আফগানিস্তানৰ বিৰুদ্ধে দ্বিতীয় এদিনীয়াত টীম ইণ্ডিয়াৰ ভাইচ কেপ্টেইন শ্ৰেয়াছ আয়াৰে এক বিশেষ কৃতিত্ব অৰ্জন কৰিছে। মেচখনত শ্ৰেয়াছে কিং কোহলিৰ এটা উল্লেখনীয় অভিলেখ ভংগ কৰিবলৈ সক্ষম হৈছে। মেচখনত যদিও আয়াৰে এটা গুৰুত্বপূৰ্ণ ইনিংছ খেলিবলৈ সক্ষম নহ’ল তথাপিও এই সৰু ইনিংছটোৰেই শ্ৰেয়াছে ক্ৰিকেট ইতিহাসত স্থান লাভ কৰিবলৈ সক্ষম হয়। শ্ৰেয়াছ আয়াৰে চলি থকা এদিনীয়া আন্তঃৰাষ্ট্ৰীয় শৃংখলাটোত বেটেৰে এতিয়ালৈকে বিশেষ সফলতা লাভ কৰা নাই। দুয়োখন মেচতেই শ্ৰেয়াছ আয়াৰে ভাল আৰম্ভণি কৰিও ইয়াক এটা ভাল ইনিংছলৈ পৰিণত কৰাব নোৱাৰিলে। আজি লক্ষ্ণৌৰ একানা ষ্টেডিয়ামত অনুষ্ঠিত দ্বিতীয়খন মেচত এটা অভাৰ বাউণ্ডাৰী শ্বট খেলিবলৈ চেষ্টা কৰি নিজৰ উইকেট হেৰুৱায় আয়াৰে।
বিৰাট কোহলিক অতিক্ৰম শ্ৰেয়াছ আয়াৰৰ
আজি অনুষ্ঠিত শৃংখলাৰ দ্বিতীয়খন এদিনীয়াত আয়াৰে ২৪টা বলত ২৬ ৰান সংগ্ৰহ কৰে। তেওঁৰ এই ইনিংছটোত আছিল এটা চাৰি আৰু এটা ছয়। এই ইনিংছটোৰ জৰিয়তে আয়াৰে ভাৰতৰ হৈ এদিনীয়া আন্তঃৰাষ্ট্ৰীয় ক্ৰিকেটত দ্ৰুততম গতিত ৩০০০ ৰান সম্পূৰ্ণ কৰা ক্ৰিকেটৰ তালিকাত বিৰাট কোহলিক অতিক্ৰম কৰে। এই তালিকাৰ শীৰ্ষত আছে টীম ইণ্ডিয়াৰ অধিনায়ক শুভমন গিল। সম্প্ৰতি ৭২টা ইনিংছেৰে দ্বিতীয় স্থানত শিখৰ ধাৱনৰ সৈতে আছে শ্ৰেয়াছ আয়াৰ।
ভাৰতৰ হৈ এদিনীয়া আন্তঃৰাষ্ট্ৰীয় ক্ৰিকেটত দ্ৰুত ৩০০০ ৰান
শুভমন গিল –৬২ ইনিংছ
শিখৰ ধাৱন – ৭২ ইনিংছ
শ্ৰেয়াছ আয়াৰ – ৭২ ইনিংছ
বিৰাট কোহলি – ৭৫ ইনিংছ
কে এল ৰাহুল – ৭৮ ইনিংছ
নৱজ্যোৎ সিং সিদ্ধু – ৭৯ ইনিংছ
কাপিল দেৱৰ বিশেষ ক্লাবতো প্ৰৱেশ শ্ৰেয়াছৰ
আজিৰ ইনিংছটোৰ জৰিয়তে আয়াৰে আন এটা উল্লেখযোগ্য অভিলেখৰো গৰাকী হয়। ভাৰতৰ হৈ এদিনীয়া ক্ৰিকেটত আটাইতকৈ কম বল খেলি ৩০০০ ৰান সম্পূৰ্ণ কৰা বেটাৰৰ তালিকাতো নিজৰ নাম সন্নিৱিষ্ট কৰিবলৈ সক্ষম হয় আয়াৰ। এই তালিকাৰ শীৰ্ষত আছে কিংবদন্তী অলৰাউণ্ডাৰ কাপিল দেৱ। কপিল দেৱে ২,৯৯৫টা বলত ৩০০০ ৰান সম্পূৰ্ণ কৰিছিল। এই তালিকাৰ দ্বিতীয় স্থানত থকা শুভমন গিলে ৩,০১৬টা বলত এই মাইলষ্টোন স্পৰ্শ কৰে। আনহাতে তালিকাৰ তৃতীয় স্থানলৈ উন্নীত হোৱা শ্ৰেয়াছ আয়াৰে মাত্ৰ ৩,০৪৯টা বলত সম্পূৰ্ণ কৰে ODI কেৰিয়াৰৰ ৩০০০ ৰান। আজিৰ মেচখনত টীম ইণ্ডিয়াৰ হাতত ১৭০ ৰানৰ বিশাল ব্যৱধানত পৰাস্ত হয় আফগানিস্তান।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
