বংগোপসাগৰত সৃষ্টি হোৱা শক্তিশালী ঘূৰ্ণীবতাহ ‘আকৱান’ক লৈ এতিয়া উদ্বিগ্ন হৈ পৰিছে কেইবাখনো ৰাজ্যৰ প্ৰশাসন। ঘূৰ্ণীবতাহৰ সম্ভাৱ্য প্ৰভাৱৰ প্ৰতি লক্ষ্য ৰাখি অন্ধ্ৰপ্ৰদেশ আৰু ওড়িশাত ব্যাপক সতৰ্কতামূলক ব্যৱস্থা গ্ৰহণ কৰা হৈছে। আনকি যাত্ৰীসকলৰ সুৰক্ষাৰ প্ৰতি লক্ষ্য ৰাখি ৰে’ল বিভাগে বাতিল কৰিছে ৩৯খন ৰে’ল। ইয়াৰ উপৰি আন ২৮খন ৰে’লৰ যাত্ৰাৰ সময় সলনি কৰা হৈছে।
ভাৰতীয় বতৰ বিজ্ঞান বিভাগৰ (IMD) তথ্য অনুসৰি, শুকুৰবাৰে অৰ্থাৎ ২০ নৱেম্বৰৰ ভিতৰত ঘূৰ্ণীবতাহ ‘আকৱান’ই উত্তৰ অন্ধ্ৰপ্ৰদেশ আৰু দক্ষিণ ওড়িশাৰ উপকূলীয় অঞ্চলত স্থলভাগত প্ৰৱেশ কৰাৰ আশংকা আছে। সেই সময়ত ধুমুহাৰ গতিবেগ ঘণ্টাত ৯০ৰ পৰা ১১০ কিলোমিটাৰ পৰ্যন্ত হ’ব পাৰে। ইয়াৰ ফলত উপকূলীয় অঞ্চলসমূহত প্ৰচণ্ড বৰষুণ, ধুমুহা আৰু সাগৰৰ ঢৌ বৃদ্ধি পোৱাৰ আশংকা কৰা হৈছে।
১৯ নৱেম্বৰত প্ৰকাশ কৰা বতৰ বিজ্ঞান বিভাগৰ বুলেটিন অনুসৰি, ঘূৰ্ণীবতাহ বৰ্তমান পশ্চিম-মধ্য বংগোপসাগৰৰ ওপৰত সক্ৰিয় হৈ আছে। বিগত ছয় ঘণ্টাত ই ঘণ্টাত প্ৰায় ১৩ কিলোমিটাৰ বেগেৰে উত্তৰ দিশলৈ গতি কৰিছে। ঘূৰ্ণীবতাহৰ সম্ভাৱ্য প্ৰভাৱৰ প্ৰতি লক্ষ্য ৰাখি কেন্দ্ৰীয় চৰকাৰৰ লগতে সংশ্লিষ্ট ৰাজ্য চৰকাৰসমূহেও উদ্ধাৰ আৰু সাহায্য অভিযানৰ বাবে প্ৰস্তুতি সম্পূৰ্ণ কৰিছে।
৩৯খন ৰে’ল বাতিল
ঘূৰ্ণীবতাহ ‘আকৱান’ৰ প্ৰভাৱৰ পৰা যাত্ৰীসকলক সুৰক্ষিত কৰি ৰাখিবলৈ ইষ্ট ক’ষ্ট ৰে’লৱেই ৩৯খন ৰে’লৰ চলাচল বাতিল কৰিছে। ১৯, ২০ আৰু ২১ নৱেম্বৰত চলাচল কৰিবলগীয়া এই ৰে’লসমূহ বাতিল কৰাৰ সিদ্ধান্ত গ্ৰহণ কৰা হৈছে। ইষ্ট ক’ষ্ট ৰে’লৱেৰ মুখ্য জনসংযোগ বিষয়া দীপক ৰাউটে জানিবলৈ দিয়া অনুসৰি, ঘূৰ্ণীবতাহৰ সময়ত ৰে’ল চলাচলৰ ক্ষেত্ৰত যাতে কোনো বিপদৰ সৃষ্টি নহয়, তাৰ প্ৰতি লক্ষ্য ৰাখিয়েই এই সিদ্ধান্ত লোৱা হৈছে। বাতিল কৰা ৰে’লসমূহৰ ভিতৰত আছে দীৰ্ঘ দূৰত্বৰ এক্সপ্ৰেছ ৰে’ল, যাত্ৰীবাহী ৰে’ল, এমইএমইউ আৰু বন্দে ভাৰত এক্সপ্ৰেছ। ইয়াৰ উপৰি আন ২৮খন ৰে’লৰ যাত্ৰাৰ সময়ো সলনি কৰা হৈছে।
২০ নৱেম্বৰত বাতিল কেইবাখনো গুৰুত্বপূৰ্ণ ৰে’ল
২০ নৱেম্বৰৰ বাবে বাতিল কৰা ৰে’লসমূহৰ ভিতৰত উল্লেখযোগ্য হৈছে ভুবনেশ্বৰ-বিশাখাপট্টনম বন্দে ভাৰত এক্সপ্ৰেছ, বিশাখাপট্টনম-ভুৱনেশ্বৰ বন্দে ভাৰত এক্সপ্ৰেছ, হাওৰা-পুৰী বন্দে ভাৰত এক্সপ্ৰেছ আৰু পুৰী-হাওৰা বন্দে ভাৰত এক্সপ্ৰেছ। ইয়াৰ উপৰি পুৰী, ভুবনেশ্বৰ, খুৰদা ৰোড, ব্ৰহ্মপুৰ, আংগুল, তালচেৰ আৰু গুনুপুৰ পথেৰে চলাচল কৰা আন কেইবাখনো ৰে’লৰ যাত্ৰা বাতিল কৰা হৈছে। আনহাতে, ২১ নৱেম্বৰত চলিবলগীয়া য়েছৱন্তপুৰ-পুৰী গৰিব ৰথ এক্সপ্ৰেছ (ৰে’ল নম্বৰ ২২৮৮৪)ৰ চলাচলতো প্ৰভাৱ পৰিব। সেয়েহে এইকেইদিনত ৰে’লযোগে যাত্ৰা কৰিবলৈ পৰিকল্পনা কৰা যাত্ৰীসকলক যাত্ৰাৰ পূৰ্বে ৰে’লৰ সময়সূচী আৰু বাতিলৰ তথ্য পৰীক্ষা কৰিবলৈ পৰামৰ্শ দিয়া হৈছে।
ওড়িশাৰ ১৩খন জিলাত ৰেড এলাৰ্ট জাৰি
ঘূৰ্ণীবতাহৰ সম্ভাৱ্য ক্ষয়-ক্ষতি হ্ৰাস কৰাৰ লক্ষ্যৰে ওড়িশা চৰকাৰে ৰাজ্যখনৰ ১৩খন জিলাত ৰেড এলাৰ্ট জাৰি কৰিছে। উপকূলীয় আৰু নিম্নভূমি অঞ্চলৰ বাসিন্দাসকলক নিৰাপদ স্থানলৈ স্থানান্তৰ কৰাৰ কামো অব্যাহত আছে। প্ৰকাশিত তথ্য অনুসৰি, ইতিমধ্যে বিপদসংকুল অঞ্চলৰ পৰা ১ লাখ ৫ হাজাৰ ৩০৪জনতকৈ অধিক লোকক স্থানান্তৰ কৰা হৈছে। প্ৰশাসনে মুঠ ২ লাখ লোকক নিৰাপদ স্থানলৈ স্থানান্তৰ কৰাৰ লক্ষ্য নিৰ্ধাৰণ কৰিছে। সমগ্ৰ ৰাজ্যতে ৯,২৯৯টা ঘূৰ্ণীবতাহ আশ্ৰয় শিবিৰ সাজু কৰি ৰখা হৈছে। যাতে জৰুৰীকালীন পৰিস্থিতিত কোনো লোক আশ্ৰয়ৰ অভাৱত সমস্যাত নপৰে, তাৰ বাবে প্ৰশাসনে বিশেষ ব্যৱস্থা গ্ৰহণ কৰিছে।
উদ্ধাৰ অভিযানৰ বাবে ৭৪টা দল মোতায়েন
ঘূৰ্ণীবতাহৰ ফলত সৃষ্টি হ’ব পৰা যিকোনো জৰুৰীকালীন পৰিস্থিতিৰ সৈতে মোকাবিলা কৰিবলৈ এনডিআৰএফ আৰু অ’ডিআৰএফৰ মুঠ ৭৪টা উদ্ধাৰকাৰী দল মোতায়েন কৰা হৈছে। ইয়াৰ লগতে অগ্নিনিৰ্বাপক বাহিনীৰ জোৱানসকলকো সাজু কৰি ৰখা হৈছে। আনহাতে, জলসম্পদ বিভাগে বান্ধ, নদ-নদী আৰু মথাউৰিসমূহৰ ওপৰত দিনে-নিশাই নিৰীক্ষণ চলাই আছে। দুৰ্বল অঞ্চলসমূহত জ্যেষ্ঠ অভিযন্তাসকলক বিশেষ দায়িত্ব দিয়া হৈছে। সতৰ্কতামূলক ব্যৱস্থা হিচাপে উপকূলীয় অঞ্চলৰ বিদ্যালয় আৰু পৰ্যটনস্থলীসমূহ সাময়িকভাৱে বন্ধ কৰি দিয়া হৈছে। ধুমুহাৰ পিছত যাতে পথ যোগাযোগ, বিদ্যুৎ, ইণ্টাৰনেট আৰু দূৰসংযোগ সেৱা শীঘ্ৰে পুনৰ আৰম্ভ কৰিব পৰা যায়, তাৰ বাবেও জিলা প্ৰশাসনক প্ৰয়োজনীয় নিৰ্দেশ দিয়া হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ

















