ভয়ংকৰ পথ দুৰ্ঘটনাৰ পৰা ৰক্ষা পৰিছে গ্ৰেট খালী ওৰফে দলীপ সিং ৰাণা। হাৰিয়ানাৰ পানীপাট টোল প্লাজাৰ সন্মুখত তেওঁৰ এছ ইউ ভিখনে আন এখন বাহনৰ সৈতে সংঘৰ্ষত লিপ্ত হয়। ঘটনাৰ কিছু সময়ৰ পিছতে এটা ভিডিঅ’ ভাইৰেল হৈ পৰে ছ’চিয়েল মিডিয়াত। য’ত খালীৰ গাড়ীৰ সন্মুখভাগ বেয়াকৈ ক্ষতিগ্ৰস্ত হোৱা দেখা যায়। এই দৃশ্য দেখি অনুৰাগীসকল ভয় খাইছিল। মৰমৰ তাৰকাগৰাকীয়ে বেছি আঘাত পাইছে নেকি?
অৱশ্যে তেওঁ নিজৰ অনুৰাগীক বেছি সময় চিন্তিত হ’ব দিয়া নাছিল। তেওঁ নিজেই চেলফি কেমেৰাৰে মোবাইল ফোনটো ধৰি ভিডিঅ’ বনাই ছ’চিয়েল মিডিয়াত আপলোড কৰে। তেওঁ কয়, “দুৰ্ঘটনাৰ খবৰ বিয়পি পৰাৰ পিছৰে পৰা মোৰ ইটোৰ পিছত সিটোকৈ ফোন আহি আছে। সকলোৱে সুধিছে মোৰ স্বাস্থ্য কেনেকুৱা। আপোনাৰ আৰু ভগৱানৰ কৃপাত মই সম্পূৰ্ণ ভালেই আছো।” তেওঁ হাঁহি হাঁহি আৰু কয় যে গাড়ীখনৰ কিছু ক্ষতিগ্ৰসন্থ হৈছে যদিও সেয়া কোনো ডাঙৰ কথা নহয়। তেওঁ বিচাৰিছিল যে বিষয়টোক লৈ কোনো অপ্ৰয়োজনীয় হুলস্থুল নহওক। শেষত অনুৰাগীসকলক তেওঁলোকৰ মৰম আৰু প্ৰাৰ্থনাৰ বাবে ধন্যবাদ জনাই তেওঁ কয়, ‘সকলোৱে সাৱধান হওক। নিজৰ যত্ন লোৱা। জয় ভাৰত!’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
