অবিশ্বাস্য, কিন্তু সত্য- ৪২৭ ৰানৰ লক্ষ্য লৈ খেলপথাৰত নামি ২ ৰানতে অল আউট
কেতিয়াবা ক্ৰিকেট খেলপথাৰত এনে অলৌকিকতা দেখা যায়, যি সহজে বিশ্বাস কৰাটো টান হৈ পৰে। যাৰ বাবেই ক্ৰিকেটক ‘অনিশ্চয়তাৰ খেল’ বুলি কোৱা হয়। তেনেই এক ঘটনা ঘটিছে ব্ৰিটেইনত।
ব্ৰিটেইনৰ ক্লাব ক্ৰিকেটৰ এখন খেলত এটা দলে বিৰোধী দলক বান্ধি দিয়ে ৪২৭ ৰানৰ লক্ষ্য। এই বিশাল লক্ষ্য পাৰ উদ্দেশ্যে খেলপথাৰত নামি কিন্তু দলে দেখুৱালে একেবাৰে বিপৰীত এখন ছবি, যাৰ বাবে এতিয়া সমগ্ৰ বিশ্বজুৰি চৰ্চিত হৈছে খেলখন।
কাৰণ দলটোৱে ৪২৭ ৰানৰ লক্ষ্য লৈ খেলপথাৰত নামি মাথো ২ ৰান কৰিয়ে অল আউট হয়। যি একেবাৰে লজ্জাজনত খেল হিচাপে পৰিগণিত হয়। ক্ৰিকেট খেলপথাৰত এনে ঘটনা খুব কমেইহে দেখা যায়।
আচলতে ব্ৰিটেইনত খেলা মিডলছেক্স কাউন্টি ক্ৰিকেট লীগত মিডলছেক্স লীগৰ খেলখন নৰ্থ লণ্ডন ক্লাব আৰু ৰিচমণ্ড ক্ৰিকেট ক্লাবৰ মাজত অনুষ্ঠিত হৈছিল। মিডলছেক্স কাউন্টি ক্ৰিকেট লীগৰ তৃতীয় স্তৰৰ ডিভিজন একৰ এখন খেলত নৰ্থ লণ্ডন চিচি (নৰ্থ লণ্ডন চিচি ৩য় একাদশ) আৰু ৰিচমণ্ড চিচি (ৰিচমণ্ড চিচি ৪ৰ্থ একাদশ), মিডেক্সৰ মাজত অনুষ্ঠিত হৈছিল।
য’ত নৰ্থ লণ্ডন চিচি দলে প্ৰথমে বেটিং কৰি ৪৫ অভাৰত ৬ টা উইকেটত ৪২৬ ৰান সংগ্ৰহ কৰে। কিন্তু ৪২৭ ৰানৰ লক্ষ্য খেদি ৰিচমণ্ড চিচিৰ দলটোৱে ২ ৰানত অল আউট হয়।
ৰিচমণ্ড চিচি দলৰ ৮ জন বেটছমেন ০ ৰানত আউট হয়। ৰিচমণ্ড চিচিৰ ইনিংছ মাত্ৰ ৩৪টা বলতে শেষ হৈ যায়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
