সামাজিক মাধ্যমত এতিয়া জনপ্ৰিয় হৈ পৰা ‘80s AI Trend’-এ কেৱল মানুহক পুৰণি দশকৰ ৰূপত দেখুওৱাই নহয়, বৰং ৪৫ বছৰৰ পুৰণি এটা চুৰিৰ ঘটনাও পোহৰলৈ অনাত সহায় কৰিছে। মধ্যপ্ৰদেশৰ উজ্জয়িনীত প্ৰায় ৪৫ বছৰ পূৰ্বে এখন গহণাৰ দোকানৰ পৰা সোণৰ হাৰ চুৰি কৰি পলাই যোৱা এগৰাকী মহিলাক এই AI ট্ৰেণ্ডৰ জৰিয়তে চিনাক্ত কৰাৰ ঘটনা পোহৰলৈ আহিছে।
তথ্য অনুসৰি, ঘটনাটো উজ্জয়িনীৰ এখন সৰু গহণাৰ দোকানত সংঘটিত হৈছিল। প্ৰায় ৪৫ বছৰ পূৰ্বে এগৰাকী যুৱতী গহণাৰ দোকানখনলৈ গৈছিল। সোণৰ হাৰ চোৱাৰ অজুহাতত দোকানত কিছু সময় থকাৰ পাছত সুযোগ বুজি তেওঁ এডাল সোণৰ হাৰ লৈ পলায়ন কৰে। সেই সময়ত আৰক্ষীয়ে মহিলাগৰাকীক বিচাৰি অভিযান চলাইছিল যদিও তেওঁৰ কোনো সন্ধান উলিয়াব পৰা নাছিল। পিছত মহিলাগৰাকীয়ে নিজৰ পৰিচয় সলনি কৰি আন ঠাইত সাধাৰণ জীৱন কটাবলৈ আৰম্ভ কৰা বুলি প্ৰতিবেদনত প্ৰকাশ পাইছে। সময়ৰ লগে লগে ঘটনাটো এটা পুৰণি, অমীমাংসিত গোচৰত পৰিণত হৈছিল।
শেহতীয়াকৈ সামাজিক মাধ্যমত নতুন এটা AI ট্ৰেণ্ড ব্যাপকভাৱে জনপ্ৰিয় হৈ পৰিছে। এই ট্ৰেণ্ডত বৰ্তমানৰ ফটো AI টুলত দি ব্যক্তিগৰাকীক ১৯৮০ৰ দশকৰ মানুহৰ দৰে দেখুওৱা হয়। পুৰণি সময়ৰ সাজ-পোছাক, চুলি, পটভূমি, পুৰণি কেমেৰাৰ দৰে ৰং আৰু অন্যান্য বৈশিষ্ট্য যোগ কৰি ফটোখনক সেই সময়ৰ ফটোৰ ৰূপ দিয়া হয়। অভিনেতা-অভিনেত্ৰীৰ পৰা সাধাৰণ ছ’চিয়েল মিডিয়া ব্যৱহাৰকাৰীলৈ বহুতে এই ট্ৰেণ্ডত অংশ লৈছে।
প্ৰতিবেদন অনুসৰি, বহু বছৰৰ পাছত এতিয়া বৃদ্ধা হোৱা সেই মহিলাগৰাকীয়েও এই ভাইৰেল ট্ৰেণ্ডত অংশ লৈছিল। তেওঁ নিজৰ এখন ফটো AIৰ সহায়ত ১৯৮০ৰ দশকৰ ৰূপত সজাই সামাজিক মাধ্যমত প্ৰকাশ কৰে। পৰৱৰ্তী সময়ত মহিলাগৰাকীৰ বাবে এই ফটোখনেই সমস্যাৰ কাৰণ হৈ পৰে। মহিলাগৰাকীৰ AI-ৰে তৈয়াৰ কৰা ফটোখন উজ্জয়িনীৰ সেই গহণাৰ দোকানৰ মালিকৰ চকুত পৰে। প্ৰায় ৪৫ বছৰ পুৰণি ঘটনা হ’লেও দোকানৰ মালিকে চুৰিৰ সময়ত দেখা যুৱতীগৰাকীৰ মুখৰ সৈতে AI ফটোখনৰ সাদৃশ্য লক্ষ্য কৰে বুলি প্ৰতিবেদনত কোৱা হৈছে।
ফটোখন দেখি সন্দেহ হোৱাত দোকানৰ মালিকে আৰক্ষীক বিষয়টো জনায়। ইয়াৰ পিছত আৰক্ষীয়ে সামাজিক মাধ্যমৰ প্ৰফাইল আৰু মহিলাগৰাকীৰ পৰিচয়ৰ বিষয়ে তদন্ত আৰম্ভ কৰে। আৰক্ষীৰ জেৰাৰ সময়ত মহিলাগৰাকীয়ে বহু বছৰ পূৰ্বে সংঘটিত সেই সোণৰ হাৰ চুৰিৰ কথা স্বীকাৰ কৰে। এটা সাধাৰণ বিনোদনমূলক AI ট্ৰেণ্ডত অংশ লোৱাৰ ফলতেই বহু বছৰ ধৰি গোপন হৈ থকা তেওঁৰ পুৰণি পৰিচয়ৰ সৈতে জড়িত এটা সূত্র পুনৰ মানুহৰ চকুত পৰে। তাৰ পিছত সেই সূত্রৰ ভিত্তিত আৰক্ষীৰ তদন্ত আগবাঢ়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
