মধ্যপ্ৰদেশৰ ধৰ্মীয় নগৰী উজ্জয়িনীত সংঘটিত এটা ঘটনাই বৰ্তমান চৰ্চা লাভ কৰিছে। সিংহস্থ ২০২৮ৰ প্ৰস্তুতিৰ বাবে চলি থকা পথ বহলীকৰণৰ কামৰ মাজতে প্ৰায় ১৭০ বছৰ পুৰণি ‘খড়ে হনুমান’ মন্দিৰৰ হনুমানৰ মূৰ্তি স্থানান্তৰক লৈ সৃষ্টি হৈছে এক বিশেষ পৰিস্থিতি। পথ বহল কৰাৰ বাবে মন্দিৰৰ মূল গাঁথনি ভাঙি পেলোৱাৰ পাছতো মূৰ্তিটো নিজৰ ঠাইৰ পৰা লৰাব পৰা নগ’ল। উজ্জয়িনীৰ কণ্ঠাল চৌৰাহাৰ পৰা ছত্ৰী চৌকলৈ যোৱা পথটো সিংহস্থ ২০২৮ৰ প্ৰস্তুতিৰ অংশ হিচাপে বহল কৰা হৈছে। এই পথৰ কামৰ ভিতৰত ‘খড়ে হনুমান’ মন্দিৰটোও পৰিছিল। মন্দিৰটোৰ ইতিহাস প্ৰায় ১৭০ বছৰ পুৰণি বুলি কোৱা হয় আৰু মন্দিৰৰ সৈতে জড়িত লোকসকলে ইয়াৰ প্ৰতিষ্ঠা ১৮৫৭ চনৰ আশে-পাশে হোৱা বুলি দাবী কৰিছে।
পথ বহলীকৰণৰ বাবে মন্দিৰৰ বহু অংশ ইতিমধ্যে আঁতৰোৱা হৈছে। ইয়াৰ পাছত প্ৰায় ৮ ফুট ওখ থিয় হৈ থকা হনুমানৰ মূৰ্তিটো নতুন স্থানলৈ স্থানান্তৰ কৰাৰ চেষ্টা কৰা হয়। প্ৰশাসন আৰু পৌৰসভাৰ কৰ্মচাৰীয়ে ক্ৰেন, JCB আৰু অন্যান্য গধুৰ যন্ত্ৰ ব্যৱহাৰ কৰিও মূৰ্তিটো লৰাবলৈ চেষ্টা কৰে। কিন্তু কেইবাবাৰো চেষ্টা কৰিও মূৰ্তিটো নিজৰ স্থানৰ পৰা আঁতৰাব পৰা নগ’ল। খবৰ অনুসৰি, কেইবাদিন ধৰি চলা এই প্ৰচেষ্টাত প্ৰায় চাৰিবাৰ চেষ্টা কৰা হৈছিল। কিন্তু প্ৰতিবাৰেই মূৰ্তিটো একে ঠাইতে থাকি যায়। মূৰ্তিটোৰ ক্ষতি হোৱাৰ আশংকাত পিছত গধুৰ যন্ত্ৰ ব্যৱহাৰ বন্ধ কৰি দিয়া হয়।
মূৰ্তিটো কিয় লৰাব পৰা নাই, সেই কথা জানিবলৈ ইয়াৰ তলৰ অংশ আৰু মাটিৰ অৱস্থা পৰীক্ষা কৰাৰ সিদ্ধান্ত লোৱা হৈছে। ইয়াৰ বাবে মূৰ্তিটোৰ চাৰিওফালে প্ৰায় ডেৰ ফুটলৈকে খনন কৰা হৈছে বুলি খবৰ প্ৰকাশ পাইছে। এতিয়া পুৰাতত্ত্ব বিশেষজ্ঞসকলে বিশেষ প্ৰযুক্তিৰ সহায়ত মূৰ্তিৰ ভেটি আৰু ইয়াৰ তলৰ মাটিৰ অৱস্থা স্কেন কৰিব। তাৰ পাছতহে মূৰ্তিটো কেনেদৰে নিৰাপদে স্থানান্তৰ কৰিব পাৰি সেই বিষয়ে সিদ্ধান্ত লোৱা হ’ব।
এই ঘটনাৰ পাছত বহু ভক্ত মন্দিৰৰ ওচৰত সমবেত হৈছে। বহু লোকৰ বাবে এই মন্দিৰ কেৱল উপাসনাৰ স্থান নহয়, বৰং বহু দশক ধৰি চলি অহা বিশ্বাস আৰু পৰম্পৰাৰ প্ৰতীক। মন্দিৰৰ গাঁথনি ভাঙি পেলোৱাৰ সময়তো বহু ভক্ত আৱেগিক হৈ পৰা দেখা যায়। মূৰ্তিটো যন্ত্ৰৰ সহায়তো নলৰাত একাংশ ভক্তই ইয়াক ‘হনুমানজীৰ ইচ্ছা’ বা অলৌকিক ঘটনা বুলি বিশ্বাস কৰিছে। অৱশ্যে প্ৰশাসনৰ ফালৰ পৰা ইয়াক কাৰিকৰী আৰু পুৰাতাত্ত্বিকভাৱে পৰীক্ষা কৰিহে পৰৱৰ্তী সিদ্ধান্ত লোৱাৰ প্ৰস্তুতি চলিছে। ইফালে, মন্দিৰৰ ওচৰত প্ৰায় ৫০টা বান্দৰ হঠাতে সমবেত হোৱা ঘটনায়ো বিষয়টো অধিক চৰ্চিত কৰি তুলিছে। এই ঘটনাৰ ভিডিঅ’ সামাজিক মাধ্যমত ভাইৰেল হোৱাৰ পাছত মন্দিৰটোলৈ ভক্তৰ ভিৰ বৃদ্ধি পায়। সেয়েহে, উজ্জয়িনীৰ এই ১৭০ বছৰ পুৰণি ‘খড়ে হনুমান’ মন্দিৰৰ ঘটনা এতিয়া কেৱল এটা পথ বহলীকৰণৰ বিষয় হৈ থকা নাই। এফালে সিংহস্থ ২০২৮ৰ বাবে নগৰ উন্নয়নৰ প্ৰয়োজনীয়তা, আনফালে পুৰণি ধৰ্মীয় ঐতিহ্য আৰু ভক্তসকলৰ আৱেগ—দুয়োটাৰ মাজত ভাৰসাম্য ৰখাটো প্ৰশাসনৰ বাবে এতিয়া এক ডাঙৰ প্ৰত্যাহ্বান হৈ পৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
