দীপাৱলীৰ আনন্দৰ মাজতে এক মৰ্মান্তিক ঘটনাই সকলোকে শোকস্তব্ধ কৰি তুলিছে। বেলুন ফুলাই থকা অৱস্থাতে এটি ১০ বছৰীয়া কন্যাৰ ডিঙিত বেলুনটো লাগি মৃত্যু হোৱা ঘটনাই সকলোকে শোকাহত কৰি তুলিছে। আন শিশুৰ সৈতে আনন্দেৰে খেলি থকাৰ সময়তে এই দুৰ্ঘটনা সংঘটিত হয়। বেলুনটো ডিঙিত আবদ্ধ হৈ পৰাৰ ফলত নন্দিনী নামৰ ভুক্তভোগী কন্যাটিৰ উশাহ-নিশাহ লোৱাত অসুবিধা হয় আৰু ক্ৰমাৎ অৱস্থা সংকটজনক হৈ পৰে। এই ঘটনা সংঘটিত হৈছে উত্তৰপ্ৰদেশত।
পৰিয়ালৰ লোকে ততাতৈয়াকৈ কন্যাটিক বিলছিৰ এখন ব্যক্তিগত চিকিৎসালয়লৈ লৈ যায়। কিন্তু চিকিৎসকে পৰীক্ষা কৰাৰ পিছত নন্দিনীক মৃত বুলি ঘোষণা কৰে। দীপাৱলী উদযাপন কৰিবলৈ ঘৰলৈ অহা শিশুটিয়ে এনেদৰে আকস্মিকভাৱে প্ৰাণ হেৰুওৱাত পৰিয়ালটোত শোকৰ ছাঁ পৰিছে। আনহাতে, ঘটনাটোৰ বিষয়ে এতিয়ালৈকে আৰক্ষীক আনুষ্ঠানিকভাৱে অৱগত কৰা নাই ভুক্তভোগীৰ পৰিয়ালে।
উত্তৰ প্ৰদেশৰ বদৌনৰ বিলছি থানা এলেকাৰ গড়ৌলি গাঁৱত সংঘটিত হৈছে এই শোকাৱহ ঘটনা। জানিব পৰা মতে, পৰিয়ালটোক পোহপাল দিবলৈ ভুক্তভোগী কন্যাটিৰ পিতৃ ভুৱনেশে দিল্লীৰ দাদ্ৰীত শ্ৰমিক হিচাপে কাম কৰে। তেওঁলোকৰ ১০ বছৰীয়া কন্যা নন্দিনী তিনিটি সন্তানৰ ভিতৰত আটাইতকৈ সৰু আছিল। নন্দিনী দিল্লীৰ দাদ্ৰীৰ এখন বিদ্যালয়ৰ চতুৰ্থ শ্ৰেণীৰ ছাত্ৰী আছিল।
গাঁওবাসীয়ে জানিবলৈ দিয়া মতে, সোমবাৰে পুৱা নন্দিনীয়ে আন শিশুৰ সৈতে ঘৰৰ বাহিৰত খেলি আছিল। সেই সময়ত শিশুসকলে বেলুন উৰুৱাই আনন্দ কৰি আছিল। নন্দিনীয়েও এটা বেলুন ফুলাবলৈ চেষ্টা কৰিছিল। কিন্তু হঠাৎ বেলুনটো তাইৰ ডিঙিত আবদ্ধ হৈ পৰে। ইয়াৰ ফলত নন্দিনীৰ উশাহ-নিশাহ লোৱাত অসুবিধা হয়। কিছু সময়ৰ ভিতৰতে কন্যাটিৰ মৃত্যু ঘটে।
আনহাতে, এই ঘটনাৰ বিষয়ে এতিয়ালৈকে আৰক্ষীক কোনো তথ্য দিয়া হোৱা নাই। আৰক্ষীয়েও ঘটনাটোৰ সন্দৰ্ভত কোনো আনুষ্ঠানিক খবৰ লাভ কৰা নাই বুলি জানিবলৈ দিছে। আৰক্ষীৰ মতে, ঘটনাৰ বিষয়ে তথ্য লাভ কৰাৰ পিছত তদন্ত আৰম্ভ কৰা হ’ব আৰু নিয়ম অনুসৰি প্ৰয়োজনীয় আইনী ব্যৱস্থা গ্ৰহণ কৰা হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
