ভাৰতৰ পৰা ৰাছিয়ালৈ চলিব ৰে’ল! পাকিস্তান হৈ পাৰ হ’ব সম্ভাব্য পথ!

ৰাছিয়াৰ পৰা ভাৰতলৈ পোনপটীয়াকৈ ৰে’ল যোগাযোগ স্থাপনৰ সম্ভাৱনাই নতুনকৈ চৰ্চা লাভ কৰিছে। ৰাছিয়াৰ উপ-প্ৰধানমন্ত্ৰী মাৰাত খুছনুলিনে ৰাছিয়াৰ পৰা ভাৰতলৈ ৰে’লপথেৰে যোগাযোগ স্থাপনৰ সম্ভাৱনাৰ কথা উল্লেখ কৰিছে। তেওঁৰ মতে, হিন্দ মহাসাগৰলৈ পোনপটীয়া ৰে’ল সংযোগ গঢ়ি তোলাৰ সম্ভাৱনাও বিবেচনা কৰা উচিত।
ৰাছিয়াৰ সংবাদ সংস্থা TASSক দিয়া এক সাক্ষাৎকাৰত খুছনুলিনে এই সম্ভাৱনাৰ কথা প্ৰকাশ কৰে। তেওঁৰ মতে, বৰ্তমানৰ সাগৰীয় পৰিবহণ ব্যৱস্থাৰ সৈতে জড়িত বিভিন্ন সমস্যা হ্ৰাস কৰাৰ বাবে বিকল্প স্থলপথৰ প্ৰয়োজন হ’ব পাৰে।

কোন কোন দেশৰ মাজেৰে যাব পাৰে সম্ভাব্য পথ?

সম্ভাব্য কৰিড’ৰ সন্দৰ্ভত ৰাছিয়াৰ উপ-প্ৰধানমন্ত্ৰীগৰাকীয়ে কয় যে বিকল্প পৰিবহণ পথ তুৰ্কমেনিস্তান, ইৰাণ, আফগানিস্তান আৰু পাকিস্তানৰ মাজেৰে যাব পাৰে।
তেওঁ লগতে কয় যে ভাৰতৰ সৈতে সংযোগ স্থাপন কৰিব পৰা যিকোনো ব্যৱহাৰিক পথকেই বিবেচনা কৰিব পৰা যাব। যদি এই পৰিকল্পনা বাস্তৱায়িত হয়, তেন্তে ৰাছিয়া আৰু ভাৰতৰ মাজত পোনপটীয়া স্থলপথেৰে ৰে’ল মালবাহী যোগাযোগৰ এক নতুন দুৱাৰ মুকলি হ’ব পাৰে। ইয়াৰ ফলত দুয়োখন দেশৰ মাজত বাণিজ্য আৰু সামগ্ৰী পৰিবহণ অধিক সুগম কৰাৰ সম্ভাৱনা আছে।

কিয় বিকল্প পথৰ প্ৰয়োজন অনুভৱ কৰিছে ৰাছিয়াই?

খুছনুলিনৰ মতে, বছফৰাছ আৰু হৰমুজ প্ৰণালীৰ সৈতে জড়িত পৰিবহণৰ সমস্যাৰ বাবে বিকল্প পথৰ সন্ধান কৰাটো গুৰুত্বপূৰ্ণ হৈ পৰিছে। তেওঁ উল্লেখ কৰে যে হিন্দ মহাসাগৰলৈ ৰে’লপথেৰে সংযোগ স্থাপনৰ সম্ভাৱনা অনুসন্ধান কৰা উচিত। তুৰ্কমেনিস্তান, ইৰাণ, আফগানিস্তান আৰু পাকিস্তান হৈ ভাৰতলৈ সংযোগ স্থাপন কৰিব পৰা পথসমূহ এই ক্ষেত্ৰত সম্ভাব্য বিকল্প হ’ব পাৰে। অৰ্থাৎ, ৰাছিয়াৰ লক্ষ্য কেৱল ভাৰতৰ সৈতে নতুন ৰে’ল যোগাযোগ স্থাপন কৰাই নহয়, বৰং আন্তঃৰাষ্ট্ৰীয় বাণিজ্যৰ বাবে বৰ্তমানৰ সাগৰীয় পথৰ ওপৰত থকা নিৰ্ভৰশীলতা কিছু পৰিমাণে হ্ৰাস কৰাও।

হৰমুজৰ পৰিস্থিতিয়ে বৃদ্ধি কৰিছে উদ্বেগ

হৰমুজ প্ৰণালী বিশ্বৰ অন্যতম গুৰুত্বপূৰ্ণ সামুদ্ৰিক বাণিজ্যিক পথ। মধ্যপ্ৰাচ্যৰ শেহতীয়া সামৰিক সংঘাত আৰু উত্তেজনাৰ ফলত এই পথৰ নিৰাপত্তা আৰু সাগৰীয় পৰিবহণক লৈ উদ্বেগ বৃদ্ধি পাইছে। উল্লেখযোগ্য যে হৰমুজ প্ৰণালীৰে বিশ্বৰ তেল বাণিজ্যৰ প্ৰায় ২৫ শতাংশ আৰু বিশ্বৰ LNG পৰিবহণৰ প্ৰায় ২০ শতাংশ সম্পন্ন হয়। সেয়েহে এই পথত কোনো ধৰণৰ বাধা বা অস্থিৰতা সৃষ্টি হ’লে বিশ্বৰ শক্তি বজাৰ আৰু আন্তঃৰাষ্ট্ৰীয় যোগান শৃংখলত ইয়াৰ প্ৰভাৱ পৰিব পাৰে। এই পৰিস্থিতিত ৰাছিয়াই স্থলপথেৰে নতুন আন্তঃৰাষ্ট্ৰীয় পৰিবহণ কৰিড’ৰ গঢ়ি তোলাৰ সম্ভাৱনাক গুৰুত্ব দিয়া বুলি ধাৰণা কৰা হৈছে। সাক্ষাৎকাৰটোত খুছনুলিনে কেৱল আন্তঃৰাষ্ট্ৰীয় পৰিবহণ কৰিড’ৰৰ কথাই কোৱা নাই। ৰাছিয়াৰ ঘৰুৱা নিৰ্মাণ খণ্ডৰ উন্নয়নৰ বাবেও অধিক বিনিয়োগৰ প্ৰয়োজনীয়তাৰ কথা উল্লেখ কৰিছে।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ