বিশ্ব বজাৰৰ পৰা ১১৫ কোটি বেৰেল খাৰুৱা তেল অন্তৰ্ধান!

ইৰান-আমেৰিকাৰ বুজাবুজি চুক্তিৰ পাছতে হৰ্মুজ প্ৰণালী পুনৰ মুকলি হৈছে। হৰ্মুজ প্ৰণালী পুনৰ মুকলি কৰিলেও তেল সংকটৰ পৰা সমগ্ৰ বিশ্ব সোনকালেই মুক্ত হোৱাৰ কোনো সম্ভাৱনা নাই। এই ক্ষেত্ৰত কাম কৰা বিশ্লেষণ সংস্থা কেপলাৰ(Kpler)ৰ এক প্ৰতিবেদন অনুসৰি, যুদ্ধ চলি থকা প্ৰায় ৪ মাহৰ ভিতৰত বিশ্বৰ তেলৰ বজাৰৰ পৰা প্ৰায় ১১৫ কোটি বেৰেল খাৰুৱা তেলৰ যোগানত খেলিমেলি হৈছে। ইয়াৰ প্ৰভাৱ অনাগত কেইবামাহ ধৰি অব্যাহত থাকিব পাৰে। প্ৰতিবেদনখনত কোৱা হৈছে যে যুদ্ধকালত মধ্যপ্ৰাচ্যৰ পৰা তেলৰ যোগান প্ৰায় সম্পূৰ্ণৰূপে বন্ধ হৈ পৰিছিল। ফলস্বৰূপে পৃথিৱীৰ কৌশলগত আৰু বাণিজ্যিক তেল ভাণ্ডাৰ দ্ৰুতগতিত হ্ৰাস পাইছে। বিগত কেইমাহমানত মুঠ ১৯ কোটি বেৰেল তেল সংৰক্ষিত ভাণ্ডাৰৰ পৰা ব্যৱহাৰ কৰা হৈছে। আন্তঃৰাষ্ট্ৰীয় শক্তি সংস্থা (IEA)ৰ কৌশলগত তেল ভাণ্ডাৰ ১৯৯০ চনৰ পাছত এয়া সৰ্বনিম্ন স্তৰলৈ নামি আহিছে। আনহাতে, আমেৰিকাৰ জৰুৰীকালীন তেল ভাণ্ডাৰো বিগত ৪৩ বছৰৰ ভিতৰত আটাইতকৈ নিম্ন স্তৰত উপনীত হৈছে। আমেৰিকাৰ ৰাষ্ট্ৰপতি ডোনাল্ড ট্ৰাম্পে বুধবাৰে ভাৰ্চাইলত অনুষ্ঠিত G7 বৈঠকত কয় যে,-যদি যুদ্ধৰ সমাপ্তি নহ’লহেঁতেন, তেন্তে আমাৰ তেল ভাণ্ডাৰ প্ৰায় চাৰি সপ্তাহৰ ভিতৰতে শেষ হৈ গ’লহেঁতেন।

যুদ্ধবিৰতিৰ পাছত তেলৰ মূল্য হ্ৰাস

আমেৰিকা-ইৰানৰ বুজাবুজি চুক্তিৰ পাছতে বিশ্ব তেল বজাৰে কিছু সকাহ লাভ কৰিছে। যুদ্ধ চলি থকা সময়ত খাৰুৱা তেলৰ মূল্য প্ৰতি বেৰেলত ১২৬ ডলাৰলৈকে বৃদ্ধি পাইছিল। বৰ্তমান ইয়াৰ মূল্য ৮০ ডলাৰৰ তললৈ নামি আহিছে। কিন্তু বিশেষজ্ঞসকলৰ মতে, কেৱল মূল্য হ্ৰাস পোৱাটোৱেই সম্পূৰ্ণ পৰিস্থিতিক প্ৰতিফলিত নকৰে। হৰ্মুজ প্ৰণালী পুনৰ মুকলি হ’লেও তেলৰ যোগান তৎক্ষণাত স্বাভাৱিক অৱস্থালৈ ঘূৰি নাহিব। প্ৰথমে সমুদ্ৰ পথত পুতি ৰখা বাৰুদী সুৰংগ (Mine) আঁতৰাব লাগিব। তাৰ পাছত খালী টেংকাৰসমূহ পুনৰ ঘূৰাই অনা, উৎপাদন বৃদ্ধি কৰা আৰু সমগ্ৰ যোগান শৃংখল (Supply Chain) স্বাভাৱিক অৱস্থালৈ অনাৰ বাবে যথেষ্ট সময়ৰ প্ৰয়োজন হ’ব। তেল উদ্যোগৰ বিশেষজ্ঞসকলৰ মতে, সমগ্ৰ ব্যৱস্থা সম্পূৰ্ণ স্বাভাৱিক হ’বলৈ কেইবামাহ লাগিব পাৰে। তেতিয়ালৈকে বিশ্বই বৰ্তমানৰ তেল ভাণ্ডাৰৰ ওপৰতেই নিৰ্ভৰ কৰিব লাগিব।

বহু বিশেষজ্ঞই এতিয়াও সকাহৰ আশা দেখিছে

Infrastructure Capital Advisors-ৰ CEO জে হেটফিল্ডৰ মতে, আৰ্থিক সংকটত ভুগি থকা OPECৰ বহু সদস্য দেশ তেল উৎপাদন বৃদ্ধি কৰিবলৈ সাজু হৈ আছে। ইয়াৰ ফলত বজাৰত অতিৰিক্ত যোগান আহিব আৰু মূল্যৰ ওপৰত চাপ সৃষ্টি হ’ব পাৰে। Macquarie Group-ৰ গ্ল’বেল অইল এণ্ড গেছ কৌশলবিদ বিকাশ দ্বিবেদীয়ে কয় যে-যুদ্ধ আৰম্ভ হোৱাৰ আগতেই বিশ্ব বজাৰত যথেষ্ট তেল ভাণ্ডাৰ আছিল। সেইকাৰণেই ইমান বৃহৎ পৰিমাণৰ যোগান ব্যাহত হ’লেও বজাৰ সম্পূৰ্ণৰূপে অস্থিৰ হৈ পৰা নাছিল। তেওঁ আৰু কয় যে-আমেৰিকাত ডিজেল আৰু পেট্ৰ’লৰ ভাণ্ডাৰ কিছু হ্ৰাস পাইছে যদিও পৰিস্থিতি এতিয়াও নিয়ন্ত্ৰণত আছে। সংকটৰ সময়ত শোধনাগাৰসমূহে (Refineries) তেল ক্ৰয় কৰিবলৈ বহু উৎসৰ সৈতে যোগাযোগ কৰিবলগীয়া হৈছিল। কিন্তু অহা কেইসপ্তাহত পৰিস্থিতি সলনি হ’ব পাৰে আৰু তেল বিক্ৰেতাসকলেই ক্ৰেতাসকলৰ ওচৰলৈ যাব পাৰে।

১১৫ কোটি বেৰেল তেলৰ অংক মিলোৱা সহজ নহয়

বিশেষজ্ঞসকলৰ মতে, যুদ্ধকালত হেৰাই যোৱা ১১৫ কোটি বেৰেল তেলৰ নাটনি পূৰণ কৰাটো সহজ কাম নহয়। যদি বিশ্বই প্ৰতিদিনে চাহিদাতকৈ ৫০ লাখ বেৰেল অধিক তেল উৎপাদন কৰে, তথাপিও এই নাটনি পূৰণ কৰিবলৈ প্ৰায় এবছৰ সময় লাগিব। বিশ্বত দৈনিক ১০.৩ কোটি বেৰেল তেল উৎপাদন হয়। আন্তঃৰাষ্ট্ৰীয় শক্তি সংস্থা (IEA) আৰু আমেৰিকাৰ শক্তি তথ্য প্ৰশাসন (EIA)-ৰ তথ্য অনুসৰি, বৰ্তমান বিশ্বত গড়ে প্ৰতিদিনে ১০.৩ কোটি বেৰেল কেঁচা তেল উৎপাদন হয়। অৰ্থাৎ, প্ৰতিমাহে প্ৰায় ৩০৯ কোটি বেৰেল আৰু বছৰি প্ৰায় ৩,৭৬০ কোটি বেৰেল তেল উৎপাদিত হয়। আমেৰিকা বিশ্বৰ সৰ্ববৃহৎ তেল উৎপাদক দেশ আৰু আমেৰিকাই অকলেই বিশ্বৰ মুঠ তেল উৎপাদনৰ প্ৰায় ১৩ শতাংশ যোগান ধৰে। ইয়াৰ পাছতেই ছৌদি আৰব, ৰাছিয়া, কানাডা আৰু ইৰাকৰ স্থান।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ