দেশত ক্ৰমাৎ বৃদ্ধি পোৱা ডিজিটেল অপৰাধক লৈ গভীৰ উদ্বেগ আৰু অসন্তুষ্টি প্ৰকাশ কৰি উচ্চতম ন্যায়ালয়ে চাইবাৰ অপৰাধীৰ বিৰুদ্ধে অতি কঠোৰ স্থিতি গ্ৰহণ কৰিছে। ন্যায়ালয়ে এনে অপৰাধীক সমাজৰ বাবে অতি ক্ষতিকাৰক বুলি উল্লেখ কৰি তেওঁলোকক ‘পৰজীৱী’ আখ্যা দিছে, যিসকলে নিৰীহ আৰু সৰল বিনিয়োগকাৰীৰ কঠোৰ পৰিশ্ৰমেৰে উপাৰ্জিত ধন প্ৰতাৰণাৰে আত্মসাৎ কৰে। সৰ্বোচ্চ ন্যায়ালয়ে স্পষ্টকৈ কয় যে- এনে অপৰাধীৰ ক্ষেত্ৰত কোনো ধৰণৰ সহনশীলতা বা নমনীয়তা দেখুওৱা সম্ভৱ নহয়। সমাজৰ স্বাৰ্থত তেওঁলোক জে’লৰ ভিতৰত থকাটোৱেই প্ৰয়োজনীয়।
অভিযুক্তৰ আবেদন নাকচ সৰ্বোচ্চ ন্যায়ালয়ৰ
মুখ্য ন্যায়াধীশ সূৰ্যকান্ত আৰু ন্যায়াধীশ ভি মোহনৰ খণ্ডপীঠে এজন অভিযুক্তৰ আবেদন শুনানিৰ সময়ত এই কঠোৰ মন্তব্য কৰে। অভিযুক্তজনে দেশৰ বিভিন্ন ৰাজ্যত তেওঁৰ বিৰুদ্ধে ৰুজু হোৱা একাধিক FIR একেলগে সংযুক্ত কৰাৰ বাবে ন্যায়ালয়ৰ ওচৰত আবেদন জনাইছিল। কিন্তু সেই আবেদন সম্পূৰ্ণৰূপে খাৰিজ কৰি মুখ্য ন্যায়াধীশে কয়, ‘আপোনালোক সমাজৰ পৰজীৱী। আপোনালোকে নিৰীহ বিনিয়োগকাৰীক প্ৰতাৰণা কৰি ধন লুট কৰে। চাইবাৰ অপৰাধীৰ ক্ষেত্ৰত আমাৰ দৃষ্টিভংগী অতি কঠোৰ হ’ব।’ ন্যায়ালয়ে এইটোও উল্লেখ কৰে যে এনে অপৰাধৰ ভুক্তভোগী কেৱল কোনো এটা অঞ্চলত সীমাবদ্ধ নহয়; সমগ্ৰ দেশজুৰি বিভিন্ন পৰ্যায়ৰ মানুহ চাইবাৰ অপৰাধীৰ চিকাৰ হৈছে।
উচ্চ ন্যায়ালয়ৰ কাষ চাপিবলৈ পৰামৰ্শ
অভিযুক্তৰ অপৰাধ কৰা ধৰণৰ ওপৰতো সৰ্বোচ্চ ন্যায়ালয়ে কটাক্ষ কৰে। শুনানিৰ সময়ত খণ্ডপীঠে কয়, ‘আপুনি প্ৰথমে তামিলনাডুত কাৰোবাক প্ৰতাৰণা কৰে, তাৰ পিছত জম্মু-কাশ্মীৰলৈ যায় আৰু তাৰ পৰা উত্তৰ-পূৰ্বাঞ্চললৈ গতি কৰে।’ ন্যায়ালয়ে স্পষ্ট কৰে যে ইমান ব্যাপক পৰিসৰত সংঘটিত হোৱা অপৰাধৰ ক্ষেত্ৰত কোনো ধৰণৰ সকাহ প্ৰদান কৰিব নোৱাৰি। সেয়েহে উচ্চতম ন্যায়ালয়ে আবেদনখন বিবেচনা কৰিবলৈ অস্বীকাৰ কৰি অভিযুক্তজনক প্ৰয়োজনীয় সকাহৰ বাবে সংশ্লিষ্ট আঞ্চলিক উচ্চ ন্যায়ালয়ৰ কাষ চাপিবলৈ পৰামৰ্শ দিয়ে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
