ফিফা বিশ্বকাপ ২০২৬ৰ নকআউট পৰ্যায়ত বৃহস্পতিবাৰে ফুটবলপ্ৰেমীয়ে উপভোগ কৰিলে এক শ্বাসৰুদ্ধকৰ, নাটকীয় আৰু কিছু বিতৰ্কেৰে ভৰা মেচ। কানাডাৰ টৰেণ্টোত অনুষ্ঠিত ৰাউণ্ড অব ৩২ৰ এই হাইভল্টেজ মেচখনত পৰ্তুগালে ক্ৰোৱেচিয়াক ২–১ গ’লৰ ব্যৱধানত পৰাস্ত কৰি ক্ৰোৱেচিয়ান লুকা মড্ৰিচৰ পঞ্চম বিশ্বকাপত খিতাপ জয়ৰ সপোন ভাঙি পেলালে। মেচৰ আৰম্ভণিতে কিছু আধিপত্য বিস্তাৰ কৰিলেও শেষ হাঁহি মাৰে ক্ৰিষ্টিয়ানো ৰোনাল্ডোৰ পৰ্তুগালে। ৫৩ মিনিটত যোচিপ ষ্টানিছিচৰ নিখুঁত ক্ৰছত ইভান পেৰিছিচে চমৎকাৰ ফিনিছিং কৰি ক্ৰোৱেচিয়াক ১–০ ব্যৱধানত আগুৱাই নিয়ে। ইয়াৰ পিছত পৰ্তুগালৰ ওপৰত চাপ বৃদ্ধি পায়। ইয়াৰ মাজতে ৰাফায়েল লিয়াওৰ এটা দৃষ্টিনন্দন কাৰ্লিং শ্বট ক্ৰছবাৰত লাগি খেলপথাৰৰ মাজলৈ উভতি আহিলেও হতাশাত ভাগি পৰা নাছিল পৰ্তুগীজ সমৰ্থকসকলে, কাৰণ তেওঁলোকৰ বিশ্বাস আছিল যেতিয়ালৈ খেলপথাৰত ৰোনাল্ডো আছে তেতিয়ালৈ তেওঁলোকক আশাত বন্দী হৈয়ে থাকিব । আৰু যেন কিছু সময় পিছত ইয়াকেই প্ৰমাণ কৰি জীৱন্ত কিংবদন্তি ক্ৰিষ্টিয়ানো ৰোনাল্ডোৱে অতি চতুৰতাৰে এটা পেনাল্টী শ্বুট আউটক গ’ললৈ ৰূপান্তৰিত কৰিলে। ৬৮ মিনিটত ৪১ বছৰীয়া ৰোনাল্ডোৰ এই গলেৰে মেচখনৰ স্ক’ৰ ১–১ লৈ ৰূপান্তৰ হয়। বিশ্বাস কৰবিলৈ টান লাগিলেও এইটোৱেই আছিল বিশ্বকাপৰ নকআউট পৰ্যায়ত ৰোনাল্ডোৰ নিজৰ কেৰিয়াৰৰ প্ৰথমটো গ’ল। মেচখনৰ দ্বিতীয়াৰ্ধত আধা সময় পাৰ হোৱাৰ পিছত ক্ৰোৱেচিয়াই পৰ্তুগীজৰ ৰক্ষণবেহু ভেদি আক্ৰমণ তীব্ৰতৰ কৰি কেবাটাও শ্বট গ’লপোষ্টলৈ মাৰি পঠিয়ালেও পৰ্তুগালৰ গ’লকীপাৰ ডিয়াগো কোষ্টাৰ নিখুঁত শৈলীয়ে পুনৰবাৰ পৰ্তুগালক ৰক্ষা কৰিলে।
ৰোনাল্ডোৰ অসন্তুষ্টি
মেচখনৰ ৮০ মিনিটত ৰোনাল্ডোক ছাবষ্টিটিউট কৰি ৰুবেন নেভেছক নামোৱা হয়। টুৰ্ণামেণ্টখনত প্ৰথমবাৰৰ বাবে ছাবষ্টিটিউটৰ সন্মুখীন হোৱা ৰোনাল্ডো স্পষ্টভাৱে অসন্তুষ্ট হোৱা দেখা যায়। বেঞ্চত বহি তেওঁ উদ্বিগ্ন দৃষ্টিৰে শেষৰ নাটকীয় মুহূৰ্তবোৰ উপভোগ কৰে।
কিন্তু পৰৱৰ্তী মেচত নতুন উদ্যমেৰে পুনৰবাৰ খেলপথাৰত নমাৰ বাবে সেই সিদ্ধান্ত আছিল অতিকৈ গুৰুত্বপূৰ্ণ।ৰেগুলাৰ টাইমৰ শেষত ৰেফাৰীয়ে ১০ মিনিট ইঞ্জুৰী অতিৰিক্ত সময় ঘোষণা কৰাৰ লগে লগে মেচখন নতুন উত্তেজনাত ভৰি পৰে। ঠিক ৯৫(৯০+৫) মিনিটত আহে সেই সোণালী ক্ষণ। ৰাফায়েল লিয়াওৰ নিখুঁত ক্ৰছত গোঁকালো ৰামোছৰ এক শক্তিশালী হেডাৰে বল জালত প্ৰেৰণ কৰি পৰ্তুগালক ২–১ ব্যৱধানত আগুৱাই নিয়ে। ‘ছুপাৰ ছাব’ হিচাপে নামি তেওঁ দলটোক স্মৰণীয় জয় উপহাৰ দিয়ে।
কিছু ৰোমাঞ্চ আৰু শেষ মুহূৰ্তৰ বিতৰ্ক
কিন্তু খেলখনৰ ৰোমাঞ্চ ইয়াতেই শেষ হোৱা নাছিল। শেষ মুহূৰ্তত ক্ৰোৱেচিয়াই সমতা ঘূৰাই অনাৰ পূৰ্ণ চেষ্টাৰে পৰ্তুগালৰ গলপষ্টৰ জালত এটা বল মাৰি পঠিয়ায়, আৰু লগে লগে খেলুৱৈ আৰু সমৰ্থকসকল উল্লাসত ফাটি পৰে। কিন্তু VARত দৃশ্য পুনৰীক্ষণ কৰাৰ পিছত মাৰিঅ’ পাছালিচক অফছাইড ঘোষণা কৰি গ’ল বাতিল কৰে। মুহূৰ্ততে ক্ৰোৱেচিয়ান খেলুৱৈকসকলৰ এই হৰ্ষোল্লাস বিষাদলৈ পৰিণত হয়।
কিংবদন্তি লুকা মড্ৰিচৰ বিদায়
এই পৰাজয়ে ক্ৰোৱেচিয়াৰ সুৱৰ্ণ অধ্যায়ৰ অন্যতম নায়ক লুকা মড্ৰিচৰ বিশ্বকাপ যাত্ৰাৰ অন্ত পৰিল। ২০১৮ চনত দলটোক ফাইনেললৈ আৰু ২০২২ চনত তৃতীয় স্থানলৈ নিয়া এই কিংবদন্তি মিডফিল্ডাৰগৰাকীৰ বিদায় যেন ভবা মতে সুখকৰ নহ’ল।
এতিয়া Round of 16ত ফুটবল বিশ্বই আগ্ৰহেৰে অপেক্ষা কৰিছে পৰ্তুগাল আৰু স্পেইনৰ মাজৰ বহুল প্ৰতীক্ষিত মেচখনৰ বাবে, য’ত পুনৰ এবাৰ দেখা যাব ইউৰোপীয় দুই শক্তিধৰ দলৰ ৰোমাঞ্চকৰ সংঘৰ্ষ।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
