মনোবিজ্ঞানী আৰু পাৰিবাৰিক পৰামৰ্শদাতাই কৈছে, বিবাহ-বহিৰ্ভূত সম্পৰ্ক বৃদ্ধিৰ আঁৰত বহু কাৰণ আছে৷ এয়া কোনো একক কাৰণত নহয়৷ ব্যক্তিগত চিন্তাভাৱনা, পাৰিবাৰিক পৰিস্থিতি, মানসিক অসুস্থতা, সামাজিক প্রভাব আৰু প্ৰযুক্তিৰ ব্যৱহাৰসহ বিভিন্ন বিষয় একত্ৰিত হোৱাটোৱেই ইয়াৰ বাবে দায়ী৷ বিশেষকৈ আজিৰ জীৱনযাত্ৰাৰ সম্পৰ্কৰ প্ৰতি অসহিষ্ণুতাও এক বৃহৎ কাৰণ হৈ থিয় দিছে৷
মনোবিজ্ঞানীয়ে কয় যে স্থায়ী সম্পৰ্ক আৰু ক্ষণস্থায়ী আকৰ্ষণৰ মাজত পাৰ্থক্য বহুতেই সঠিকভাৱে বুজিব নোৱাৰে৷ কেতিয়াবা কেতিয়াবা ক্ষণস্থায়ী শাৰীৰিক আকৰ্ষণ বা মানসিক আসক্তিকো সঁচা ভালপোৱা বুলি বহুতে ভুল কৰি পেলায়৷ হৰমনৰ প্ৰভাৱ, নতুন মানুহৰ প্ৰতি আগ্ৰহ আৰু ক্ষণস্থায়ী সুখক স্থায়ী সুখ ভাৱি কিছু সিদ্ধান্ত লোৱা হয়৷ কিন্তু পৰিয়াল, সন্তান আৰু ভৱিষ্যতৰ ওপৰত ইয়াৰ প্ৰভাৱ কিমান গুৰুতৰ হ’ব সেয়া বহুতেই পূৰ্বৰে পৰা ভাৱি নাচায়৷
দাম্পত্য জীৱনৰ অসন্তুষো আৰু এক গুৰুত্বপূৰ্ণ কাৰণ৷ স্বামী-স্ত্ৰীৰ মাজত সঠিক যোগাযোগৰ অভাৱ, এজনে আনজনক সময় নিদিয়া আৰু অনুভূতি ভাগ কৰি নোলোৱাই মানসিক দূৰত্ব বঢ়াই তোলে৷ কোনো কোনোৱে বিবাহৰ পাছত অহা দায়িত্বসমূহক চাপপূৰ্ণ বুলি ধাৰণা কৰে৷ সংসাৰ চলোৱা, আৰ্থিক সমস্যা, সন্তানৰ দায়িত্ব আৰু চাকৰিৰ চাপৰ কাৰণে সম্পৰ্কৰ সুখ কমি যায়৷ তেতিয়াই বাহিৰৰ কোনোৱে যদি বিষয়টো বুজি পায় তেতিয়া তেনে ব্যক্তিৰ প্ৰতি আকৰ্ষণ বঢ়াৰ সম্ভাৱনা থাকে৷
কিছু লোকে ঘৰত অপমান, অৱহেলাৰ চিকাৰ হলেও বাহিৰৰ পৰা সান্তনা বিচাৰে৷ কোনোৱে যদি তেওঁৰ কথা শুনে, তেওঁক অগ্ৰাধিকাৰ দিয়ে বা বুজি পায় তেতিয়া এই সৰু সৰু বিষয়সমূহেও এক মানসিক বন্ধন তৈয়াৰ কৰিব পাৰে৷ বিশেষকৈ শৈশৱৰ পৰা পাৰিবাৰিক মূল্যবোধ, সম্পৰ্কৰ গুৰুত্ব আৰু বিশ্বাসৰ সঠিক বুজাপৰা সম্পৰ্কে ভালকৈ নুবুজিলে সম্পৰ্কৰ প্ৰতি দায়িত্ববোধ কমি যায়৷
সুৰা আৰু অন্যান্য আসক্তিও পাৰিবাৰিক বন্ধন নষ্ট কৰাৰ কাৰণ হ’ব পাৰে৷ এজন ব্যক্তিৰ চিন্তাভাৱনাক প্ৰভাৱিত কৰে আত্মনিয়ন্ত্ৰণ কমাই দিয়ে৷ কেতিয়াবা কেতিয়াবা খং, অসহিষ্ণুতা আৰু সন্দেহ বাঢ়ি যায়৷ যিয়ে দাম্পত্য জীৱনত দূৰত্ব বঢ়াই তোলে৷ ঠিক তেনেকৈ স্বামী-স্ত্ৰীৰ মাজত শাৰীৰিক সমস্যা বা বন্ধ্যাত্ব থাকিলে সেইসম্পৰ্কে খোলাখুলিকৈ কথা নাপাতিলেও সম্পৰ্ক দুৰ্বল হৈ পৰে৷ বহুতেই চিকিৎসকৰ ওচৰলৈ যাবলৈ দ্বিধাবোধ কৰে৷
ছচিয়েল মিডিয়া, মোবাইল ফোন, ৱেব চিৰিজ আৰু চিনেমাইয়ো মানুহৰ চিন্তাভাৱনাক প্ৰভাৱিত কৰে৷ বহুতেই পাহৰি যায় যে ছচিয়েল মিডিয়াত দেখা নিঁখুত জীৱন বাস্তৱ নহয়৷ কিছু মানুহে এই ভ্ৰান্ত ধাৰণাৰ মাজত থাকে যে বিবাহৰ পাছতো তেওঁলোকে অন্য এক ভাল জীৱনৰ সন্ধান আৰম্ভ কৰে৷ চাকৰিৰ বাবে বাহিৰত থকা মানুহৰো বেছি সময় যাৰ সৈতে কটাই বা সহকৰ্মীৰ সৈতেও মানসিক বন্ধন তৈয়াৰ হ’ব পাৰে৷ আৰু এক গুৰুত্বপূৰ্ণ বিষয় লৈছে স্বাৰ্থপৰ চিন্তা৷
যেতিয়া আমি সুখক গুৰুত্বপূৰ্ণ বুলি ভাৱো, মোৰ পছন্দই প্ৰধান এই অনুভূতি যেতিয়া বাঢ়ি যায় তেতিয়াই সম্পৰ্কৰ ক্ষেত্ৰত ত্যাগ আৰু ধৈৰ্য্য কমি যায়৷ কিন্তু সঁচাকৈয়ে সম্পৰ্ক কেৱল ভালপোৱাৰে শক্তিশালী নহয়, বৰং বিশ্বাস, দায়িত্ববোধ, পাৰস্পৰিক শ্ৰদ্ধা আৰু মুকলি যোগাযোগৰ মাধ্যমেৰেও শক্তিশালী হয়৷ সেই কাৰণেই পাৰিবাৰিক বিশেষজ্ঞসকলে কয় যে যেতিয়া সমস্যাই দেখা দিয়ে তেতিয়া মুকলিকৈ সমস্যাৰ বিষয়ে আলোচনা কৰক৷ তেতিয়া সম্পৰ্কসমূহ দীৰ্ঘ সময়ৰ বাবে মজবুত হৈ থাকে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
