বিহাৰৰ দুখন কোচিং ইনষ্টিটিউটৰ মাজত চলি থকা কাজিয়াৰ মাজতে খান ছাৰৰ বিৰুদ্ধে অস্ত্ৰ আইনৰ অধীনত এফআইআৰ দাখিল কৰা হৈছে। খান ছাৰে দিয়া বক্তব্যৰ ভিত্তিত পাটনাৰ কদম কুৱান থানাত আৰক্ষীয়ে তেওঁৰ বিৰুদ্ধে গোচৰ ৰুজু কৰে। তেওঁৰ প্ৰশিক্ষক কেন্দ্ৰ খান গ্ল’বেল ষ্টাডিজ (কেজিএছ)ক ভাঙি পেলোৱা, শিলগুটিৰে আঘাত কৰা আৰু গুলী চলোৱাৰ দুদিন পূৰ্বে তদন্ত কৰা হৈছে।
খান ছাৰৰ বিৰুদ্ধে অভিযোগ উঠিছে যে তেওঁৰ নিৰাপত্তাৰক্ষীয়ে কেনেকৈ গুলী চলালে। এতিয়া এই সমগ্ৰ বিষয়টো সন্দৰ্ভত যিকোনো সময়তে খান ছাৰক জেৰা কৰিব পাৰে আৰক্ষীয়ে। তদন্তৰ বাবে গঠন কৰা হৈছে বিশেষ আৰক্ষীৰ দল।
ইয়াৰ পূৰ্বে মঙলবাৰে গভীৰ নিশা পাটনাৰ প্ৰখ্যাত খান গ্ল’বেল কোচিং চেণ্টাৰত আক্ৰমণৰ ঘটনা সংঘটিত হয়। নিৰাপত্তাৰক্ষীক আক্ৰমণ কৰা হয়, ভাঙি পেলোৱা হয় আৰু শিলগুটি নিক্ষেপ কৰা হয়। অৱশ্যে খান কোচিং চেণ্টাৰৰ স্বত্বাধিকাৰী খান ছাৰ নামেৰে পৰিচিত ফৈছাল খানে দাবী কৰে যে কাষৰ কোচিং চেণ্টাৰৰ লোকসকলে তেওঁৰ সন্মুখত গুলীচালনা কৰে।
পিছত খান ছাৰে নিজৰ বক্তব্য সলনি কৰে যদিও সমগ্ৰ বিষয়টোত নতুন টুইষ্ট আহে, যেতিয়া এই কথা পোহৰলৈ আহে যে ঘটনাৰ দিনা খান কোচিং চেণ্টাৰৰ দুজন গাৰ্ড উত্তৰ প্ৰদেশৰ মেইনপুৰীৰ বাসিন্দা প্ৰদীপ কুমাৰ আৰু কাছগঞ্জৰ বাসিন্দা কালেশ্বৰে বন্দুকেৰে গুলীয়াইছিল।
ভিডিঅ’ ভাইৰেল হোৱাৰ পিছত গ্ৰেপ্তাৰ
গুলীচালনাৰ ভিডিঅ’ ছ’চিয়েল মিডিয়াত ভাইৰেল হোৱাৰ পাছত আৰক্ষীয়ে দুয়োজন লোকক গ্ৰেপ্তাৰ কৰে। তেওঁলোকৰ ৰাইফলো জব্দ কৰা হয়। আৰক্ষীৰ জেৰাৰ সময়ত দুয়োজন লোকে হিংসা, ভাঙি-ছিঙি, শিলগুটি নিক্ষেপৰ পিছত আত্মৰক্ষাৰ বাবে শূণ্যত গুলীচালনা কৰা বুলি স্বীকাৰ কৰে।
আৰক্ষীয়ে দুয়োটা ৰাইফল ফৰেনছিক পৰীক্ষাৰ বাবে প্ৰেৰণ কৰাৰ লগতে পুনৰ এফআইআৰ ৰুজু কৰে। ইয়াৰোপৰি গুলীচালনা আৰু সন্ত্ৰাসৰ উচটনি দিয়াৰ অভিযোগ উত্থাপন হৈছে। এই গুলীচালনাৰ সন্দৰ্ভত খান কোচিং ইনষ্টিটিউটৰ সঞ্চালক ফৈছাল খানকো জেৰা কৰিছে আৰক্ষীয়ে। অৰ্থাৎ এই সমগ্ৰ বিষয়টোত খান ছাৰে আৰু অধিক বিপদৰ সন্মুখীন হোৱাৰ সম্ভাৱনা আছে।
এফালে জ্ঞান বিন্দু কোচিং ইনষ্টিটিউটৰ পৰিচালকৰ লগতে আন দুজনক গ্ৰেপ্তাৰ কৰি জেললৈ প্ৰেৰণ কৰা হৈছে, এতিয়া খান ছাৰো আহিছে তদন্তৰ আওতাত।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
