আৱেগিক কৰি তুলিছে। স্বামীৰ মৃত্যুৰ পিছত তেওঁ হিংগোলী এৰি আম্বাজোগাইলৈ আহিছিল। পৰিয়ালৰ আৰ্থিক অৱস্থা ভাল নহ’লেও দুয়োগৰাকী কন্যাৰ শিক্ষাৰ ক্ষেত্ৰত তেওঁ কোনো ধৰণৰ আপোচ কৰিব বিচৰা নাই। জানিব পৰা মতে, ৰামাবাইয়ে এখন একাডেমীত ৰান্ধনীৰ কাম কৰে। এই কামৰ পৰা উপাৰ্জন কৰা ধনেৰে তেওঁ পৰিয়াল চলোৱাৰ লগতে কন্যা দুগৰাকীৰ পঢ়া-শুনাৰ খৰচ বহন কৰি আহিছে। তেওঁৰ এগৰাকী কন্যাই বিজ্ঞান শাখাত স্নাতক ডিগ্ৰী লাভৰ বাবে অধ্যয়ন কৰি আছে। আনগৰাকী কন্যাই আৰক্ষীত নিযুক্তি লাভৰ বাবে প্ৰস্তুতি চলাই আছে। কন্যাসকলৰ শিক্ষাৰ মাচুল পৰিশোধ কৰিবলৈ ধনৰ প্ৰয়োজন হৈছিল ৰামাবাইৰ। সেই বাবেই তেওঁ ‘অমৃত দৌৰ’ প্ৰতিযোগিতাত অংশগ্ৰহণ কৰাৰ সিদ্ধান্ত লয়। তেওঁৰ বাবে এই দৌৰ কেৱল প্ৰতিযোগিতা নাছিল, বৰং কন্যাসকলৰ ভৱিষ্যতৰ বাবে কৰা আন এক সংগ্ৰাম আছিল।

‘সংগ্ৰামেই জীৱনৰ আন এটা নাম’

প্ৰতিযোগিতাত জয়লাভ কৰাৰ পিছত ৰামাবাইয়ে নিজৰ সংগ্ৰামৰ কথা উল্লেখ কৰি কয় যে, কন্যাসকলৰ শিক্ষাৰ বাবে তেওঁ যিমানেই কষ্টৰ সন্মুখীন নহওক কিয়, কেতিয়াও পিছুৱাই নাযায়। তেওঁৰ মতে, সন্তানৰ ভৱিষ্যতৰ বাবে তেওঁ প্ৰতিদিনেই দৌৰি আছে। এই প্ৰতিযোগিতাতো তেওঁ নিজৰ ছোৱালীবোৰৰ মাচুল পৰিশোধ কৰিব পৰাকৈ ধন সংগ্ৰহ কৰাৰ উদ্দেশ্যৰে দৌৰিছিল। ৰামাবাইৰ এই জয়ে প্ৰতিযোগিতাস্থলীত উপস্থিত বহু লোকক আৱেগিক কৰি তোলে। কোনো ধৰণৰ প্ৰশিক্ষণ নোলোৱাকৈ, শাৰী পিন্ধি আৰু খালী ভৰিৰে বৰষুণত দৌৰি প্ৰথম স্থান লাভ কৰা ৰামাবাই এতিয়া বহু মহিলা আৰু যুৱক-যুৱতীৰ বাবে প্ৰেৰণাৰ উৎস হৈ পৰিছে। তেওঁ প্ৰমাণ কৰি দেখুৱালে যে জীৱনত লক্ষ্য দৃঢ় হ’লে অভাৱ, বাধা বা প্ৰতিকূল পৰিস্থিতিয়ে মানুহক সহজে ৰখাব নোৱাৰে। সন্তানৰ উজ্জ্বল ভৱিষ্যতৰ বাবে এগৰাকী মাতৃয়ে কিমান দূৰলৈ যাব পাৰে, ৰামাবাইৰ এই কাহিনীয়ে তাৰেই এক অনন্য উদাহৰণ দাঙি ধৰিছে।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ