দীপাৱলীৰ পিছত দেশৰ বিভিন্ন প্ৰান্তত বায়ু প্ৰদূষণ বৃদ্ধি পোৱাক লৈ উদ্বেগ প্ৰকাশ কৰিছে সাধাৰণ ৰাইজে। বিশেষকৈ ফটকাৰ ধোঁৱা আৰু ইয়াৰ ক্ষতিকাৰক প্ৰভাৱক লৈ স্বাস্থ্য বিশেষজ্ঞসকলে সতৰ্কবাণী দিছে। এনে সময়তে পশ্চিমবংগৰ বিজেপিৰ MLA পাপিয়া অধিকাৰীৰ এক মন্তব্যই সৃষ্টি কৰিছে তীব্ৰ বিতৰ্কৰ।
কলকাতাৰ টালিগঞ্জ বিধানসভা সমষ্টিৰ MLA পাপিয়া অধিকাৰীয়ে ফটকা ফুটালে বহু ৰোগ নিৰাময় হয় বুলি দাবী কৰিছে। কালী পূজাৰ এক অনুষ্ঠান উদ্বোধন কৰাৰ সময়ত তেওঁ কৰা এই মন্তব্যৰ ভিডিঅ’ ইতিমধ্যে ছ’চিয়েল মিডিয়াত ভাইৰেল হৈ পৰিছে। তেওঁৰ এই বক্তব্যক লৈ বিভিন্নজনে প্ৰশ্ন উত্থাপন কৰাৰ লগতে ঠাট্টা-মস্কৰাও কৰিছে।
নিজৰ সমষ্টিত কালী পূজাৰ অনুষ্ঠান উদ্বোধন কৰিবলৈ গৈ পাপিয়া অধিকাৰীয়ে কয় যে ফটকা ফুটালে বহু ৰোগ নিৰাময় কৰাত সহায় কৰে। তেওঁ লগতে উল্লেখ কৰে যে মুখ্যমন্ত্ৰী শুভেন্দু অধিকাৰীয়েও ফটকা ফুটোৱাৰ কথা কৈছে। বিধায়কগৰাকীয়ে কয়, “ফটকা অবিহনে কালী পূজা কেনেকৈ সম্পূৰ্ণ হ’ব? আমি ফটকা জ্বলাম, কিন্তু আৰক্ষীৰ নিৰ্দেশনাও মানি চলিম।”
অৱশ্যে ফটকা জ্বলালে ৰোগ নিৰাময় হয় বুলি কৰা এই দাবীৰ কোনো বৈজ্ঞানিক ভিত্তি নাই। স্বাস্থ্য বিশেষজ্ঞসকলৰ মতে, ফটকাৰ পৰা নিৰ্গত ধোঁৱা আৰু বিষাক্ত পদাৰ্থই মানুহৰ স্বাস্থ্যৰ ওপৰত বিৰূপ প্ৰভাৱ পেলায়। বিশেষকৈ হাঁপানী, শ্বাস-প্ৰশ্বাসজনিত সমস্যা আৰু হৃদৰোগত আক্ৰান্ত লোকৰ বাবে ফটকাৰ ধোঁৱা অধিক বিপজ্জনক হ’ব পাৰে।
দীপাৱলীৰ পিছত কলকাতাত বায়ু আৰু শব্দ প্ৰদূষণ বৃদ্ধি পোৱাক লৈ উদ্বেগ প্ৰকাশ কৰা হৈছে। কেন্দ্ৰীয় প্ৰদূষণ নিয়ন্ত্ৰণ ব’ৰ্ডৰ তথ্য অনুসৰি, দীপাৱলীৰ দিনা কলকাতাৰ গড় বায়ুৰ গুণগত মান সূচক (AQI) ৩০১ ৰেকৰ্ড কৰা হৈছিল। এই পৰিমাণ ‘অতি চিন্তাজনক’ শ্ৰেণীৰ অন্তৰ্গত। এনে পৰিস্থিতিত ফটকা জ্বলালে ৰোগ নিৰাময় হয় বুলি বিধায়কগৰাকীয়ে কৰা দাবীয়ে নতুন বিতৰ্কৰ সূচনা কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
