অতি উদ্বেগজনকভাৱে শেহতীয়া দুই-এটা বছৰত বহু শৰীৰ চৰ্চাকাৰীয়ে অকাল মৃত্যুক সাবটিবলগীয়া হৈছে। শেহতীয়াকৈ CCTVত এনে এটা ভিডিঅ’ ভাইৰেল হৈছিল য’ত এজন শৰীৰচৰ্চাবিদ(bodybuilder)-এ GYMতে ব্যায়াম কৰি থকা অৱস্থাত শেষ নিশ্বাস ত্যাগ কৰিছিল। এনেধৰণৰ ঘটনা এয়াই প্ৰথম নহয়, আমেৰিকা, ব্ৰাজিল, জাৰ্মানীৰ লগতে আমাৰ দেশতো এনে ঘটনা শেহতীয়া কিছু বছৰৰ ভিতৰত সময়ে সময়ে সংঘটিত হোৱা দেখা গৈছে। শেহতীয়াকৈ অভিনেতা তথা পঞ্জাৱৰ এজন বিখ্যাত শৰীৰচৰ্চাবিদ ভেৰিন্দৰ সিং ঘুমনেও কম বয়সতে হৃদক্ৰিয়া বন্ধ হৈ মৃ*ত্যুক সাবটিছে।
উদ্বেগজনক পৰিসংখ্যাটো হৈছে কেৱল ২০২৫তে ৫৬গৰাকী এনে শৰীৰচৰ্চাবিদৰ আকস্মিক মৃ*ত্যু হৈছে যাৰ গঢ় বয়স ৩৫ বছৰ। এই আটাইকেইজনেই হৃদক্ৰিয়া বন্ধ হৈ, একে ধৰণৰ লক্ষণেৰে মৃত্যুক সাবটিছে। স্বাভাৱিকতে প্ৰশ্ন হয়, বাহিৰৰ পৰা ইমান সুস্থ-সুঠাম যেন লগা একাংশ শৰীৰচৰ্চাবিদসকল ভিতৰৰ পৰা সঁচাকৈয়ে দুৰ্বল নেকি? এক সমীক্ষাত পোৱা গৈছে যে যিসকল শৰীৰ চৰ্চাবিদে এনেদৰে অকাল মৃ*ত্যুক সাবটিছে তেওঁলোকে বিভিন্ন সময়ত ছাপ্লিমেণ্টকে ধৰি বিভিন্ন দৰৱ ব্যৱহাৰ কৰিছিল।
“ৰাছিয়ান হাল্ক” নামেৰে পৰিচিত এজন প্ৰখ্যাত ৰাছিয়ান শৰীৰ চৰ্চাবিদৰ ২০২৫ চনৰ মে’ত বহু অংগ বিকল হৈ মৃত্যু ঘটিছিল। পিছত বিশেষজ্ঞ চিকিৎসকে কৰা গৱেষণাত ধৰা পৰিছে যে দীৰ্ঘদিন ধৰি চিনথল বেজী ব্যৱহাৰৰ লগতে আৰু অত্যধিক পেশী গঠনৰ বাবেও বিভিন্ন ঔষধ লৈছিল ৰাছিয়ান হাল্কে। বিশেষজ্ঞসকলৰ মতে কেৱল ষ্টেৰইডেই নহয়, বিভিন্ন অনিয়ন্ত্ৰিত ঔষধৰ ব্যৱহাৰেই এই মৃ*ত্যুৰ প্ৰধান কাৰক। ইটালীৰ পডুয়া বিশ্ববিদ্যালয়ৰ গৱেষকসকলে ২০০৫ চনৰ পৰা ২০২০ চনৰ ভিতৰত আন্তঃৰাষ্ট্ৰীয় শৰীৰচৰ্চা আৰু ফিটনেছ ফেডাৰেচন প্ৰতিযোগিতাত অংশগ্ৰহণ কৰা প্ৰায় ২০,৩০০ খেলুৱৈক পৰীক্ষা কৰিছিল। পৰীক্ষা কৰা এই ২০,৩০০গৰাকী শৰীৰ চৰ্চাবিদৰ ভিতৰত মুঠ ১২১ গৰাকীৰ মৃ*ত্যু হৈছে। মৃত্যু হোৱা ১২১গৰাকী শৰীৰ চৰ্চাবিদৰ ভিতৰত ৪৬ জনৰ হৃদযন্ত্ৰ বন্ধ হৈ মৃ*ত্যু হৈছিল। মৃ*ত্যুৰ গড় বয়স আছিল মাত্ৰ ৩৪.৭ বছৰ। গৱেষকসকলৰ মতে, অপেছাদাৰী শৰীৰ চৰ্চাবিদতকৈ পেছাদাৰী শৰীৰ চৰ্চাবিদৰ মৃ*ত্যুৰ আশংকা ৫ গুণ বেছি, ইয়াৰ কাৰণো হৈছে বিভিন্ন অনিয়ন্ত্ৰিত দৰৱ।
বিশেষজ্ঞসকলৰ মতে এই মৃ*ত্যুত কেইবাটাও কাৰকে অৰিহণা যোগায়। কাৰ্য্যক্ষমতা বৃদ্ধি কৰা ঔষধৰ ব্যৱহাৰ, যেনে এনাবলিক ষ্টেৰইড, প্ৰতিযোগিতাৰ পূৰ্বে দ্ৰুতভাৱে ওজন হ্ৰাস কৰা আৰু অত্যধিক গধুৰ কষ্টসাধ্য প্ৰশিক্ষণ আদি ইয়াৰ প্ৰধান কাৰণ। ২০২৫ চনত ডেনিছ গৱেষকসকলে কৰা এক অধ্যয়নত ১১ বছৰৰ ভিতৰত ১,১৮৯ জন ষ্টেৰইড ব্যৱহাৰ কৰা পুৰুষৰ সৈতে প্ৰায় ৬০,০০০ স্বাভাৱিক পুৰুষৰ তুলনা কৰা হৈছে। ফলাফলত দেখা গৈছে যে ষ্টেৰইড ব্যৱহাৰ কৰা লোকৰ হৃদযন্ত্ৰৰ পেশী দুৰ্বল হোৱাৰ আশংকা প্ৰায় ৯ গুণ বৃদ্ধি পায়, হাৰ্ট এটেকৰ আশংকা ৩ গুণ বৃদ্ধি পায় আৰু হৃদযন্ত্ৰ বিকল হোৱাৰ আশংকা ৩ গুণতকৈও অধিক বৃদ্ধি পায়। তদুপৰি ষ্টেৰইডে ৰক্তচাপ বৃদ্ধি কৰিব পাৰে, ধমনীত চৰ্বিৰ জমা হোৱা ত্বৰান্বিত কৰিব পাৰে, আনকি হৃদযন্ত্ৰৰ গঠন সলনি কৰিব পাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
