সোৱাদত অতুলনীয় জাম কেৱল এটা সুস্বাদু ফলেই নহয়, ই শৰীৰলৈ বহুতো স্বাস্থ্যগত উপকাৰো কঢ়িয়াই আনে। জামক লৈ বহু ধৰণৰ ধাৰণা প্ৰচলিত আছে। তাৰ ভিতৰত আটাইতকৈ জনপ্ৰিয় ধাৰণাটো হৈছে—জাম খালে ডায়বেটিছ বা ৰক্তত থকা চেনিৰ মাত্ৰা নিয়ন্ত্ৰণত থাকে। জামত ভিটামিন চি, পটাছিয়াম, মেগনেছিয়াম, আইৰন আৰু বিভিন্ন শক্তিশালী এণ্টিঅক্সিডেণ্ট থাকে। ইয়াত থকা ভিটামিন চিয়ে শৰীৰৰ ৰোগ-প্ৰতিৰোধ ক্ষমতা বৃদ্ধি কৰাত সহায় কৰে। বহুতে কেৱল জামেই নহয়, ইয়াৰ গুটি শুকুৱাই গুড়ি কৰি পানীৰ সৈতে খোৱাটোও উপকাৰী বুলি বিশ্বাস কৰে। বিশেষকৈ বহু মানুহৰ ধাৰণা, জামৰ গুটিৰ গুড়িয়ে ব্লাড ছুগাৰ নিয়ন্ত্ৰণত ৰাখে। কিন্তু এই ধাৰণাটো কিমান সত্য?
বিশেষজ্ঞসকলে কি কয়?
এগৰাকী এণ্ড’ক্ৰাইন’লজী বিশেষজ্ঞ ডাঃ নিশান্ত জৈনে কয় যে বহু বছৰ ধৰি জামক ডায়বেটিছ ৰোগীৰ বাবে উপকাৰী ফল বুলি ধৰা হৈছে। কিন্তু প্ৰথমেই এটা কথা স্পষ্টকৈ বুজি ল’ব লাগিব—জাম ডায়বেটিছৰ চিকিৎসা নহয় আৰু ই কেতিয়াও চিকিৎসকে দিয়া ঔষধৰ বিকল্প হ’ব নোৱাৰে। চিকিৎসকগৰাকীৰ মতে, জামক স্বাস্থ্যসন্মত আহাৰৰ এটা অংশ হিচাপে গ্ৰহণ কৰিব পাৰি। ই ডায়বেটিছ অধিক সুচাৰুৰূপে নিয়ন্ত্ৰণ কৰাত সহায় কৰিব পাৰে। জামত এন্থ’চায়ানিন, এলেজিক এচিড, ফ্লেভ’নইড আৰু জেম্ব’লিন আদি প্ৰাকৃতিক উপাদান থাকে। এইবোৰ এণ্টিঅক্সিডেণ্ট হিচাপে কাম কৰি শৰীৰৰ কোষসমূহক অক্সিডেটিভ ষ্ট্ৰেছৰ পৰা সুৰক্ষা দিয়ে। সহজ ভাষাত ক’বলৈ গ’লে, অক্সিডেটিভ ষ্ট্ৰেছ হৈছে শৰীৰৰ ভিতৰত হোৱা এক প্ৰকাৰৰ ক্ষতি, যিটো ডায়বেটিছ ৰোগীৰ ক্ষেত্ৰত অধিক দেখা যায়।
জামে কেনেকৈ সহায় কৰে?
কেইবাটাও প্ৰাথমিক গৱেষণাই ইংগিত দিয়ে যে জামে ষ্টাৰ্চক চেনিলৈ ৰূপান্তৰিত হোৱাৰ প্ৰক্ৰিয়াটো কিছু পৰিমাণে ধীৰ কৰিব পাৰে। লগতে শৰীৰত ইনচুলিনে সঠিকভাৱে কাম কৰাতো সহায় কৰিব পাৰে। অৱশ্যে এই বিষয়ত নিশ্চিত সিদ্ধান্তলৈ আহিবলৈ অধিক বিস্তৃত মানৱ-গৱেষণাৰ প্ৰয়োজন। ইনচুলিন হৈছে এনে এটা হৰম’ন, যিয়ে ৰক্তত থকা চেনিৰ মাত্ৰা নিয়ন্ত্ৰণত ৰাখে। ইয়াৰ উপৰিও জামত যথেষ্ট পৰিমাণে ফাইবাৰ থাকে আৰু ইয়াৰ গ্লাইচেমিক ইনডেক্স (GI) কম। সেইবাবে আন বহুতো মিঠা ফলৰ তুলনাত জাম খোৱাৰ পিছত ব্লাড ছুগাৰৰ মাত্ৰা তুলনামূলকভাৱে ধীৰগতিত বৃদ্ধি পায়।
অত্যধিক জাম খোৱাৰ ফলত কি হ’ব পাৰে?
বিশেষজ্ঞসকলে সতৰ্ক কৰি কয় যে বেছি জাম খালেই বেছি লাভ হয় বুলি ভাবিব নালাগে। অত্যধিক জাম খোৱাৰ ফলত কিছুমান লোকৰ কোষ্ঠকাঠিন্য, পেট ফুলি থকা বা বদহজমৰ দৰে সমস্যা হ’ব পাৰে। যদি আপুনি ইতিমধ্যে ডায়বেটিছৰ ঔষধ বা ইনচুলিন গ্ৰহণ কৰি আছে, তেন্তে জাম খোৱাৰ ক্ষেত্ৰত চিকিৎসকৰ পৰামৰ্শ মানি চলাটো জৰুৰী। আন এটা গুৰুত্বপূৰ্ণ কথা হ’ল—খালী পেটত জাম খাব নালাগে আৰু গাখীৰৰ সৈতে বা গাখীৰ খোৱাৰ ঠিক আগতে বা পিছতে জাম খাব নালাগে কিয়নো ইয়াৰ ফলত কিছুমান লোকৰ হজমৰ সমস্যা হ’ব পাৰে।
মনত ৰাখিবলগীয়া
যদি আপোনাৰ ডায়বেটিছ আছে, তেন্তে সঠিক পৰিমাণত জাম নিশ্চিন্তে খাব পাৰে। কিন্তু ইয়াৰ প্ৰকৃত উপকাৰ তেতিয়াহে পোৱা যাব যেতিয়া— সুষম আৰু পুষ্টিকৰ আহাৰ গ্ৰহণ কৰিব,নিয়মিত ব্যায়াম কৰিব,সময়ে সময়ে ব্লাড ছুগাৰ পৰীক্ষা কৰিব আৰু চিকিৎসকে নিৰ্দেশ দিয়া ঔষধ নিয়মমাফিক গ্ৰহণ কৰিব।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
