বিজয়া দশমীৰ আনন্দ-উল্লাসৰ মাজতে ৰাজ্যবাসীৰ বাবে আহিল এক দুখবৰ। উৎসৱৰ আনন্দৰ মাজতে অসমৰ বিভিন্ন প্ৰান্তত সংঘটিত পৃথক পৃথক পথ দুৰ্ঘটনাই প্ৰাণ কাঢ়ি নিলে ৬জন লোকৰ। ছিপাঝাৰ, লংকা, গোলাঘাট, দেৰগাঁও আৰু মেৰাপানীত সংঘটিত এই শোকাৱহ দুৰ্ঘটনাসমূহে শোকৰ ছাঁ পেলাইছে। নিহতসকলৰ ভিতৰত আছে বিজেপি যুৱ মৰ্চাৰ এজন কাৰ্যকৰ্তা আৰু এগৰাকী আৰক্ষী কনিষ্টবল।
ছিপাঝাৰত বাইকৰ সংঘৰ্ষ, নিহত দুজন
ছিপাঝাৰত সংঘটিত এক ভয়ংকৰ পথ দুৰ্ঘটনাত মৃত্যু হয় বিজেপি যুৱ মৰ্চাৰ কাৰ্যকৰ্তা অশ্বিনী কুমাৰ নাথৰ। জানিব পৰা মতে, পূজা চাই ঘৰলৈ উভতি অহাৰ পথতে দুখন বাইকৰ মাজত সংঘৰ্ষৰ ফলত এই শোকাৱহ ঘটনা সংঘটিত হয়। এই দুৰ্ঘটনাটোতে প্ৰাণ হেৰুৱায় ভেৱাৰঘাটৰ দ্বীপ দাসেও।
দুৰ্ঘটনাটোত গৌতম মণ্ডল আৰু প্ৰশন্ন নাথ নামৰ আন দুজন লোক আহত হয়। আহত দুয়োকে চিকিৎসাৰ বাবে চিকিৎসালয়লৈ প্ৰেৰণ কৰা হয়।
লংকাত আৰক্ষীৰ বাহনৰ ভয়ংকৰ দুৰ্ঘটনা, কনিষ্টবলৰ মৃত্যু
লংকাত নিশা সংঘটিত হয় আন এক ভয়ংকৰ পথ দুৰ্ঘটনা। এই দুৰ্ঘটনাত মৃত্যু হয় আৰক্ষী কনিষ্টবল দেৱাশীষ নাথৰ। আনহাতে, শংকৰদেৱ নগৰ পহৰা চকীৰ উপ-পৰিদৰ্শক নিলোৎপল শইকীয়া আহত হয়।
দুৰ্ঘটনাটোত লেঞ্চ নায়ক মৃদুল বৰদলৈ আৰু গৃহৰক্ষী জোৱান প্ৰণৱ থাউচেন গুৰুতৰভাৱে আহত হোৱা বুলি জানিব পৰা গৈছে। উৎসৱৰ নিশা সংঘটিত এই দুৰ্ঘটনাই আৰক্ষী বিভাগতো শোকৰ পৰিৱেশ সৃষ্টি কৰিছে।
গোলাঘাটত বাইকৰ খুন্দাত প্ৰাণ গ’ল দিগন্ত গড়ৰ
গোলাঘাটতো পূজা চাই ঘৰলৈ উভতি অহাৰ পথতে প্ৰাণ হেৰুৱায় এজন যুৱকে। নাহৰবাৰীৰ দিগন্ত গড় নামৰ যুৱকজনক এখন তীব্ৰবেগী বাইকে খুন্দা মৰাৰ ফলত তেওঁৰ মৃত্যু হয়। বিজয়া দশমীৰ আনন্দৰ মাজতে সংঘটিত এই ঘটনাই অঞ্চলটোত শোকৰ ছাঁ পেলাইছে।
দেৰগাঁৱৰ নেঘেৰিটিঙত নিহত প্ৰীতম দাস
দেৰগাঁৱৰ নেঘেৰিটিঙতো সংঘটিত হয় আন এক শোকাৱহ পথ দুৰ্ঘটনা। এই দুৰ্ঘটনাত বিলতিয়া গাঁৱৰ প্ৰীতম দাসৰ মৃত্যু হয়। জানিব পৰা মতে, চাৰ্ভিছ ৰোডেৰে গৈ থকা এখন ই-ৰিক্সাক পিছফালৰ পৰা এখন বাইকে প্ৰচণ্ড জোৰে খুন্দা মাৰে। এই সংঘৰ্ষৰ ফলতেই প্ৰাণ হেৰুৱায় প্ৰীতম দাসে।
মেৰাপানীত দুখন বাইকৰ সংঘৰ্ষ, নিহত জান্টু বৰা
মেৰাপানীতো দুখন বাইকৰ মাজত সংঘটিত হয় ভয়ংকৰ সংঘৰ্ষ। এই দুৰ্ঘটনাত জান্টু বৰা নামৰ এজন লোকৰ মৃত্যু হয়। আনহাতে, দুৰ্ঘটনাটোত তন্ময় সোণোৱাল, বিশ্বজিৎ ঠেঙাল আৰু হেমন্ত ঠেঙাল আহত হয়।
উৎসৱৰ আনন্দৰ মাজতে শোকৰ ছাঁ
বিজয়া দশমীৰ দৰে উৎসৱৰ দিনটোত ৰাজ্যৰ বিভিন্ন প্ৰান্তত সংঘটিত এই পথ দুৰ্ঘটনাসমূহে পুনৰ এবাৰ পথ সুৰক্ষাৰ বিষয়টোক চৰ্চালৈ আনিছে। পূজা-পাৰ্বণৰ সময়ত ৰাজপথত যান-বাহনৰ চলাচল বৃদ্ধি পোৱাৰ লগতে অসাৱধানতা আৰু তীব্ৰবেগে ভয়ংকৰ পৰিণতি মাতি আনিব পাৰে।
সেয়ে বাহন চলোৱাৰ সময়ত যান-বাহন চালকসকলে সতৰ্কতা অৱলম্বন কৰা, যান-বাহন আইন মানি চলা আৰু তীব্ৰবেগ পৰিহাৰ কৰাটো অত্যন্ত জৰুৰী। অলপ অসাৱধানতাই যে এখন পৰিয়াললৈ আজীৱন দুখ কঢ়িয়াই আনিব পাৰে, বিজয়া দশমীৰ দিনা সংঘটিত এই শোকাৱহ ঘটনাসমূহে তাৰেই পুনৰ প্ৰমাণ দাঙি ধৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
