অযোধ্যাৰ ৰাম মন্দিৰ দানপাত্ৰৰ ধন চুৰিৰ অভিযোগক লৈ সৃষ্টি হোৱা বিতৰ্কৰ মাজতে বিশেষ তদন্তকাৰী দল (SIT)ৰ চূড়ান্ত প্ৰতিবেদন পোহৰলৈ আহিছে। এই প্ৰতিবেদন অনুসৰি, শ্ৰী ৰাম জন্মভূমি তীৰ্থ ক্ষেত্ৰ ট্ৰাষ্টৰ প্ৰাক্তন সাধাৰণ সম্পাদক চম্পট ৰায় আৰু প্ৰাক্তন সদস্য অনিল মিশ্ৰৰ বিৰুদ্ধে কোনো অপৰাধমূলক ভূমিকা পোৱা হোৱা নাই। অৰ্থাৎ, SITৰ চূড়ান্ত প্ৰতিবেদনত এই দুয়োৰাকীকে ক্লীন-শ্বীট দিয়া হৈছে। SIT-এ চৰকাৰক দাখিল কৰা চূড়ান্ত প্ৰতিবেদনখন পৰৱৰ্তী প্ৰক্ৰিয়াৰ বাবে শ্ৰী ৰাম জন্মভূমি তীৰ্থ ক্ষেত্ৰ ট্ৰাষ্টক অৰ্পণ কৰা হৈছে।
সূত্ৰ অনুসৰি, SITৰ প্ৰতিবেদনত ৮ জন ব্যক্তিৰ নাম উল্লেখ কৰা হৈছে। এই ৮ অভিযুক্তৰ বিৰুদ্ধে ইতিমধ্যে আৰক্ষীয়ে ব্যৱস্থা গ্ৰহণ কৰিছে। তেওঁলোকৰ বিৰুদ্ধে FIR পঞ্জীয়ন কৰাৰ লগতে আটাইকেইজনক গ্ৰেপ্তাৰো কৰা হৈছে। এই দান-ধন সম্পৰ্কীয় বিষয়টো প্ৰথমে পোহৰলৈ অহাৰ পিছত চম্পট ৰায় আৰু অনিল মিশ্ৰৰ ভূমিকাক লৈও প্ৰশ্ন উত্থাপন হৈছিল। ইয়াৰ পিছতে দুয়োগৰাকীয়ে নিজৰ পদৰ পৰা পদত্যাগ কৰিছিল। কিন্তু যোগী চৰকাৰে গঠন কৰা প্ৰথম SITৰ তদন্তত তেওঁলোকৰ বিৰুদ্ধে অপৰাধমূলক ভূমিকা পোৱা নগ’ল।
লক্ষ্ণৌৰ সংমণ্ডল আয়ুক্ত বিজয় বিশ্বাস পণ্টৰ নেতৃত্বত এই SIT গঠন কৰা হৈছিল। দলটোৰ আন দুগৰাকী সদস্য আছিল আৰক্ষী মহাপৰিদৰ্শক কিৰণ এছ আৰু বিশেষ সচিব (বিত্ত) নীল ৰতন কুমাৰ। বিগত ২৩ জুনত SIT-এ ৰাজ্য চৰকাৰক প্ৰাৰম্ভিক প্ৰতিবেদন দাখিল কৰিছিল। প্ৰতিবেদনখনত বিষয়টোৰ সন্দৰ্ভত কেইবাটাও কঠোৰ পৰামৰ্শ আগবঢ়োৱা হৈছিল। এই প্ৰাৰম্ভিক প্ৰতিবেদনৰ ভিত্তিত ২৫ জুনত ৮ জনৰ নাম উল্লেখ থকা অভিযুক্ত আৰু আন কেইবাগৰাকী অচিনাক্ত ব্যক্তিৰ বিৰুদ্ধে FIR ৰুজু কৰা হয়।
ট্ৰাষ্টৰ সদস্য কৃষ্ণমোহনে শ্ৰী ৰাম জন্মভূমি থানাত দাখিল কৰা লিখিত অভিযোগৰ ভিত্তিত FIR ৰুজু কৰা হৈছিল। FIRত নাম উল্লেখ কৰা ৮ জন লোক হৈছে— অবিনাশ শুক্লা, অনুকল্প মিশ্ৰ, লাভকুশ মিশ্ৰ, মনীষ কুমাৰ যাদৱ, কৰুনেশ পাণ্ডে, ৰামাশংকৰ মিশ্ৰ, সুভাষ শ্ৰীবাস্তৱ আৰু ৰাম শংকৰ যাদৱ ওৰফে টিনু। এই অভিযুক্তসকলৰ বিৰুদ্ধে ভাৰতীয় দণ্ডবিধিৰ সংশ্লিষ্ট ধাৰাৰ লগতে দুৰ্নীতি প্ৰতিৰোধ আইনৰ ১৩(১)(ক) ধাৰাত গোচৰ ৰুজু কৰা হৈছিল।
ইয়াত এটা গুৰুত্বপূৰ্ণ কথা আছে। চম্পট ৰায় আৰু অনিল মিশ্ৰক ক্লীন-শ্বীট দিয়া প্ৰতিবেদনখন যোগী চৰকাৰে গঠন কৰা প্ৰথম SITৰ তদন্তৰ ফলাফল। আনহাতে, এই বিষয়টোক লৈ এতিয়া উচ্চতম ন্যায়ালয়ৰ তত্বাৱধানত গঠন হোৱা দ্বিতীয়খন SIT-এ পৃথকভাৱে তদন্ত চলাই আছে। সেয়েহে প্ৰথম SITৰ প্ৰতিবেদন প্ৰকাশ পোৱাৰ পিছতো বিষয়টোৰ তদন্ত সম্পূৰ্ণৰূপে শেষ হোৱা বুলি ক’ব পৰা নাযায়। প্ৰথম SITৰ তদন্তত চম্পট ৰায় আৰু অনিল মিশ্ৰৰ বিৰুদ্ধে অভিযোগৰ প্ৰমাণ পোৱা নগ’লেও, একে বিষয়তে উচ্চতম ন্যায়ালয়ৰ তত্বাৱধানত আন এখন SITৰ তদন্ত চলি থকাৰ বাবে এই বিষয়টো এতিয়াও সম্পূৰ্ণৰূপে নিষ্পত্তি হোৱা নাই।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
