ৰাজনীতি এতিয়া কেৱল সভা-সমিতি, পদযাত্ৰা, জনসভা অথবা ঘৰে ঘৰে জনসংযোগতে সীমাবদ্ধ হৈ থকা নাই। স্মাৰ্টফোন আৰু ছ’চিয়েল মিডিয়াৰ যুগত ৰাজনৈতিক নেতাৰ জনপ্ৰিয়তা আৰু জনসংযোগৰ এক গুৰুত্বপূৰ্ণ মাপকাঠি হৈ পৰিছে ফেচবুক, ইনষ্টাগ্ৰাম, Youtube আদিৰ অনুসৰণকাৰীৰ সংখ্যা। মধ্যপ্ৰদেশৰ বিজেপিৰ এগৰাকী বিধায়কৰ বক্তব্যই এই নতুন ৰাজনৈতিক ধাৰণাটোক লৈ ব্যাপক চৰ্চাৰ সৃষ্টি কৰিছে।
বিজেপি বিধায়ক মহেন্দ্ৰ যাদৱে দলীয় কৰ্মীসকলৰ ছ’চিয়েল মিডিয়া সক্ৰিয়তাৰ ওপৰত বিশেষ গুৰুত্ব আৰোপ কৰি পদবী অনুসৰি ফ’ল’ৱাৰৰ লক্ষ্য নিৰ্ধাৰণ কৰাৰ কথা কৈছে। শেহতীয়াকৈ কোলাৰাছ বিধানসভা এলেকাত অনুষ্ঠিত বিজেপিৰ মণ্ডল বৈঠকত বিধায়কগৰাকীয়ে কয় যে সংগঠনৰ পদাধিকাৰীসকলৰ জৰিয়তে দলৰ বাৰ্তা অধিক লোকৰ ওচৰলৈ লৈ যাবলৈ ছ’চিয়েল মিডিয়াত শক্তিশালী উপস্থিতি প্ৰয়োজন।
মহেন্দ্ৰ যাদৱৰ বক্তব্য অনুসৰি, মণ্ডল সভাপতিৰ বাবে কমেও ২৫ হাজাৰ ফ’ল’ৱাৰ থকাটো প্ৰয়োজনীয় বুলি তেওঁ মত প্ৰকাশ কৰিছে। অৰ্থাৎ কোনো নেতাই মণ্ডল পৰ্যায়ৰ গুৰুত্বপূৰ্ণ সাংগঠনিক পদত থাকিব বিচাৰিলে তেওঁৰ ছ’চিয়েল মিডিয়া উপস্থিতিও শক্তিশালী হ’ব লাগিব। এই বক্তব্য প্ৰকাশ পোৱাৰ পিছতেই মধ্যপ্ৰদেশৰ ৰাজনৈতিক মহলত চৰ্চা আৰম্ভ হৈছে—ভৱিষ্যতে ৰাজনৈতিক নেতাৰ সাংগঠনিক দক্ষতা আৰু জনভিত্তিৰ লগতে ছ’চিয়েল মিডিয়াৰ ‘ৰিচ’ আৰু ‘ফ’ল’ৱাৰ’ সংখ্যাও গুৰুত্বপূৰ্ণ হৈ পৰিব নেকি?
কেৱল মণ্ডল সভাপতিৰ বাবেই নহয়, অন্যান্য সাংগঠনিক পদৰ বাবেও ফ’ল’ৱাৰৰ লক্ষ্যৰ কথা কোৱা হৈছে।
প্ৰকাশিত তথ্য অনুসৰি—
মণ্ডল সভাপতি — কমেও ২৫,০০০ ফ’ল’ৱাৰ
শক্তি কেন্দ্ৰৰ প্ৰভাৰী — কমেও ৫,০০০ ফ’ল’ৱাৰ
বুথ সভাপতি — কমেও ১,০০০ ফ’ল’ৱাৰ
কোলাৰাছৰ বৈঠকৰ পিছত এই বিষয়টো লৈ প্ৰকাশিত প্ৰতিবেদনসমূহত কোৱা হৈছে যে পদাধিকাৰীসকলৰ ছ’চিয়েল মিডিয়া ফ’ল’ৱাৰৰ তালিকাও প্ৰস্তুত কৰাৰ নিৰ্দেশ দিয়া হৈছে। পৰৱৰ্তী বৈঠকত কোনে কিমান ফ’ল’ৱাৰ বৃদ্ধি কৰিবলৈ সক্ষম হ’ল, সেই বিষয়টো পৰ্যালোচনা কৰাৰ কথাও প্ৰকাশ পাইছে।
বৈঠকত কেৱল তৃণমূল পৰ্যায়ৰ সাংগঠনিক কামৰ প্ৰতিবেদনেই নহয়, ছ’চিয়েল মিডিয়াত ফ’ল’ৱাৰ বৃদ্ধিৰ গতিও পৰ্যালোচনাৰ অংশ হ’ব পাৰে বুলি আলোচনা হৈছে। ডিজিটেল উপস্থিতি দুৰ্বল হোৱা পদাধিকাৰীৰ পদৰ ওপৰতো প্ৰভাৱ পৰাৰ আশংকাৰ কথা এক প্ৰতিবেদনত উল্লেখ কৰা হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
