T20 ক্ৰিকেটত সৰ্বকালৰ শ্ৰেষ্ঠতম বেটাৰসকলৰ ভিতৰত জোজ বাটলাৰকো ধৰা হয়। শেহতীয়াকৈ ইংলেণ্ডৰ উইকেটকীপাৰ বেটছমেন জোছ বাটলাৰে ৱেষ্ট ইণ্ডিজৰ কাইৰন পোলাৰ্ডৰ T20 ক্ৰিকেটত সৰ্বাধিক ৰান সংগ্ৰহৰ অভিলেখ ভংগ কৰিছে। কাইৰন পোলাৰ্ডৰ অভিলেখ ভংগ কৰাৰ পিছত তেওঁক সোধা হৈছিল যে ভৱিষ্যতে কোনে জোজ বাটলাৰৰ সৰ্বাধিক ৰানৰ অভিলেখ ভংগ কৰিব বুলি তেওঁ ভাবে। স্কাই স্প’ৰ্টছৰ ধাৰাভাষ্যকাৰৰ এই প্ৰশ্নটোৰ উত্তৰ বাটলাৰে অলপো সময় নষ্ট নকৰাকৈ দিলে এইদৰে, “ৰেকৰ্ড ভংগ কৰিবলৈয়ে গঢ়া হয়। মোৰ অভিলেখ ভংগ কৰা পৰৱৰ্তী বেটাৰজনৰ কথা ক’বলৈ গ’লে সেই নামটো হ’ব পাৰে ভাৰতীয় ক্ৰিকেটৰ বেটিং বিস্ময় বৈভৱ সূৰ্য্যবংশী।”
বাটলাৰে কয়, “যদি কোনোবাই মোৰ এই সৰ্বাধিক ৰানৰ অভিলেখ ভংগ কৰিব পাৰে, তেন্তে সেয়া নিশ্চিতভাৱে বৈভৱ সূৰ্য্যবংশীয়েই হ’ব আৰু সূৰ্যবংশীয়ে মোৰ এই অভিলেখটো ভংগ কৰিলে মই অতিকৈ গৌৰৱান্বিত অনুভৱ কৰিম।” ১৫ বছৰীয়া সূৰ্যবংশীৰ ওপৰত জোছ বাটলাৰৰ এই বিশ্বাসৰ আঁৰৰ কাৰণ হৈছে বৈভৱ সূৰ্যবংশীৰ বিস্ময়কৰ শৈলী আৰু ইমান কম বয়সতে দ্ৰুত উত্থান। বৈভৱৰ খেল আৰু বেটিং ভালদৰে নিৰীক্ষণ কৰিছে বাটলাৰে। বাটলাৰে লগতে কয়-কেৱল মোৰ এই ৰেকৰ্ডেই নহয়, আশা কৰিম বৈভৱে ক্ৰিকেটৰ বেটিং বিভাগৰ সকলো ৰেকৰ্ড ভংগ কৰক।
U-19ৰ ক্ৰিকেটৰ পৰা IPLলৈ নিজৰ বেটিং বিক্ৰমেৰে সকলোৰে দৃষ্টি আকৰ্ষণ কৰিছে বৈভৱে। জিম্বাবুৱেত খেলা তিনিখন মেচৰ T20 ছিৰিজত বৈভৱে সৰ্বাধিক ১৫১ ৰান সংগ্ৰহ কৰি প্লেয়াৰ অব দ্য ছিৰিজৰ সন্মান লাভ কৰে। বৈভৱৰ প্ৰশংসাত পঞ্চমুখ হৈ বাটলাৰে কয়- ‘বৈভৱৰ পক্ষত আছে তেওঁৰ বয়স। বৈভৱৰ বৰ্তমান বয়স মাত্ৰ ১৫ বছৰ। যদি তেওঁৰ ফিটনেছ আৰু ফৰ্ম অক্ষত থাকে তেন্তে অহা দুটা দশকলৈ তেওঁ ক্ৰিকেটত শাসন কৰিব পাৰিব তাত কোনো সন্দেহ নাই।’
The Hundred টুৰ্নামেণ্টৰ মানচেষ্টাৰ ছুপাৰজায়েণ্টছৰ অধিনায়ক জোজ বাটলাৰে ১৪,৮৩৩ ৰানেৰে ৱেষ্ট ইণ্ডিজৰ কাইৰন পোলাৰ্ডক অতিক্ৰম কৰি শীৰ্ষস্থানত অধিষ্ঠিত হৈছে। ১৪,৮০৩ ৰানেৰে পোলাৰ্ডে দ্বিতীয় স্থানত থকাৰ বিপৰীতে ১৪,৫৬২ ৰানেৰে তৃতীয় স্থানত আছে ইউনিভাৰ্ছেল বছ ক্ৰিছ গেইলে। অৱশ্যে আন্তঃৰাষ্ট্ৰীয় T20ত ৪৫৯৬ ৰানেৰে শীৰ্ষস্থানত আছে পাকিস্তানৰ বাবৰ আজম। ৪,২৩১ ৰানেৰে আন্তঃৰাষ্ট্ৰীয় T20ৰ দ্বিতীয় স্থানত আছে ৰোহিত শৰ্মা।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
