NEET পেপাৰ লীক কেলেংকাৰীৰ বিৰুদ্ধে প্ৰতিবাদ কৰি সমগ্ৰ দেশতে চৰ্চাৰ শীৰ্ষত থকা ছোনম ৱাংচুকৰ লাডাখস্থিত বাসগৃহটোৰ বিশেষ বিশেষত্ব আছে, সম্প্ৰতি ৱাংচুকৰ বাসগৃহটোক লৈও ব্যাপক চৰ্চা আৰম্ভ হৈছে। মাটি আৰু কাঠেৰে নিৰ্মিত ৱাংচুকৰ দুমহলীয়া ঘৰটো সম্পূৰ্ণৰূপে পৰিৱেশবান্ধৱ শৈলীৰে নিৰ্মাণ কৰা হৈছে। শূন্য ডিগ্ৰীৰ তলৰ তাপমাত্ৰাতো কোনো হিটাৰ ব্যৱহাৰ নকৰাকৈ ৱাংচুকৰ দুমহলীয়া প্ৰসাদোপম অট্টালিকাটো সকলো সময়তে উষ্ণতাৰে আৱৰি থাকে। কেৱল সেয়াই নহয়, পানী সংৰক্ষণৰ উদ্দেশ্যে মহলটোত আছে ফ্লাশ্ববিহীন শৌচালয়, য’ত পানীৰ সলনি কাঠৰ গুড়ি (বুৰাদা) ব্যৱহাৰ কৰা হয়। ৱাংচুকৰ প্ৰসাদোপম অট্টালিকাৰ কেইটামান বিশেষত্বৰ বিষয়ে জানো আহক
মাটিৰ দেৱাল আৰু প্ৰাকৃতিক হিটিং ব্যৱস্থা
সোনম ৱাংচুকৰ ঘৰটো লাডাখৰ বৰফেৰে আবৃত পাহাৰৰ মাজত মাটিৰে নিৰ্মাণ কৰা হৈছে। ইয়াত পৰম্পৰাগত তিব্বতীয় আৰু লাডাখী স্থাপত্যশৈলীৰ সুন্দৰ প্ৰতিফলন দেখা যায়। ঘৰৰ বাহিৰফালে ডাঙৰ ডাঙৰ কাঠৰ ফ্ৰেমযুক্ত আইনাৰ জানলা আছে, যিয়ে সন্মুখৰ সমগ্ৰ অংশটো ঢাকি ৰাখিছে। এই কাঁচৰ আঁৰত থকা ক’লা ৰঙৰ বিশেষ দেৱালে সূৰ্যৰ তাপৰ সৈতে মিলি ঘৰটোক উষ্ণ কৰি ৰাখে। সেয়ে শীতকালতো ঘৰ গৰম কৰি ৰাখিবলৈ তাত কোনো হিটাৰ ব্যৱহাৰ কৰা নহয়। ক’লা দেৱালখনৰ পিছফালে পানীৰ বটল সজাই ৰখা থাকে। দিনটো সূৰ্যৰ তাপৰ সহায়ত এই বটলবোৰে ৰাতি ঘৰটোৰ ভিতৰৰ তাপমাত্ৰা প্ৰায় ১৮ৰ পৰা ২০ ডিগ্ৰী চেলচিয়াছলৈ বজাই ৰাখে।
পৰম্পৰা আৰু আধুনিকতাৰ সুন্দৰ সংমিশ্ৰণ
ঘৰৰ ড্ৰয়িং ৰুমত মাটিৰ দেৱাল আৰু সুন্দৰ কাঠৰ ছাদৰ অপূৰ্ব সংমিশ্ৰণ দেখা যায়। মাটিৰ দেৱালবোৰে স্বাভাৱিকভাৱে কোঠাৰ তাপমাত্ৰা নিয়ন্ত্ৰণ কৰে, আনহাতে কাঠৰ নক্সাযুক্ত ছাদে ঘৰখনক পৰম্পৰাগত আৰু আৰামদায়ক ৰূপ প্ৰদান কৰে। মুকলি আৰু বতাহ চলাচল উপযোগী স্থানত আধুনিক ছোফাৰ লগতে এটা ভিণ্টেজ পিয়ানো আৰু খোৱা-বোৱাৰ বাবে পৰম্পৰাগত নিম্ন-উচ্চতাৰ ডাইনিং টেবুল আছে। ডাঙৰ জানলাৰে সোমোৱা প্ৰাকৃতিক পোহৰে সমগ্ৰ ড্ৰয়িং ৰূমটোক অধিক মনোমোহা কৰি তোলে।
সৰল অথচ মনোমোহা শয়নকক্ষ
সোনম ৱাংচুকৰ শয়নকক্ষ সৰলতা আৰু প্ৰাকৃতিক সৌন্দৰ্যৰ এক উৎকৃষ্ট উদাহৰণ। মাটিৰ দেৱালে কোঠাটোত এক শান্ত আৰু পৰম্পৰাগত অনুভূতি সৃষ্টি কৰিছে। দেৱালত সেউজীয়া নক্সাযুক্ত ফ্ৰেমৰ এখন সুন্দৰ আইনা সংস্থাপন কৰা হৈছে। আনটো অংশত পাতল ৰঙৰ কাঠেৰে নিৰ্মিত ডাঙৰ আলমাৰী আছে। ইয়াৰ কাষতে থকা সৰু কাঠৰ জানলাৰে যথেষ্ট প্ৰাকৃতিক পোহৰ সোমায়।
পৰিৱেশবান্ধৱ বাথৰুম
ছোনম ৱাংচুকৰ ঘৰৰ বাথৰুমটো আধুনিক সুবিধা আৰু পৰিৱেশ সুৰক্ষাৰ এক সুন্দৰ সংমিশ্ৰণ। ইয়াত কাঠৰ কাউণ্টাৰৰ ওপৰত এটা বগা চিৰামিকৰ ৱাশ্ব বেছিন স্থাপন কৰা হৈছে। ইয়াৰ ওপৰত হৃদয়ৰ আকাৰৰ এখন আকৰ্ষণীয় দাপোণ আৰু দেৱালত ডিজাইনাৰ টাইলছ লগোৱা আছে। গৰম পানীৰ বাবে আধুনিক ইলেক্ট্ৰিক গিজাৰ আৰু বতাহ-পোহৰৰ বাবে বাঁহৰ ব্লাইণ্ডযুক্ত জানলা আছে। ইয়াৰ উপৰিও পানীৰ অপচয় ৰোধ কৰিবলৈ বিশেষ ‘ইউৰিন-ছেপাৰেটেড টয়লেট’ ব্যৱহাৰ কৰা হৈছে। ইয়াত ফ্লাশ্বৰ বাবে পানীৰ সলনি কাঠৰ গুড়ি বা মাটি ব্যৱহাৰ কৰা হয়, যাৰ ফলত দুৰ্গন্ধও সৃষ্টি নহয়। সংগ্ৰহ কৰা এই আৱৰ্জনাক পিছত কৃষিকাৰ্যৰ বাবে জৈৱিক সাৰ হিচাপে ব্যৱহাৰ কৰা হয়।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
